2 Fànʔafɔbèle 25

Nebukadinezari n tɛ́ɛn Zyerusalɛmi taana kapɛɛnni kánma na

1 # Zyer 21:1-10; 34:1-5; Ezek 24:2 Sedesyasi fǎngi yɛ̀ʔɛlɛ kpanjɛrɛ wólo na, yɛ́ɛli yeye kɛɛ wóʔo ki canya kɛɛ wógi na, a Babilɔni fànʔafɔw Nebukadinezari ní wi kapɛɛnkpumɔnbèle myɛ pan Zyerusalɛmi kánmi na ní baa tɛ́ɛn gi taana níì tɛɛ̀lúgugéle sámaga gi kánmi na. 2A be tɛ́ɛn kěgi taana n baa nan fànʔafɔw Sedesyasi fǎngi yɛ̀ʔɛlɛ kɛɛ ní nibin wóli na. 3Yégi canya kpanjɛrɛ wóʔo na àmɛɛ kateegi tɔ̀nɔ n gbàn kěgi ni lè, yaliire si da níì pye yaà tári syɛ̀ɛnnɛ ma í, 4#Ezek 33:21 a be weʔe fùru kěgi tò na. A fànʔafɔw yiri ni fé yébiligi ni, woro ní syɛ́ɛnbèle myɛ be pye lè kapɛɛnkpumɔnbèle n kpàánweeli kólogo láa ni syée gúnyi siin lariga ni fànʔafɔw nángwɔɔ taana. Koro n gi taa Kalide ye maa kěgi le nínge. A wi Araba kólogi láa ni syée. 5Kàjáa Kalide ye kapɛɛnkpumɔnbèle maa fànʔafɔw kɔ́ri n láa ní sáà wi nɛnɛ n taa Zyeriko tɛɛfiigi na. A wi kapɛɛnkpumɔnbèle myɛ fàn n cariga n léeli wi na. 6A be fànʔafɔw Sedesyasi cò n kári Babilɔni fànʔafɔw ma Iribila ma. A be sáà kútiiw kúun yaà beè wi na. 7#Ezek 12:13 A wi be pye a be Sedesyasi jáabèle kɔnɔgi wi nyɛnɛ na, níì Sedesyasi nyapiigèle jabagi, níì nyɔ̀ʔɔmɔ le wi na n kári Babilɔni ma.

Zyerusalɛmi jáali kéeleCò-mí-kárili siin wólo

8Yɛ́ɛli yeye kagunɔ wóʔo, canya kɔrɔsiin wóʔo na, koro n pye Babilɔni fànʔafɔw Nebukadinezari fǎngi yɛ̀ʔɛlɛ kɛɛ ní kpanjɛrɛ wólo, Nebuzaradan wi pye lè gáridibèle kùndigi, ní i nyɛ Babilɔni fànʔafɔw falipyewaa, a woro pan Zyerusalɛmi ma. 9A wi baa Yawe kpáagi, ní fànʔafɔw kpaʔa, ní Zyerusalɛmi kpáayi myɛ sórigo. Wi maa naà le kùndigibèle kpaaya myɛ na. 10Kalide ye kapɛɛnkpumɔnbèle myɛ be pye ní gáridibèle kùndigi ní lè, a poro tǒw myɛ cáan, wee wi da Zyerusalɛmi màʔa lè. 11Syɛ́ɛnbèle wozanbèlē pe da kòro kěgi ni lè, poro bele pe da yiri n peyɛɛ gaan Babilɔni fànʔafɔw ma lè, poro ní syɛɛnnɛʔɛmi wogorobéle, Nebuzaradan wi lè gáridibèle kùndigi, a woro bele bee koli n kári. 12Kàjáa gáridibèle kùndigi maa tári fɔ̀ngɔfɔbèle pèle yaʔa be kòro yaà bàā ɛrɛzɛn séyi kɔ̀rɔsíi si wɔ́ɔ ra fála.

13 # 1Fàn 7:15-26; 2Cán 3:15-17 Kanyɛɛnri gàángéle ge pye Yawe kpáagi ni lè, n fàra yataʔayi na yi pye yaà lè, ní kanyɛɛnri pɛ́ʔɛ, a Kalide ye toro kabagi kabagi n kári ní di kanyɛɛnri ní Babilɔni ma. 14#1Fàn 7:45; 2Cán 4:16 A be nɛ̀ʔɛdaʔayi, ní cɔ́ɔngi yakoliyo, ní ŋɔ́gèle ní yagbaagèle láa n fàra kanyɛɛnri yárira myɛ na dee ní pe da ni fáliw kpéʔele lè. 15Nùndaanni yasorigoro yalegéle, ní nyari-nyarili pɛ́ɛgéle, gee bee n jo dee myɛ di pye lè tɛ́ɛw, ní wálifiiw wóro, a gáridibèle kùndigi wɔ́ɔ̀ toro láa.

