Isaías 33
33
Diozen nse'e yel wasra
1Niachraz naken ko'o rwe', lleyiw na' bine' wlleyi ake' rwe',
lliayillo na nutno ne' wlliayill rwe'.
Ket ba bayull blleyiw, kena wlleyi ake' rwe',
ket ba bayull bayechjon, kena wayechj ake' rwe'.
2Xanto, bayachrall neto',
le rwen llbexhto.
Gukren neto' yeo zir,
na basra neto' ket de dazed keto.
3Keten llen akre llchebon llxhonjdo be'nn yell ka'
keten llroero yel wak ko'on, be'nn ka' lla' latj yell-liw ka' to llaslas akze,
4be'nn ka' llwiere le aken, sjanak ake' be'nn zan kwis kakse bich'soa,
llaj ake' gan lla' aken, na llka ake' yel wnia ke aken.
5Xanllon nake be'nn braw gazerawze, le le'en zoe le yeban,
le'en ba baslle Sión'na da nak dalixhaj, na yel korchis,
6na du tiemp gape'e le ake'.
Yel sin, na yel llajnien naken to yel wnia, da llasra;
dan gapllo baran Diozen naken to yel wnia.
7Le wzenay kan llusia be'nn war ka' raw nez ka',
na kan bell be'nn ka' llsel ake' nench llaj ake' llje ake' xtille nench'na cha ake' nbaraz.
8Nez ka' ndach akzen,
nutno danekse rawen.
Lluy di'll dan ba bchajlla aken, na dan ba biaj xtillen,
nutno llap baran loellj.
9Latj yell-li'on gan lla' aken zuyachen,
Líbanon ba llkoaden kanaken zin yelsdon,
rach gan nzi Sarón ba bayaken to latj dach yu bill,
Basán, na ya' Carmelon llibze nak aken.
10Xanllon nee:
Na' guna kan llenlan,
na' wroera yelwak kian, na yel ndiprall kian.
11Xbab kere ka' sjanaken yixh bebze;
na bich kian wlleyin le ake' ka to ga llde yi'.
12Yell ka' deze wayak aken,
ka yay yiech da ba noxhj galnin aken raw yi'.
13Re' llare' zit le wzenay ke da ka' ba benan,
na re' llare' gawchochze le wazake kan nak yelwak kian.
14Be'nn wenda xhinj ka' lla' Sión'na to xhistit ake',
na be'nn wednay ka' lleb ake' kwis, na ne ake':
¿Nuxha lliw gak suere su raw
to yi' llalnin, raw to yi' da llalnin ke chnare?
15Be'nnen llun dalixhaj, na llwe di'll dalixhaj,
be'nnen bi llak be'nn wnia kone dan ndiprallen,
na bi llwe latj gaw ake' le'e konen da we akze le'e,
be'nnen bi llune kan lle be'nn wenxhia ka' le'e,
na llchud yej rawe ka' nench'na bi re're damar ka',
16le'en bitbi da zed soe'e,
gat to da wkoej le'e ga zu yaj war ake',
du tiemp gat pan ke'e, na bi ake' win nis.
17Dayubre rero be'nn wnebian kone yel nbaraz ke'en,
gan zeraw nbanle latj yell-li'on llin akten zit kwis.
18Keten llajdinlallo ke cheben biow kan bzu'on, na ne'o:
¿Ganxha be'nn wachixhj ka'?
¿Ganxha be'nn ka' llix mell ka'?
¿Ganxha be'nn ka' llerab wdup ka' cha'?
19Bill suw radj yell gan lla' be'nn wednay ka',
gan llne'e ake' di'll dan nutno llajnie len,
gan llne'e ake' to di'll da llunchix nuteze.
20Lewia Sión'na, yell xhen'na gan llak lni' kello ka',
bayechj bwia Jerusalén'na, yell xhen dan bitbi dazed de rawen,
gaken ka' to yo' de rall da lli'lla war kwis,
na yay ka' sjanox len'na nutno gak walall len,
na nike chuyze du ka' nllajen'na.
21Gana' llroere Diozen yelwak ke'en kone lliw.
Naken to latj ga de yeo xhen ake', na sjanaken ray ake',
axha bi gak te' be'nn ka' llwieren
kone barkw xhen ke ake' ka'.
22-23Du ke barkw ka'
bi llak lloxen yay ke ka',
na rall ka' bi llak llirj aken.
Siꞌllo yel wnia xhen ke be'nn ka' llwiere lli'on,
na rente be'nn lchulen si rat ke'e,
na be'nn xhinj ka' koanren ake'.
Le Xanllon nake be'nn llun yel korchis kello,
be'nn llgu xneze kello ka', na nake be'nn llnebia lliw,
na le'e wasre'e lliw.
24Ni to be'nn ka' sjalla gana' ne' ake': Llaka yillwe.
Diozen wazixhene'e damar ke be'nn ka' lla' yell ke Sión'na.
Currently Selected:
Isaías 33: ZPUPAT
Highlight
Share
Copy
Want to have your highlights saved across all your devices? Sign up or sign in
