Romanos 9

Ja yuntikil ja Dyosi

1Ja ke'n wax k'u'an ja Jesusi, ja'yuj wax kala ja smeranili. Yujni ye'n wa sje'a ki ja Espiritu Santo, man b'a jk'ujol wax yaj na' ke mi wa'nukon sle'jel ab'al. 2Ja smeranili jelni ch'am k'ujol ayona, lajan sok wa syats'a sb'aj wax kab' ja kaltsili. 3Wa'non yi'jel wokol yuj ja judio jumasa, yujni ja jmoj jumasa'a, sok wanikex k'ana oj koltaye. Ja ke'n chapan ayon a'nima ti mix yilawon lek ja Dyosi, ma' ti' la kanyon pilan sok ja Jesusi, ta yuj k'a jach' wax b'ob' koltajuke b'a oj ochuke mojan sok ja Dyos ja ye'nle'i. 4Ye'nle ja ma tsa'ub'ale'xa yuj ja Dyosi. Ye'nle' ja alji yabye yuj ja Dyos och ye'ta yuntikilil. Ja Dyosi, tini ajyi soke'a, je'ji yi'e jastal jel niwan ja yipi. Ya'a strato sok ja ye'nle'i, cho ya' yi'e ja smandari. Sje'a yi'e jastal oj toyjuk smeranil, cho yala ay jas oj ya'. 5Ja ye'nle'i, ti'xani aye sok ja yuntikil ja Dyosi. Jaxa Mesiasi, jach'ni jastal jun winika, cho ti'ni ay sok ja yuntikil ja Dyosi. Ye'n wa sk'ela spetsanil ja jastik jumasa, cho Dyosni ja ye'na. —Spetsanil k'ak'u toyob'al ja Dyosi—. Jach'ni'a.

6Mi wa'nukon yaljel mi yuj sk'u'lan ja Dyos ja jas yalunej yab' ja israelenio jumasa. Mi spetsaniluk ja ma'tik ti aye sok ja israelenio yujni israelenio'e'a, 7Cho mi spetsaniluk ja yintil jumasa ja Abraham yintilukotik ye'n meran. Yuj ja jach' alub'al yab' jastal it yuj ja Dyosi: —Ja wa wintil jumasa we'n ye'n oj ya pojxuk ja Isaaki. 8-9Ja iti, wa sk'ana yal mini jun ma yuntikil Dyos ta yuj k'a kechan yuj ja jnan jtatiki. Ja jachuki, miyuk, ja ma'tik yuntikil ja Abrahami, ja'ni sok spetsanil ja yintil jumasa ja Isaaki. Yuj ja ye'n manxi ja Isaak b'a oj k'ot smeranil ja jas alji yab' ja Abraham yuj ja Dyosi: —B'a yojol jun jab'il ti oj cho jakona, jaxa Sara ja k'ak'u jawi, ayxani yi'oj jun yal skerema, x'utji ja Abrahami.

10-12Ja jawi, mi ja'uk spetsanil. Ja chab' yuntikil ja Rebeca, ja' sb'aj ajyi ja Isaak ja ma' ek' paxta kujtikoni, jaxa Dyosi kechan june stsa'a b'a oj och kwenta sok ja yuntikil jumasa. Ja yajni mitox manxiye ja chab' yal alats jawi, mitoni jas wa sk'u'lane'a, mini b'a lek sok mini b'a mi lekuk. B'a' ja wila ja Dyosi, ti yal yab' ja Rebeca ja b'ankilali, ja oj ya'telta ja ijts'inali. Sok ja jastal iti, ti sje'a ja Dyos ye'n wa stsa'a ja ma wa sk'ana, ja'ni jastal wa sk'ana. Ja'yuj ja ma wa stsa'a ja Dyosi, mi ja'uk yuj ja jas wax k'u'lantiki. 13Jach'ni wax yala jastal it ja b'a ts'ijb'anub'al ja yab'al ja Dyosi: —Ja' mas wa sk'ana ja Jacob yuj ja Esauji.

14¿Ja'ma yuj ja jaw ja ti oj kaltik ke mi tojuk ja jas wa sk'u'lan ja Dyosi? —Miyuk— 15Ja Dyosi, jach' yala yab' jastal it ja Moisesi: —Ja k'en wax talna sya'ujlal ja ma wax kana—. 16Ja'yuj ja ma wa stsa'a ja Dyosi, mi ja'uk ja ma wa sk'ana oj tsa'juki, ma ja ma wa sk'ana oj tsa'juki ja mero ye'n wa sna'a ja Dyos ja ma wa stalna sya'ujlali.

17Ja b'a ts'ijb'anub'al ja yab'al ja Dyosi, jach' wax yal yab' jastal it ja ma' ay ya'tel b'a Egipto: —Ka ochan mandaranumil, Ja b'a oj je'a wi ja Kipi, sok spetsanil ja jas ojto k'u'luk a wi'i, ja'ni b'a oj sna'e jb'aj spetsanil ja kristyano jumasa b'a lu'umi. 18Ja'yuj, ja'ni chikan ja jas wa sk'ana oj sk'u'luk ja Dyosi: Ja ma wa sk'ana ja ye'n lekni wax yila'a, jaxa ma mi lek wax yila, ye'n wax cho ya ch'u'uy b'uk yi lek ja sk'ujoli.

