Isaías 26
26
Da llul ake' ket llun ake' ga'n
1Ke lla'na gul ake' dani raw yell-li'on nbane Judán:
Napto to yell xhen da nak war,
da wasra neto',
Xanton blise ze xhen ka, na ze da ka nak war da llkoaj.
2Le wsarj reij ka' nench'na te to latj yell-liw ga lla' be'nn llun dawen,
na sjanak ake' be'nn wen dalixhej.
3Xanto, rwen lluno nench'na nit ake' nbaraz, be'nn ka' zellaren xbab ke aken,
le ba nxenlall ake' rwen.
4Le wxenlall Xanllon du tiemp,
le le'en llkoaje'e lliw ke chnare.
5Le'en llaxhexje'e be'nn yarall ka,
na llsie'e sdo be'nn raxhdao sib ka' lla' yell xhen'na,
na llzale'e le ake' raw yu,
6nench'na be'nn nexj rall ka', na be'nn yiach ka'
wrajchekw ake' le ake' kone nia ake' ka'.
7Xnez be'nn wen ka' naken lixhej,
rwe', Xana, ll-lacho xnez aken.
8Xanto, neton llroeto nxenlallto rwe'
katen nawto llunto ka dan ba bdichjbiaon.
Raxhdaoton zerallen gunen xbab tuz rwe'.
9Lo yichj raxhdawan zerallen rwe' tllelen,
na du yich doralla llayirja rwe'.
Katen rwe' guno yelkorchisen raw yell-li'on,
be'nn nach ka' wsed ake' dan nak da lixhajen.
10Lakse wayachrallo be'nn mar ka',
le aken bi wsed ake', gak ake' be'nn wen dalixhaj,
sjanak ake' be'nn mar raw yell-liw ke be'nn de baran ka',
na bi llwia ake' kan nak ye zak xhen ke Xanllon.
11Xanto, rwen ba nuno xnid yel llsakzin
axha le aken bi llayakbe akre;
keten re akre yel nllie xhen ko'on konen yell ko'on
kena si' ake' yelsdo.
Chenaga yi' llalnin llruk ko'on cheben le ake'.
12Xanto, rwen lluno dawen keto,
daliyan, rwen
ba beno nench'na baguk yoyte da ka' benton.
13Xanto na Dios keto,
be'nn yub akre ba bnebia neto',
axha tuze rwe' llazaketo ka Xanto.
14Le aken ba gut ake', bi yeban ake' da yubre,
bxenzen nak ake', na bill wayas ake';
le ba bsakziw le ake', ba blleyiw le ake',
na nullno llajdinlallkse le ake'.
15Rwen ba beno nench'na blliw latj yell-li'on, Xanto;
bazlli'on nench'na broero yelwak ko'on,
bchirjo yell-liw gan nbane latj yell-li'on.
16Rawe gan llalleyrawton bayirjto rwe', Xanto,
na balwillto rwe' kan bsakziw neto'.
17Rawo rwe' bzeto Xanto,
ka to nor noa bdao
ba zu nez su xhi'nne,
na llchukwogen le'e, na llusie'e kanaken lleyllren.
18Bia xhi'nnto, na byeybrato ka to nor llzu xhi'nne
axha bxhanto da nak ka be.
Bi ne' yedwato yel wasran latj yell-li'on,
na nike garjze be'nn waslla yellen dayubre.
19Axha be'nn wat ko'o ka' gat yel nban ke ake' dayubre
kwerp ke be'nn wat ka' yeban aken.
Na be'nn ka' tas raw yell-li'on yeban ake',
na gusia ake' yawe akre.
Le rwe' llselo beni ko'on ke to bzan,
na be'nn wat ka' garj ake' dayubre raw yell-li'on
20Biaj, yell kia, byo lo yo' ko'on,
na ket ba byow loen bsej reij ko ka.
Bkoach chulldao, llinte lla ket ba bde yel llruk ke Xanllon.
21Le Xanllon lloje'e yo'rao ke'en
nench'na wsakzie'e daxhinj ka'
llun be'nn ka' lla' raw yell-li'on,
na yell-li'on bill wkoachen be'nn ka' ba bxhakzin
axha wroerawe ke xhia ka' ba guk rawen.
Currently Selected:
Isaías 26: ZPUPAT
Highlight
Share
Copy
Want to have your highlights saved across all your devices? Sign up or sign in
