2 Fànʔafɔbèle 16

Akazi n pye Zyuda fànʔafɔw

1Eremaliyahu jáaw Peka fǎngi yɛ̀ʔɛlɛ kɛɛ ní kɔrɔsiin wóli na Yotami jáaw Akazi tɛ́ɛn fǎngi na n pye Zyuda fànʔafɔw. 2Yɛ̀ʔɛlɛ toko Akazi da taa lǎli ni wi baa pye lè fànʔafɔlɔ. Yɛ̀ʔɛlɛ kɛɛ ní kɔrɔni si wi kwɔ́ɔ fǎngi na Zyerusalɛmi ni. Wi da ni gi kpéʔele gee gi sín Yawe wi Kolocɔlɔw nyɛ́nɛ na lè í, àmɛɛ wi toolɛɛgi Davidi da ni gi kpéʔele lè í. 3#Làlw 12:31 Isirayɛli fànʔafɔbèle kôdanʔaga ni wi da ni táanri. Alí wi maa wi jáaw sórigo sáriga náagi ni n yɛlɛ ní syɛɛnfeleyi nɔ́nʔɔrɔ kapyere ní, yoro yee Yawe da nɛnɛ n yirige yaà lè Isirayɛli ye yɛ́ʔɛ ma. 4Wi maa ni sárigaw wóo, ní i nùndaanni yárira sórogi sáriga-wòlo-tɛ́ɛyi, ní nyanbenyungèle na, ní tiipiriyi myɛ láara ni.

5 # Eza 7:1 Lǎli bee ni Sirii fànʔafɔw Eresɛn, ní Isirayɛli fànʔafɔw Peka wi pye lè Eremaliyahu jáaw, a poro kári sa kapɛɛnni kpúmɔn ní Zyerusalɛmi ní, ní sáà tɛ́ɛn Akazi kánmi na, kàjáa pe ga fànʔa taa wi na í. 6Lǎli bee wonijanna ni Sirii fànʔafɔw Eresɛn níì Elati lúrugo n le Sirii ye fǎngi láara ni níì Zyuda ye nɛnɛ n yirige Elati ni, á Edɔmi ye sáà tɛ́ɛn Elati ni, beè be yaà fwɔɔ n baa nan níjanʔa na.

7A Akazi tundunbéle tórigo Asirii fànʔafɔw Tigilati-Pilezɛɛri ma n gi joo wi ma níì jo: «Mii i nyɛ mɔ falipyeo ní mɔ pya. Da maa mi ba mii yirige Sirii fànʔafɔw, ní Isirayɛli fànʔafɔw kɔ́yɔ ni. Pe i naa n yìri mii kurugo.» 8Wálifiiw ní tɛ́ɛw wi pye Yawe kpáagi ni lè, ní fànʔafɔw kpaʔa lɔ́rɔ tɛɛkɔnyɔ ni, a wi woro láa n tórigo Asirii fànʔafɔw ma kpɔʔɔrɔ. 9A Asirii fànʔafɔw lóʔo wi ma, níì kári Damasi kánmi na n sáà fànʔa taa gi na, níì gi syɛ́ɛnbèle cò n kári pulobèlē Kiiri ma, níì Eresɛn kpóo.

10A fànʔafɔw Akazi kári Damasi ma bi sa Tigilati-Pilezɛɛri fàra wi lè Asirii fànʔafɔw. A fànʔafɔw Akazi ga sáà sáriga-wòlo-yafaangi nyaa gi pye lè Damasi ni, a wi gi sámagaganmi, ní gi félegi kán n tórigo sáriga-wòlow Urii ma, n gi yáriri myɛ tɛ̀ɛn. 11A sáriga-wòlow Urii sáriga-wòlo-yafanʔa faan téw n yɛlɛ ní kánmee ní fànʔafɔw Akazi da kán yaà Damasi ma n tórigo naa lè. Sáriga-wòlow Urii si maa gi sámaga n kwɔ́ɔ sáni fànʔafɔw Akazi í yìri Damasi ma bi lúru pan lè. 12Lǎli ni fànʔafɔw yìri Damasi ma n lúru n pan lè, ní baa sáriga-wòlo-yafaangi nyaa, a wi nùuni gi na, níì lúgu gi na. 13Níì wi sáriga-sórigow ní wi yakaangi sórigo gi na, níì wi sáriga-yólogow wo gi na níì wi pínɛnyɛnnɛgi sáriga sìsyaan nyari nyari sáriga-wòlo-yafaangi na. 14#Yir 27:1-2; 2Cán 4:1 Kanyɛɛnri sáriga-wòlo-yafanʔa si gi pye lè Yawe yɛ́ʔɛ ma, a wi koro láa gi tɛ́ɛgi ni n núngo yaà kpáagi yɛ́ʔɛ ma n gi yirige yaà sáriga-wòlo-yafaanvɔngi ní Yawe kpáagi nínge ni, n tɛ́ʔɛ kɔlɔ̀ na sáriga-wòlo-yafaanvɔngi taana solomɔkulo kàbangi na.

15A fànʔafɔw Akazi syɛ́ɛnri naa joo n gbàn Urii ma níì jo: «Mɔ a ra nyǐngi nyɔ́ɔ sáriga-sórigoo wóo sáriga-wòlo-yafaangbɔɔgi na, ní cângwɔɔgi nyɔ́ɔ yakanʔa, ní fànʔafɔw sáriga-sórigoo, ní wi yakaangi ní, n fàra tári syɛ̀ɛnnɛ sáriga-sórigoo, ní be yakaanyi na, máā be sáriga-yólogow ŋuu gi na, bàā sáriga-sórigow ní pínɛnyɛnnɛgi sáriga sìsyaan nyari nyari gi na. Gee gi kanyɛɛnri sáriga-wòlo-yafanʔa kéele kwɔ́ɔ lè, mii a ba ra yíbe gi na.»#16:15 mii a ba ra yíbe gi na: Syɛ́ɛnri naa wonijanra n joo sɛ́bɛbèle pèle ni: Mii a ba koro kéeli cɔɔnri. 16A sáriga-wòlow Urii gi kpéʔele n yɛlɛ ní gee myɛ ní fànʔafɔw Akazi da joo n gbàn lè.

17 # 1Fàn 7:23-39; 2Cán 4:2-6 Kanyɛɛnri yafabi-fabiya yi pye lè yataʔayi na a fànʔafɔw Akazi yoro cɛnɛ n láʔa yaà níì jéemununi yaleye láʔa yataʔayi na. A wi pɛɛkpɔɔgi láʔa kanyɛɛnri náapɛʔɛlɛ na ge pye lè gi láari ni n tɛ́ʔɛ kàdɛnɛrɛ yafanʔa na. 18A wi cândɛnɛgi kpáala kánma kàriga Yawe kpáagi ni Asirii fànʔafɔw kéele na, lee pe da sámaga lè fungo ma, ní fànʔafɔw tɛɛ̀jeele kafugo ma.

19Akazi kasangèle ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. 20#Eza 14:28 A Akazi kùu n fàra wi toolɛɛbèle na, a be wi tɔ́n wi toolɛɛbèle taana Davidi kěgi ni. A wi jáaw Ezekyasi tɛ́ɛn fǎngi na wi sìndɛɛgi ni.

Currently Selected:

2 Fànʔafɔbèle 16: CB10

Highlight

Copy

Compare