Isaías 49
49
Be'nn wen llin ke Xanllon, beni ke yell xhen ka'
1Le wzenay kia, yell xhen lla' llwa nista'on,
le wzoa nayre, latj yell-liw lla' zit:
Xanllon guxhe'e nada' ka ze garjteza,
balwille nada' kan lian
kan ne' yoa lo le xnan.
2Bayune rullan ka to spad da latit,
bkoache nada' lo taken,
bayune nada' to xhis da latit,
na brochawe nada' gan llgochaw ake' xhis raw latit ka'.
3Gulle'e nada': Israel, rwen nako be'nn wen llin kia,
kone rwe' wroera yel wak kian.
4Na nada' ba bena xbab: Ba bena llin dadze,
ba benditjena yel ndiprall kian, na nike bi benza gan.
Axha daliyan dan llunan yon lo tak Xanllon,
na raxhjan zun raw yelwak ke Dios kian.
5Ba bxhia yel baran raw Xana Dios kian,
le le'en ba guk yel ndiprall kia.
Xanllon benee nada' lo le xna'tia
nench'na guka be'nn wen llin ke'e,
nench'na gunee ke Israelen, yell ke Jacoben,
wayechje na wadile le'e,
6ki nee:
ratze zaken gako be'nn wen llin kia
kanaken wayuno gan yell ka' nbanle Jacoben,
na dan watupo be'nn ka' ba bagan konen yel nban ke Israelen,
nada' guna nench'na gako to beni ke latj yell-liw ka',
nench'na lljuaw yel wasra kian
xte doxhente latj yell-liw ga nak zit.
7Xanllon, be'nn wasra,
Dios Xhirall ke Israelen,
lle'e yellen ba bxhakzin,
dan llwiere yell ka' yela,
dan ba ben xchin be'nn ka' llsakzin:
Ket be'nn wnebia ka', na ren be'nn braw ka' re akre rwe',
sulla ake', na wchekw yichj ake' keten re akre rwen,
le nadan, Xano, Dios Xhirall ke Israel,
biazralla rwe', na llalarawa ka da ka' ba bcheban.
Llixjwen wayakchao Jerusalén'na
8Xanllon nee:
Ke llan broera re' yel be'nn wen kian, na ballia xtillon,
bra lla ke yel wasran, na gukrena rwe'.
Nada' bkoeja rwe'
nench'na ni ko rwe' bchajlla di'll konen yellen,
nench'na bayakchao yell xhen'na,
nench'na si' ake' yell liw ka' ba blleyin,
9nench'na ye ake' be'nn ka' lla' lo rill yan: Wak wallojre,
na be'nn ka' lla' lo da xchulen: Le da raw benin.
Kwit tnez ka' wallelere yix ga,
na gateze zajzu ya' yu bill
gat da gaw bell kere ka'.
10Bi gakre win da yej gawre
nike wzeyze willen re', ni da zeyen,
le nadan nlliera re', na llwa re' nez,
na wchia re' ga llar nis.
11Wsarja nez radj ya' ka',
na guna nench'na wayak ba tnez ka'.
12Lewia, zit kwis zak ake':
bal ake' zak rale, bal ake' zak gan lloj willen,
na ye bal ake' latj yell-li'on gan nzi Asúan.
13Yeba, besia yel llawere.
Yell-liw bawere.
Ya' ake', le gusia yel llawere.
Le Xanllon ba bayunxhene yell ke'en,
ba bayachrallen rawe gan llalleyrawen'na.
14Sión'na ne:
Xanllon bsanlalle nada',
Dios kian gulalle nada'.
15Axha ¿To xnallo llalalle
o llsane bill nlliere xhi'nnen cha?
Axha le'en lakse galallebe,
nada' bi galalla rwe'.
16Nada' nda rwe' lo taka ka',
du tiemp yo' lo yichja ze war ka' nkoaj rwen.
17Be'nn ka' llayonchaw rwen zajze ake' rres
kerke be'nn ka' blleyi rwen;
ba zeyaj be'nn ka blleyi rwen.
18Balis ra'on, na bwia dan nechj rwen,
bwia kan lladup yoy akten,
na llayed ake' kwiton.
Nada' Xano llnia konen yel nban kian
ke yoy akte gak ake' ka yaj chao da gune'no llin,
ka' da llzoa to nor wchuyna.
19Latj yell-liw ko'on ba bayinjen,
ba blleyin, baganen to latj dach,
axha na' yell-liw ko'on
gaken da daoze ke be'nn yell ko'o ka'.
Be'nn ka' blleyi rwen, zit lla' ake'.
20Xhi'nno ka' llakro ba bniten
wne' akbe llwa nayon:
Latj yell-liw ni naken gazerawze da daoze ke neto',
ben to latj ga suto.
21Na rwe' new to lo yichjzo:
¿Nuxhan ba ben xhi'nna ki cha?
Nutno xhi'nna lla', nike llakze llzu akbe,
braj ake' nada' yell, na bzuteksa tuza,
¿nuxha baslliw le akbe?
Tuza bakoan ake',
¿gare za akbe cha?
22Xanllon nee: yepa latj yell-liw ka' bixhan gun ake',
guna to da re're yell ka'
zanielakteze xhi'nno bi biew ka' yedsan akebe,
na xhi'nno bi nor ka' yellia akebe xhichj ake' yedsan akebe.
23Be'nn wnebia ka' gak ake' ke to xa' ziw,
na bi nor weo xhi'nn be'nn wnebia ka', gap akbe xhi'nno ka'.
Llekw ake' llinte rawxga aken raw yu keten re akre rwen,
na wle ake' bichte ke niao ka'.
Na wazakro ke nadan naka Xano,
na be'nn ka' nxenlall nadan, bi si' ake' yelsdo.
24¿Wakrize waka ake' bida waka ake' raw be'nn waren
dan ba benee gan raw wdilen cha?
¿Gakrize waxhonj to be'nn yo' lo rill ya raw be'nn maren ngo le'e gana' cha?
25Xanllon nee awa:
Raw be'nn waren llaka ake' dan ba benee gan'na.
Na raw be'nn maren waka ake' dan ba benee gan'na.
Nada' gakdilrena be'nn ka' llenle tilren rwen,
nadaksa wasra xhi'nno ka'.
26Wchiera be'nn ka' llsakzi rwen gaw ake' ber ke ake' ka',
na sull akre konen xchen aken, na yej aken kan llaj ake' zu ke uva.
Na kone ka' yoyte be'nn nach nez akre
nadan, Xano, naka wasra ko'o,
nadan, be'nnen llwe yel wak ke Jacoben, naka wasra ko'o.
Currently Selected:
Isaías 49: ZPUPAT
Highlight
Share
Copy
Want to have your highlights saved across all your devices? Sign up or sign in
