1 Pyɛri 3
3
Cébèle ní be nǎnbèle
1 #
Efɛz 5:22; Kɔl 3:18 Kánmi bee na, yele cébèle, ki n yɛlɛ yaa lúro yele nǎnbèle ma, jàngó yele wàa nàɔn ga pye wi ga fɔ̀lɔ bi yére Kolocɔlɔɔ syɛ́ɛnri ni í, wi céw nàʔama í pye sábabu wí taa syɔɔ, àlí syɛɛnrɛ sinjoo ni wi ma, 2níì cán wi a ra nàʔajǎnmi nyaagi, bee wi céw a ra náari lè ní fyáara ní. 3#1Tim 2:9 Yele fèredi ga yɛlɛ di pye céri wóro í, ti lè nyùnbwɔɔri, ní tɛ́ɛw lele, ní fànicànleri, 4kàjáa ki n yɛlɛ di pye fèrenaa-sìngalagira yele fúnyi ni làrama ni, ti lè màámi ní fûnnyingi. Dee bee di nyɛ Kolocɔlɔɔ má lɔgbanri yárira. 5Booma cecǎnbèle bele pe da be sɔ̀ngumi taʔa Kolocɔlɔɔ na lè, kánmi bee na bele bee da ni peyɛɛ vèré, pe maa ni lúro pe tiimaa nǎnbèle ma, 6#Sél 18:12 àmɛɛ Sara da ni lúro Abirahami ma lè ní i wi yiri woro kàfɔlɔ. Kapye yele i kacǎngèle kpéʔele, yele si o fɛ̀ɛgí yarigaa faala na í, ye gi cán yele n náà pye Sara pìibēle.
7 #
Efɛz 5:25; Kɔl 3:19 Kánmi bee na, yele nǎnbèle, yaa yele cébèle náari ní sícilimɛ ní, yé gi cán pe céri báriga n cɛ́rɛ yele wów na. Ki n yɛlɛ yaa be kpɔ́ʔɔgi, koro ga pye yafyɛn a kɔ́ yele nyɛ́ɛriyi yérige í, kpɔ́ʔɔri ti sìíw kaangi lè, pe wɔ́ɔ i nyɛ ní yele ní ti kɔriliinyɛ̀nnɛ.
Wɔʔɔli taala kacànbyeri kéele na
8Koro myɛ kàdoʔo ma ki n yɛlɛ ye myɛ sɔ̀ngurɔ í pye sèjira, yé pye fungo nibin na. Senyɛnnɛgi tàmaga n yɛlɛ gi pye yele ni, yáā nyinimɛ taagi yeyɛɛ na, yáā màama kpéʔele yeyɛɛ ma. 9Ki ga yɛlɛ yele í kapeelaa tɛ́ʔɛ bi làa fwɔ́ɔlɔ tɔ́n í, wàlá bi tɛʔɛlɛgaa tɛ́ʔɛ bi kàa fwɔ́ɔlɔ tɔ́n í. Fwɔɔ yaa dùba kpéʔele yeyɛɛ ma, níì cán gee bee gi nyɛ yele yerili nyúngo, koro ga pye yele í pye dùbaw kɔriliibéle. 10#Ŋún 34:13-17 «Wee wi ga ni caa bi sìicǎnw taa lè,
si wɔ́ɔ canjànya nyaa,
fwɔɔ waa wi nyínni kɔ̀rɔsíi syɛɛnpeeri joolo na,
jànvaa syɛ́ɛnrɛ si a wɔ́ɔ kɔ́ ra yirigi wi nyɔ́ɔgi ni í.
11Ki n yɛlɛ wi kàdoʔo wáa kapeebyeri ma,
wáā kacǎngèle kpéʔele,
wi kòro waa bɛ̀ɛ́li caa sìnlaʔa ni.
12Níì cán Kàfɔw nyɛ́nɛ i nyɛ syɛɛnsinbèle na.
Wi i wi líiyi cáan ni be nyɛ́ɛriyi lúro.
Kàjáa wi i kàdoʔo wáa kapeebyebèle ma.»
13Yele ga kacànbyeri cò ní lòmaana ní, wìí wi a too yele na bàā wɔʔɔ? 14#Mat 5:10; Eza 8:12-13 Alí ki ga wírè pye yele í da wɔʔɔ sínni kéele na, yele i nyɛ dùba pìibēle! Yele a kɔ́ ra fɛ̀ɛgí be syɛɛngbanri joolo na si yele fúnyi yaʔa yaa curugu yele na í. 15Kàjáa ki n yɛlɛ ye Kirisi yaʔa wi pye yele fúnyi kàrigafɔlɔ, yé pye wogboʔoro-yaʔabéle ní làla o làla, koro ga pye syɔɔn o syɔɔn wi yele yíbe yele sɔ̀ngumi tɛɛtaʔaga kéele na lè, yele í syɛɛnlurugoro taa kaan wi ma. 16Ki si n yɛlɛ yaa gee bee kpéʔele ní fûnnyinge, ní kpɔʔɔrɔ ní, yé pye funviire fɔ̀ɔlɔ, koro ga pye, àlí pe ga wíre ni yele mɛ́ɛpɛɛnyi yiri, ní i yele nàʔajǎnmi faari, bee yele náari Kirisi ni lè, fɛ̀ɛrɛ í be taa. 17Ki ga pye Kolocɔlɔɔ nyɛ́nɛ kéele yele í da wɔʔɔ kacànbyeri kéele na, gee bee n pɔ́rɔ kapeebyeri wɔʔɔlɔ na. 18Níì cán Kirisi tiimaa n kùu tɔlɔgɔ nibin pée kapeegèle kéele na, wozinw n baa kùu syɛɛnnaa-sìnzinbèle sìndɛʔɛ ni, koro ga pye bi yele taa tórigo Kolocɔlɔɔ ma. Pe n wi kpóo céri kàbaan na, kàjáa Kolocɔlɔɔ n wi nyán n wéege Pìicǎnni báriga ni. 19Pǐli bee ni wi wɔ́ɔ̀ kári n sáà joo pìígèle gele ma ge nyɛ lè kàsow ni. 20#Sél 6:1—7:24 Gee bee n jo booma nicéebèle pìigēle, bele be lè pe da ni lúro Kolocɔlɔɔ ma í, lǎli ni wi da ni be sige lè ní kpàracogo ní Nowe cányi ni, cányee ni wi da ni kɔ́rɔkpɔɔgi sámagi lè, syɛ̀ɛnnɛ cɛɛri pe da jée kɔ́rɔkpɔɔgi bee ni n syɔɔ lǒgi báriga ni, gee bee n jo syɛ̀ɛnnɛ kɔrɔtaanri. 21Gee fɛ̀ɛ lǒgi bee da tɛ̀ɛn lè, koro gi nyɛ batɛmiw, wee wi wɔ́ɔ̀ yele syɔɔ lè tɔ́ɔliw ni, wi o nyɛ bi fɔɔnrɔ láʔa céri na wii í, kàjáa wi i nyɛ bi yele fúnyi sámaga yi nyɔɔ Kolocɔlɔɔ ma, Zyezu Kirisi nyán-yirili báriga ni, 22woro wee wi kári nyɛ̀ʔɛni na lè, ní i yaà Kolocɔlɔɔ kàliige ma, a nyɛ̀ʔɛni tundunbéle, ní séekpɔɔw fɔ̀ɔlɔ, ní bárigaw fɔ̀ɔlɔ i lúro wi ma.
Currently Selected:
1 Pyɛri 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
