Isaías 19

Kan Gak ke Egipton

1Diꞌll da ze gak ke Egipton:

Lewia Xanllon:

Ze'e Egipton lliate'e to raw bej da zaj rres.

To xhistit loe lsak ka' lla' Egipton,

na be'nn Egipto ka' to llcheben le ake'.

2Guna nench'na be'nn egipcios ka' gak ake' chopre, nee Xanllon

na tilren loellj ake':

be'nn zuren wen loellje, yell xhen kone yell xhen,

yell kone yell.

3Guna nench'na bi su lo yichj aken wen,

na bi gak kan ba nun ake' xbaben.

Na kena lljanab akre loe sak ka', na be'nn walla ka',

be'nn ka' ba gut, na be'nn waneya ka'.

4Axha nada' wzoa Egipton to be'nn wnebia le ake' be'nn nak be'nn zban,

to be'nn bi wayachrall wnebia le ake'.

Kan ba bnee Xanllon nap doxhente yelwaken.

5Nisen de yeo Nilon wayojen,

yeon wayechen,

6gan sjade xnez nis ka' wla aken sban.

Nis yeo ka' nbanle Egipton

wayojen choa choa, llinte ket wayechen,

ya xtir ka', na yix yixh ka' wkoad aken,

7na ya xtir ka' sjalla llwa yeo Nilon,

na da ka' nas ake' llwa yeon,

yech aken, na waran aken.

8Yoyte be'nn wxhen belya ka' yeo Nilon

gak akre kwis, na suyiach ake';

be'nn ka' llzal yixj bel ke ake' lo nisen gakyach akre.

9Be'nn wen llin ka' llbej du dan nzi lino suyiach ake',

na be'nn ka' llpa', na be'nn ka' lltix, na be'nn ka llab gakchix akre,

10be'nn ka' llunchaw rall ka' bill ndiprall ake',

na yoyte be'nn ka' llun llin kone niana ake' to gunchixzen le ake'.

11Bi llajniekseren be'nn llnebia Soan,

be'nn ka' nakll be'nn sin llgu xneze ke Egipton,

axha daliyan sjanak ake' be'nn bi llajnie.

¿Akre ke barazen ke aken lle ake' be'nnen llnebia Egipton:

Nakto xhi'nn xhasoa be'nn sin ake',

be'nn bnebia kan batnate?

12¿Ganxha be'nn sin ko'o ka' Faraón,

nench'na wzajnie akre rwe', na chixjoe akre rwe'

xbaben nap Xanllon nap doxhente yelwaken

dan llwie gunee ke Egipton cha?

13Be'nn ka' llnebia Soan'na sjanak ake' be'nn bi llajnie,

be'nn ka' llnebia gan nzi Menfis be ake' latj bxhiye ake' le ake',

na be'nn ka' llnebia yell dao ka'

ba bro ake' Egipton to nez xhinj.

14Xanllon ba bzoe'e kone le ake'

to espíritu da gunchixe le ake',

le aken llche ake' Egipton to nez da bi zaj lixhej

raw yoyte da llun Egipton,

ka to be'nn wazu llayebe, na llak yale'e.

15Na nutno, la naken yichj, cha xbane,

to yay palm o cha ya xtir,

gak akren Egipton.

16Ka lla'na be'nn egipcios ka' gun ake' ka nor ake', wcheben le ake' keten re akre Xanllon nap doxhente yelwaken llune xnid nench'na wsakzie le ake'. 17Be'nn egipcios ka' lleb ake' kwis keten re akre be'nn Judá ka', to llajdinlall akze re'en lleb ake' kwis ka xbab nxhullraz ka' llwie Xanllon nap doxhente yelwaken gunee ke Egipton. 18Ka lla'na, gay yell xhen ke Egipton wne' ake' diꞌll hebreo, na wcheb ake' gun ake' dalixhaj konen Xanllon nap doxhente yelwaken. To yell xhen'na wsi aken yell xhen ke will.

19Ka lla'na gun ake' to raw bkuy ga werao ake' Xanllon radj latj gan nbanle Egipton, na gawchochze gan zeraw nbanlen wlis ake' to yaj da gap ake' baran Xanllon. 20Gaken to sen, nench'na llajdinlall ake' Xanllon nap doxhente yelwaken yell Egipton. Katen gusia ake' raw Xanllon wnab ake' gukre nench wayechj ake' be'nn ka' llsakzi le aken, le'en wsele'e to be'nn wasra le ake', nench'na gakrene le ake', na wasre'e le ake'. 21Xanllon wroerawe be'nn egipcios ka', na le aken wayunbie akre Xanllon, na werao ake' le'e, na gut ake' bayix, na we ake' da wazarall ake' le'e. Wcheb ake' da gun ake' ke Xanllon, na walaraw akten. 22Xanllon gunee we Egipton, axha ket ba bdena gunten xmell. Le aken wazeren ake' Xanllon, na le'en wayachralle le ake', na gunee le ake' xmell.

23Ka lla'na gat to nez xhen da suraw Egipton, na llinten Asirian. Be'nn asirios ka' gak llin ake' Egipton, na be'nn Egipto ka' gak llin ake' Asirian, na be'nn egipcios ka', na ren be'nn asirios ka' gak ake' txhen nench'na werao ake' Xanllon.

24Ka lla'na Israelen wayak ake' txhen kone Egipton, na Asirian, na gaken to yel nak lay radj yell-li'on. 25Xanllon nap doxhente yelwaken gonlaye le ake', na ne'e: Nada' llunlaya Egipton, yell kian, na Asiria, da benchawa kone taka, na Israelen naken da nbanla.

Currently Selected:

Isaías 19: ZPUPAT

Highlight

Copy