16Kanyɛɛnri gàángéle siin Salomɔn da sámaga lè n fàra pɛ́ɛgi ní yataʔayi na Yawe kpáagi kéele na, yáriri bee myɛ kanyɛɛnrɛ cúlobéle nyɔ́ɔ ga cán í. 17Gàánni bee làa nibin tɔnɔganma maa pye mɛ́tiribéle kpanjɛrɛ, á be kanyɛɛnrɛ faan n pye li ǹjogi yataʔaga, gee tɔnɔganma bi pye lè mɛ́tiri nibin ní tíla. Cɔ̀ɔwaa félege ní girenadi niwiriye si i nyɛ gi na n gi màʔa. Dee bee myɛ maa sámaga ní kanyɛɛnrɛ ní. Dee bee félege, ní cɔ̀ɔwaa maa wɔ́ɔ̀ pye gàánni siin wólo na.

18A gáridibèle kùndigi Seraya taa n cò wi pye lè sáriga-wòlobèle kàfɔlɔ, ní wi taʔara wów wi lè Sofonii, n fàra kpàánweeli kɔ̀rɔsiifɔɔlɔ taanri na. 19Nǎnbèle be wòlo lè a wi poro wàa taa n cò yaà kěgi ni, woro wi pye kapɛɛnkpumɔnbèle kɔ̀rɔsiifɔlɔ, n fàra fànʔafɔw kàcoolo wóbèle pèle kagunɔ na be pye yaà lè kěgi ni, n níì fàra kapɛɛnkpumɔnbèle kàfɔlɔ sɛ́bɛkaɔn na, woro wee wi da ni tári syɛ̀ɛnnɛ kpóʔoro peyɛɛ na lè, Zyuda tári syɛ́ɛnbèle pèle togoye taanri maa pye yaà Zyerusalɛmi ni, a wi bele bee myɛ cò. 20A gáridibèle kùndigi Nebuzaradan be cò n kári Iribila ma Babilɔni fànʔafɔw ma. 21A Babilɔni fànʔafɔw sáà be kpúmɔn n kpóo Iribila ni, Hamati tári ni.

Kánmi bee na be Zyuda ye cò n yirige be tári ni n kári léelige.

Gedaliya n pye Zyuda tári nyúngo na

22 # Zyer 40:7-9; 41:1-3 Syɛɛnsanbèle bele si pe da kòro yaà Zyuda tári ni lè, poro bele Babilɔni fànʔafɔw Nebukadinezari da yaʔa be kòro yaà lè, a wi Ahikami jáaw Gedaliya télege be nyúngi na, Ahikami wi lè Syafan jáaw. 23Lǎli ni kabiyi kùndigibéle myɛ gi lóʔo lè n fàra be nǎnbèle na ncan Babilɔni fànʔafɔw n Gedaliya télege syɛ́ɛnbèle nyúngo na, a be kári Gedaliya ma Misipa ma, poro be nyɛ: Isimayɛli wi lè Netanya jáaw, ní Yohanan wi lè Kareya jáaw, ní Seraya wi lè Tanhumɛti jáaw, Tanhumɛti wi lè Netofa ye wów, n fàra Yaazanyahu na wi lè Maaka ye wów. Pe maa kári ní be nǎnbèle ní. 24A Gedaliya gi joo poro ní be nǎnbèle ma ní kàliga ní níì jo: «Yele a kɔ́ ra fɛ̀ɛgí Kalide ye falipyebèle na í, ki n yɛlɛ ye tɛ́ɛn tári ni, yáā báara Babilɔni fànʔafɔw ma, koro a pɔ́rɔ yele ma.»

25Kàjáa a ki ga pye yeye kɔrɔsiin wógi na, Isimayɛli wi lè Netanya jáaw, Netanya wi lè Elisyama jáaw, a woro pan ní nànbēle kɛɛ ní, a pe baa Gedaliya kpúmɔn n kpóo n fàra Zyuda ye ní Kalide ye na be pye yaà ní Gedaliya ní lè Misipa ni. Isimayɛli maa pye fàndulugi wówaa. 26#Zyer 43:5-7 Lǎli bee ni a syɛ́ɛnbèle myɛ yìri, woyilibèle ní wogbolobèle n fàra kabiyi kùndigibéle na, a be kári Ezyipiti ma níì cán pe maa fyáa Kalide ye na.

Babilɔni fànʔafɔw n Yehoyakɛn yirige kàsow ni

27 # Zyer 52:31-34 Zyuda fànʔafɔw Yehoyakɛn cò-mí-kárili yɛ̀ʔɛlɛ toko ní kpɔrigɔ ní kɔrɔsiin wóli yeye kɛɛ ní siin wóʔo canya toko ní kɔrɔsiin wógi na, a koro pye Babilɔni fànʔafɔw Eviili-Merodaki fǎngi yɛɛzelile, a wi Zyuda fànʔafɔw Yehoyakɛn yirige kàsow ni níì wi kpɔ́ʔɔ. 28A wi i nyuu ní wi ní ní funjànga ní. Fànʔafɔbèle bele pe da pye yaà ní wi ní Babilɔni ni lè, a wi wi kpɔ́ʔɔ n sɔ̀lɔ poro na. 29A wi Yehoyakɛn kàsoburoyi wòlo wi na níì wi yaʔa a wi i líi ní woro ní wi sìíw làla myɛ ni. 30A fànʔafɔw i wi màkonyɔɔ-yáriri kaangi wi ma canʔa o canʔa wi sìíw làla myɛ ni.

Currently Selected:

2 Fànʔafɔbèle 25: CB10

Highlight

Copy

Compare