Ja tajkeli sok ja syajal sk'ujol ja Dyosi

19Ta ay k'a ma wax yala kab'i: ¿Jasun oj yal jb'ajtik ja Dyosi, mini ma jas oj b'ob' yal, sok ja jas wa sk'ana oj k'u'luk tak?, 20Jaxa ke'n ti oj kal jachuka: —Kamigo jasun kiluka ja we'n, ja we'n oj a wal mi lekuk ja jas wa sk'ana oj sk'u'luk ja Dyosi—. Ja oxomi, mi oj b'ob' yal mi lek tojb'esji yuj ja ma k'u'laji yuji, ja'ni ja jastal tojb'esji. 21Ja k'ula oxomi, oj b'ob' sk'u'l yi ja lokok ja jas wa sk'ana oj sk'u'l yi'i. Sok ja mismo lu'um jawi, oj b'ob' sk'u'l sok jun oxom b'a ja ita oj makunuk ja b'a k'ak'u jumasa ja b'a mas niwani, cho ojni b'ob' sk'ul pilan b'a kada k'ak'u oj makunuki.

22Ja iti, oj slaj ja jastal sk'u'lan ja Dyosi, ja' wa sk'ana yal sok jun senya lo'il ja wokoli, b'a jach' oj sna' spetsanil ja kristyano jumasa ja yipi. Ja'yuj jel stek'a ja ma'tik oj yi' wokol ajyi, sok ja ma'tik oj ch'ay sna'jele'i. 23Ja mismo k'ak'u jawi, sje'a ja syajal sk'ujol sok ja yip b'a oj b'ob' skoltayotiki. Man najate stalna ni jya'ujlaltika, sok stsa'awotik b'a oj ajyukotik sok ja ye'n. 24Ja ye'n me' sk'ela ta yuj judio'otik, ma yuj miyuk. 25Jach' jastal wax yala ja Dyos b'a sju'un ja aluman Dyos Oseasi:

—Ja kristyano b'a mi jb'ajuk ke'ni,

oj kal kuntikile,

ja kristyano b'a mix yajtani,

oj je'yi'e ja syajal jk'ujoli.

26—Ti oj kal yabye tiw:

—Ja we'nlexi mi kuntikilukex,

Ti oj cho kal yabye'a:

Ja we'nlexi, kuntikilexni'a,

yuj ja ke'n ja Dyos it wax ka'a wa sak'anilexi—.

27Mi kechanuka, ja aluman Dyos Isaiasi, yala yuj ja israelenio jumasa:

—Ja israelenio jumasa,

a'nima jel jitsanuke

jastal ja jijkab' b'a sti' ja'i,

kechan chab' oxe oj sta ja skoltajele'.

28Spetsanil ja swinkil ja lu'um iti

jelxa mojan ja k'ak'u oj aljuk ja smule yuj ja Tatali.

29Cho ye'na ni, ja Isaias yala ja jastal iti:

—Mokxta yuj Ye'nuk ja Dyos it kechan ye'n jel ja yipi

mi oj b'ob' koltaxuk yuj chab' oxuk,

man ya'n jach' aytik

jastal waj ja chonab' jumasa b'a Sodoma sok ja b'a Gomorra.

Ja israelenio sok ja Jesusi

30¿Jasunka oj b'ob' kali? Ja kristyano jumasa b'a tuktukil chonab'i, a'nima mi ja swa'ne sk'u'lajel jan b'a oj i'juke lek yuj ja Dyosi, jelni lek iljiye yuj ja Dyos yuj ja sk'u'ane'i. 31Jaxa israelenio jumasa jipjiye kan yuj ja ja'to wa sle'awe jastal oj sk'u'uke ja mandar it a'ji yi ja Moisesi, ja ye'nle'i wax yalawe yuj jach' oj iljuke lek yuj ja Dyosi. 32¿Jasyuj ja mi iljiye lek yuj ja Dyos b'a? Ja'yuj ja kechan wa sk'anawe oj iljuke lek yuj, ja jas wa sk'u'lane'i, mi ja'uk yuj ja wa sk'u'ane kechan ja ye'ni. Ja'yuj ja Jesusi, kechan ita makuni yujile jastal jun ton b'a oj spak' tsuk sb'aje sok. 33Ja b'a yab'al ja Dyosi, jach' wax yala jastal iti:

—Ke'n ti' oj ka' b'a Jerusalen

ja ton, it jel jitsan ma oj spak' tsuk sb'aje soki,

najato oj ch'ak wajuke pok'an.

Ja Dyosi, mi oj ya' sta' k'ixwel.

Ja ma'tik wax k'u'aji yuj ja ye'n—.

Currently Selected:

Romanos 9: YABD

Highlight

Copy