Isaías 61
61
Yixjwen wara Israelen
1Espíritu ke Xanllon surenen nada',
le le'en ba benee nada' xhirall,
ba bsele'e nada' chixjoera be'nn yiach ka' di'll wen ka',
gundipralla be'nn ka' zu yiachen,
chixjoera da wasra be'nn ka' lla' lo rill ya,
da wasra be'nn ka neij lo rill yan,
2na chixjoera yiz wen ke Xanllon,
llan keten Dios kellon
wazie'e wzon be'nn ka' llwiere lli'on.
Bsele'e nada' nench'na wayunxhena yoyte be'nn ka' zu yiachen,
3na wia be'nn Sión ka' zuyiachen
to corona loraz de dan noasj yichj aken,
to da la xhix nbaraz loraz da koell ake',
da gul ake' werao ake' loraz da su ake' dazed.
Ye ake' le ake' yay dan nzi robles da ba ben ga'n,
da guz Xanllon nench'na broere yelwak ke'en.
4Wayun ake' da gur ka' ba nyinjen,
walis ake' yo' xhen ka' blleyi batnate,
na wayunchaw ake' yell xhen ka' ba bayinjen.
5Be'nn zit ka' gap ake'
xhir ka, lix ka, na gan nazre yay uvas kere ka'.
6Na ye ake' re' bxus ke Xanllon,
be'nn wen llin ke Dios kello.
Sire banez yel wnia ke latj yell-liw ka' yela.
Na wllia yichjraw re' da nbaraz ke ake' ka'.
7Na kanake yell kian ba bxhakzin
chop kuenre bi got yel baran ke, na godyi aken
kelen'na si' latj yell-liw ke'en
chop kwenle yel wnian,
na da llzoa nbaraz ke chnare.
8Le Xanllon nlliere dan zajze lixhajen,
na llwiere yel wan, na dan llak xhian.
Le'en chixhje le ake' lixhaj kwis
na wchajlle'e di'll kone le ake' da sibia ke chnare.
9Xhi'nn xhasoa ake' ka' gak ake' be'nn se' ke radj latj yell-liw ka',
yoyte be'nn ka' re're le aken wazak akre le ake'
nak ake' to yell da ba benlay Xanllon.
10Llebraz llawera konen Xanllon
zoa nbaraz kwis konen Dios kian,
le ba bene'e nada' yel wasra ke'en,
le ba bchele'e nada' yel korchisen,
naka ka to be'nn biew le wchoynate, na llzoe corona ke'en
o cha ka to nor le wchoynate, na llia kwine yaj chao ake'.
11Le kan llrakse yix ka' raw yell-li'on
na lloj xlipe ka' gan lla' yej na yay xhix ka',
kaksen gun Xanllon nench'na wroerawe yel korchis ke'en,
na yoyte latj yell-liw ka' gul ake' da werao ake'.
Currently Selected:
Isaías 61: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
