Zacarias 2
2
Ja winik ma' sb'isa ja chonab' Jerusaleni
1Ti choj jacha ja sat otro majke, ja b'a sti jsati, ti kila jun winik yaman yuj jun metro b'a wax makuni b'a sb'isjel sok kosa jumasa. 2Ti job'o yi b'a wajuma, ti yala kab'a: —Ja wajum jb'is ja chonab' Jerusaleni. Wax k'ana oj na' janek' yi'oj jas najtil sok ja sati—.
3Ja winik jawi jun anjel, jaxa yajni ojxa wajuki; ti cho jak otro anjel jak ta'juk yuj 4ti alji yab' yal kab' ja lo'il iti:
—Ja b'a chonab' Jerusaleni
jel jitsan ja swinkil jumasa jach'ni ja wakaxi, jel jitsan yi'oje
cho mey sts'akab' tonil.
5Ke'n oj makunukon ja b'a jchonab'il
jastal ts'akab' ton b'aj toj k'ak';
—Ke'n oj ka k'e'uke riko'il—
Ke'n Dyos yujon ja israelenio,
ja jas wax kala yujni jach' oj k'u'luka.
6-7Ke'n ja ch'ak nuts e el
b'a spetsanil ja niwak chonab' jumasa,
jaxa ya'n wax kala mas lek
ojxa ch'ak eluke b'a Babilonia
sok ti'xa oj kumxuke b'a Jerusalen;
—Elanik xa ja b'a chonab' jaw it tey b'a k'e'el k'inali—
Ke'n ja Dyoson ja israelenio,
ja jas wax kala wabyexi,
yujni jach' oj ja k'u'lukexa—.
8-9Ja Dyos it jel ja yipi, sjekawon b'a oj waj jlok ab'al ja swinkil ja niwak chonab' jumasa ch'ak yelk'ane spetsanil ja jastik jumasa b'a chonab' Jerusaleni. Jach' wax yala jastal it ja Dyosi:
—Ke'n oj ka stup ja smul spetsanil ja swinkil ja niwak chonab' jumasa
yuj ja lom jel ya'we yi' wokol ja kuntikil jumasa.
Ja ma' wax ya'yi wokol ja jchonab'il jumasa
cho jach'ni ja ke'n ojni kayi' wokola.
—Ke'n mismo oj ka libre ja smoso'e jumasa
b'a oj ch'a elk'ajuk yi'e spetsanil ja jastik yi'oje'i—
Yajnix waj ek'uk ja jastal iti, ti oj jak sk'ujol ja swinkil ja niwak chonab' jumasa ye'n ja Dyos it jel ja yip sjeka ma' oj waj le'juk smule yuj. Ti yala ja ye'n:
10—Awananik yuj wa gusto'ex,
swinkil chonab' Jerusalen,
porke ti oj ajyukon amokexa—
Ke'n Dyoson ja israelenio,
ja jas wax kala yujni jach' oj k'u'luka.
11—Yajnix k'ot ja k'ak'u jawi,
jel jitsan ja swinkil ja niwak chonab' jumasa oj snoch'oni.
Jaxa ke'n tini oj ajyukon soke'a,
sok oj ni ochuke mero chonab'ila—.
Yajnix ek' ja jastal iti, ti oj jak a k'ujolex yuj ye'n sjekawon ja Dyos it jel ja yip b'a oj jak kala wabyex ja lo'il iti. 12Ja'yuj ja swinkil ja chonab' Juda oj ni cho sb'ajuk ja jDyostika, jaxa chonab' Jerusaleni, oj cho sutxuk ja'ni schonab'il stsa'ub'ala.
13Ja jDyostiki elta ja b'a
snaj it mi kwalkyera'uki;
—Ja b'a stij sati, mok ma k'umanuk—
Currently Selected:
Zacarias 2: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
