1 Pyɛri 5
5
Kolocɔlɔɔ bàtogi nàʔafɔɔlɔ
1 Egiliziw wólɛɛbéle be nyɛ lè yele níngi ni, bele bee ní mii nyuu tɔ́ɔliw ni, mii wee wi wɔ́ɔ̄ nyɛ lè wolɛɛwaa àmɛɛ poro nyɛ lè, ní Kirisi wɔʔɔyi séera, á mii wɔ́ɔ̀ lɛɛlɛ taa nìjanri ni, dee wi a kɔ́ ba tɛ̀ɛn wo na lè, mii i yele nyɛ́ɛri níì jo: 2#Zyan 21:15-17 Kolocɔlɔɔ bàtogi gi nyɛ yele níngi ni lè, yaa gee bee nàʔá. Ki si ga yɛlɛ gi pye mɔ a jo a be yele kpɛ̀ɛn wii í, fwɔɔ ki yiri yele tiimaa fúnyi ni n yɛlɛ ní Kolocɔlɔɔ nyɛ́nɛ kéeli ní. Ki ga wɔ́ɔ̀ yɛlɛ gi pye wálicaari kéele na í, fwɔɔ gi pye kínidɛnɛgi kéele na. 3Bele Kolocɔlɔɔ kàlifáa yele ma lè yele a kɔ́ ra fànʔa cáan be na í, fwɔɔ yele í pye fɛ̀ɛ bàtogi ma. 4Lǎli ni bànaʔabèle Kàfɔlɔ ga baa wiyɛɛ dɛ̀ɛn lè, wi a bàngwɔɔ nìjangbɔɔrɔ taʔa yele na, ti pye yele ma kpɔʔɔrɔ.
5 #
Kàs 3:34
Kánmi bee wonijanma na, yele wojáribèle, ki n yɛlɛ yaa lúro wolɛɛbèle ma. Ye myɛ ye màámi le yeyɛɛ na burogo, yáā bi kpéʔele yeyɛɛ ma, níì cán
«Bele be peyɛɛ nyɛ́nɛ lè,
Kolocɔlɔɔ i nyɛ nigooro na ní bele bee ní,
bele si be nyɛ lè,
màabyebèle, wi i nyɔɔgi bele bee na.»
6 #
Mat 23:12; Luk 14:11; 18:14 Gee bee na gi yɛlɛ yaa màama kpéʔele Kolocɔlɔɔ séekpɔɔw kɔ́lɔ láara ni, koro ga pye wi yele kpólo wi nyɛnɛ lǎli ni. 7Ye yele funjurugori kèlē myɛ le wi kɔ́yi ni, níì cán yele kéeli n kpɔ́ʔɔ wi ma.
8Ki n yɛlɛ ye yeyɛɛ cǒmi cán, yé kòro nyɛ̀nɛ na! Níì cán yele kàsiitun-nyɛ́nw wi lè Dàzɔɔnw, wi i nyaari ni máari àmɛɛ càaraɔ nyɛ, wee wi kaana lè, syɔ́ɔnwee wi a taa káa lè, wee bee wi caa. 9Ye tágali sámaga ye cò, yé yére ye tún ní wi ní, yé gi cán wɔʔɔyi bee wonijanya i kpéʔele yele senyɛnbèle na be nyɛ lè dulunyanw ni. 10Kolocɔlɔɔ wi lè kpɔ́ʔɔri myɛ kaanfɔlɔ, woro wee wi yele yeri lè koro ga pye yele í lɛɛlɛ taa wi kwɔ́ɔmɔ fun nijangbɔɔri ni Kirisi ni, yele ga wɔʔɔ n làla cɛɛri kwɔ́ɔ, wi tiimaa a yele sámaga foro, si nìrimɛ lége yele ni, si fànʔa kaan yele ma yele í sámaga yére. 11Woro na séekpɔɔw yɛlɛ làla o làla kwɔ́ɔmɔ fun! Amiina!
Fòosanw kéele
12 #
Kap 15:22,40 Silivɛn#5:12 Silivɛn: Pe wɔ́ɔ i Silivɛn mɛ́ɛgi yiri Silasi. wi nyɛ lè mii ma tágala senyɛnnɛ, woro wi mii dɛ̀ɛmɛ n syɛ́ɛnri naa cɛɛri sɛ́bɛ mii ma mii í di tórigo yele ma, jàngó bi lòmaana lége yele ni, si gi séeraw kpéʔele yele ma si jo: dee naa di nyɛ Kolocɔlɔɔ kpɔ́ʔɔri wodelere. Ye di sámaga ye cò.
13 #
Kap 12:12,25; 13:13; 15:37-39; Kɔl 4:10; Filip 1:24 Egiliziwee wi nyɛ lè Babilɔni ni, wee Kolocɔlɔɔ nyɛ́nɛ n wòlo àmɛɛ yele nyɛ lè, wi n yele syáanri yaà, a mii pìíw Mariki wɔ́ɔ̀ yele syáanri. 14Yaa yeyɛɛ syáanri, yáā yeyɛɛ syɔɔnri ní tàmaga ní.
Yele bele ye nyɛ lè Kirisi ni, ki n yɛlɛ Kolocɔlɔɔ í fûnnyingi kaan yele myɛ ma!
Currently Selected:
1 Pyɛri 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
