2 Zyan 1
1
Fòów kéele
1Mii wee wi nyɛ lè Egiliziw wolɛɛɔ, cɔlɔɔ, mii a sɛ́bɛw naa tórigo mɔ ní mɔ piibèle ma, mɔ wee wi nyɛ lè Kolocɔlɔɔ syɛɛnnyɛnɛ-wòloo. Yele kéeli n mii dɛ́nɛ kányɛʔɛ ni, mii nibin si ban í, fwɔɔ bele myɛ be kányɛɛgi cán lè, yele kéeli n wɔ́ɔ̀ bele bee dɛ́nɛ 2kányɛɛgi kéele na gee gi nyɛ lè wolo ni, ki si a wɔ́ɔ pye ní wolo ní làla o làla.
3Ki n yɛlɛ Tofɔw Kolocɔlɔɔ ní Zyezu Kirisi wi lè Tofɔw Jáa, poro í kpɔ́ʔɔri, ní nyínimi, ní fûnnyingi kaan wo ma kányɛɛgi, ní tàmagi ni.
Kányɛɛgi ní tàmagi kéele
4Mii n tɔ̀nɔ n fundaanra kpéʔele gbanʔama, àmɛɛ mii mɔ piibèle pèle nyaa pe i táanri kányɛɛgi ni lè n yɛlɛ ní tundunri ní wolo taa Tofɔw ma lè. 5#Zyan 13:34; 15:12,17 Cɔlɔɔ, tɔ́ɔliw ni mii i mɔ nyɛ́ɛri níì jo ki n yɛlɛ wo kòro tàmagi ni ní woyɛɛ ní, ki o náā nyɛ mɔ a jo tundunvɔ́nrɔ mii sɛ́bɛ bi tórigo mɔ ma í, fwɔɔ dee ti da téè pye lè wolo ma nlaa yaà gi sélimi na. 6Gee gi nyɛ lè tàmagi, koro gi nyɛ fwɔɔ wolo í da táanri da yɛlɛgi ní wi tundunri ní. Tundunri bee di nyɛ dee yele da téè lóʔo lè nlaa yaà gi sélimi na, a di jo, ki n yɛlɛ yele í da táanri tàmagi kólogo ni.
7Jànvaafɔɔlɔ saʔa n cariga dulunyanw ni, poro bele be nyɛ lè pe ga yére gi ni n jo Zyezu Kirisi n pan cere ni lè í. Syɔ́ɔnwee wi ga pye ànbée lè, wee bee wi nyɛ jànvaafɔw, ní Kirisi nigoow. 8Yele si n yɛlɛ yaa yeyɛɛ kɔ̀rɔsíi koro ga pye fáliwee yele kpéʔele lè, yele a kɔ́ bɔ̀nɔ wi ni í, fwɔɔ yele í wi tɔ̀nɔw taa bi foro.
9Syɔ́ɔnwee faala ga pye lè wi ga kòro Kirisi tamani yagana ni í, ní i làa nikwɔɔ taari li na, Kolocɔlɔɔ o nyɛ wee bee ma í. Wee si wi kòro lè wi tamani ni, Tofɔw ní Jaafɔw myɛ i nyɛ wee bee ma. 10Wàa ga pan yele ma, wi si ga pan ní tamani bee ní í, yele wàa a kɔ́ fɔ̀lɔ wee bee na bi wi lége wi kpaʔa ni í, yele a caa kɔ́ wi syáanri í! 11Níì cán wee wi ga wi syáanri lè, wee bee n pínɛ ní wi ní wi kapeebyeri ni.
Kasangèle joolo
12Kèlē saʔa i nyɛ mii ma bi ní joo yele ma, mii si o caa bi ge sɛ́bɛ kàlawara na ní lángiri ní bi tórigo yele ma í. Kàjáa mii tiimaa i sɔ̀ngí bi kári yaà yele ma wo sa woyɛɛ nyaa wo joo, koro ga pye wolo fundaanri si foro.
13Mɔ senyɛnjew wi nyɛ lè Kolocɔlɔɔ syɛɛnnyɛnɛ-wòlowaa, wi pìíbèle n mɔ syáanri yaà.
Currently Selected:
2 Zyan 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
