Zacarias 9
9
Ja Dyosi, yala mi lek ja jas wa'n sk'u'lajel ja swinkil ja niwak chonab' jumasa
1-2Ja Dyosi, wan sk'eljel spetsanil chikan jas tik'e kristyano'il. Ja'yuj yala jani, mi lek ja jas wa'n sk'u'lajel ja swinkil ja chonab' jumasa b'a Hadrac sok b'a Damasco, cho jach'ni, ja k'ole jumasa yuj ja israelenio, ja chonab' Hamat it mojan yi'oji, sok ja niwak chonab' jumasa it jel xa tojb'el jastal b'a Tiro sok b'a Sidoni:
3—Ja chonab' Tiro jel xa riko
ja oro sok ja sakal tak'in jach' wax yilawe jastal ts'ub'il lu'um ti monton b'a kaye.
B'a makan lek oj ajyuki,
sk'u'lan niwak ts'akab' ton jumasa;
4jaxa Dyosi, oj sjapyi ja sriko'il jumasa jawi
ti oj ch'ak sjip man yoj mar,
jaxa swinkil ja chonab'i, oj ch'ak stsik.
5—Ja swinikil ja chonab' Ascaloni
yaj nix yilawe ja jastal iti,
oj a'ji k'itk'unuke yuj ja xiweli,
jaxa b'a chonab' jawi,
mi ma' oj kan altiro;
Jas winikil jumasa ja chonab' Gaza
jel oj yi'e wokol yuj ja oj ch'ay sna'jel ja smandaranume'i,
cho jach'ni ja swinkil jumasa ja chonab' Ecroni
oj yi'e wokol yuj ja oj ch'ayuk ja ma sniwan k'ujole'i.
6-7Ja b'a schonab'il ja filisteo jumasa b'a Asdodi
sokan oj ajyuk sok ja ma'tik jel kistal ja jastali sok ja ma'tik jel kalaxi,
ja skontra'e jumasa, xe'ntiyaman wax ya'we kani.
Jaxa ke'n oj ni jkolta ja ma' wa sk'ana oj smile'i.
—Jach' mi jas oj ka sk'u'luke ja tantik kalax filisteo jumasa—
—Jaxa tuki, oj ni ka'kan sak'ana,
jach' jastal kan ja jebuseo jumasa ja mas b'ajtani,
sok jel niwan ja ya'tele b'a chonab' Juda.
8Mini nunka oj cho ka' permiso
oj jak swinkil b'a otro niwak chonab' jumasa b'a oj jak nol k'ab'ijuke yuj ja,
pwes yujni ke'n mismo oj k'el ja snajtsil ja jtsomjela.
Ja jastal k'ot ja mandaranum b'a Jerusaleni
9—Gusto ajyan, swinkil ja tsamal chonab' Jerusalen—
—Ja wa mandaranum jakumxa a mok,
kajan jun yal burro oj jakuk—
jel jun k'ujol sok jel toj,
jakum b'a oj jak ya'a k'ul ganar.
10Oj sch'ak sna'jel spetsanil ja tujk'anub' jumasa b'a tiro'aneli
b'a spetsanil ja soldado jumasa yi'oj ja israelenio oj ch'ay sna'jel;
oj yal laman lek oj ajyuk spetsanil ja swinkil ja niwak chonab' jumasa,
sok oj sk'u'l mandar b'a jun sti' ja mari,
asta man b'a otro sti',
—Man b'a niwan ja' Eufrates sok man b'a stik'anal ja lu'umi—
Ja Dyosi, oj ya' ajk'achb'uk ja smodo ja schonab'ili
11—Ke'n ka'a jun jtrato amok,
ja trato jawi, sok chik', jk'u'lan seyar;
ja'yuj oj b'ob' kolta ja wa preso'anum jumasa
ja it ti aye b'a jun takin k'e'en ja juts'in,
12Yaj nix waj kumxuke'i, ay lek sniwanil sk'ujole
sok ja chonab' jumasa jawi,
lajan sok lek yipe sok.
Ta yuj k'a wa'ne yi'jel wokol juts'in,
ke'n wax kala ja juts'in, ja k'ak'u jawi
chab' majke mas jel gusto oj ka ajyuke.
13—Ja griego jumasa ma' ti sokan aye sok judio
sok ja israelenio jumasa oj ni jch'ak sna'jele'a.
14Yaj nix waj k'u'l mandar oj nol k'ab'ijuke'i,
ja spulte'e jumasa lajan jastal ja tsansewali;
sok tini oj b'ejyukon soke'a pero mini t'un lek oj kil'e'a
jak' jastal jun tsatsal ik' b'a takin lu'um k'inal.
15—Ke'n mismo oj talna ja jchonab'il jumasa;
jach'ni ja ye'nle'i, oj sch'ay'e sna'jel ja stujk'anub'e ja kontra jumasa,
oj sk'u'luke jun niwan wa'el
sok jun sk'inil yuj ja sk'u'lane ganari.
Oj och yu'e' ya'lel ts'usub' asta man oj yakb'uke lek;
oj sb'ut' lek ya'lel ts'usub' ja sb'ise'i,
jach' jastal wax b'ut'xi chik' ja niwak tasa jumasa
it wax pek'xi b'a sat altari.
16—Yaj nix k'ot ja k'ak'u jawi,
ke'n oj kolta ja jchonab'il
jach' jastal wa skoltan ja schej ja talna cheji;
jaxa yajni ti'xa aye b'a slu'ume'i,
oj lijpuke jastal wax lijpi ja oro b'a jun korona.
17—Jel tsamal oj ilxuk
ja keremtik sok ja ak'ixuk jumasa
gusto lek sok tsats lek oj ajyuk yuj ja maklanub'ale leki—
Currently Selected:
Zacarias 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
