YouVersion Logo
Search Icon

Romanos 6

6
Sak'an aytik sts'akatal ja Jesusi
1¿Jasunk'a oj kaltiki? ¿Oj ma k'ultik seguir sle'jel ja jmultik b'a ti oj syatayotik ja Dyosi? 2—Mixani sb'ejuka. Ja ke'ntiki mixa sb'ejuk oj ch'ik jb'ajtik sok ja mulali, ja'yuj mixa sb'ejuk jelto oj le'tik ja jmultiki. 3Ja we'nlexi waxa na'awex lek, ja yajni ki'ajtik ja'i, ti jmojan jb'ajtik sok ja Kajwaltik Jesusi, lajan sok chamtik jastal cham ja ye'ni. 4Yuj ja ki'ajtik ja'i, lajan sok chamtik, wajtik mukan sok lajan; Jayuj chamtik b'a oj manxukotik sok jun yajk'achil sak'aniltik, tuk sok ja jastal ajyitiki jach' mismo ek' jastal jaw ja Jesús ja yajni a'ji sak'wuk yuj ja Tatal Dyosi.
5Ta yuj k'a lajan sok chamtik, jastal cham ja Kajwaltik Jesús ja yajni ki'ajtik ja'i', cho jach'ni ja jastal sak'wi lajan sok cho sak'witik ja ke'ntiki. 6Jun cosa wax na'atik lek: Ja ajyi mulanumotik ni'a, jaxa yajni cham ja Kajwaltik Jesús b'a cruzi, lajan sok chamtik sok lajan. Ja'yuj ja mulali mixa wa st'enawotik. 7Ja yajni wala chamtiki, mixa ni ma wa sna'a ta oj to sle' smula.
8Merani'a, ta yuj k'a lajan sok chamtik jastal cham ja Kajwaltik Jesús ja k'ak'u ki'ajtik ja'i, ayxani sniwanil jk'ujoltik ti oj ajyukotik soka. 9Wax na'atik ja Jesusi sak'wi, sok mixani oj cham pilan majke'a, ja chamel ch'akeli, mixani ay yip sok ja ye'na. 10Ja yajni cham ja Jesusi, ti ch'ak spetsanil ja yip ja mulal sok ja ye'ni, jaxa sak'anil yi'oj ja ya'n, ja b'a oj ya'yi ts'akatal ja Dyosi.
11Cho jach'ni ja we'nlexi, mixani ay yip ja mulal a mokexa, yuj ja ye'n ja Kajwaltik Jesús ja ma ya'ta jun yajk'achil ja wa sak'anilexi, ja'yuj ja ya'n sb'ej oj a toy'ex ja Dyosi. 12Mixa sb'ejuk ye'n ja mulal oj yal ja jas oj ja k'ulukexi, sok mixani ja jas mi lekuk wa sk'ana oj sk'u'luk jawa kwerpo'exi. 13Ja we'nlexi lajan sok chamyexta yuj ja mulali, ja ya'n lajan sok cho sak'wiyexta. Ja'yuj mokxa a wa'ab'ajex b'a ye'n oj yal oj ja k'ulukex ja jas mi leki, b'a oj ja wa'ab'ajex sok ja Dyosi cho k'u'lanik ja jas lek wa xyila ja ye'ni. 14Jachuk ja mulali mixa oj ajyuk yip sok ja we'nlexi, yuj ja mixa moso ayukex yuja mandari. Ja yani jaxa wa'nex ya'tel tajel ja syajal sk'ujol ja Dyosi.
Ja ya'tel tajel ja Dyosi
15Ay ma' oj b'ob' yale, yuj ja mixa yib' k'ab'al aytik yuj ja smandar ja Moisesi, ti'xani wa'notik a'tel ja b'a syajal sk'ujol ja Dyosi ja'yuj ojni b'ob' jle'tik ja multika. Ja jachuki mini sb'ejuka. 16Ja we'nlexi waxa na'awex, ja waxa k'u'anex ja jas wax yala ja winiki, wani la ochyex ya'tijumexa. Jaxa ke'ntiki, oj ma b'ob' le'tik pilan majke ja jmultik b'a oj ch'ay jna'jetiki, ma ja oj k'u'utik ja jas wax yala ja Dyos b'a oj ta'tik ja koltajeltiki. 17Ja we'nlexi, moso ajyiyex yuj ja mulali. Yuj ja sts'akatal ja Dyos a k'u'anex sok spetsanil a k'ujolex ja jas je'awi'exi. 18Ja'yuj ja ya'n, elyexta ja b'a sk'ab ja mulali, ti'xa wa'nex ya'tel tajel ja Dyos b'a oj a k'ulukex ja b'a leki.
19Ja we'nlexi jelto wokol waxa wabyex sb'ej ja iti, ja'yuj jel lek oj le' jastal oj kal a wabyex b'a oj a wabyex lek sb'ej. Ja ajyi yib' k'ab'al ajyiyex yuj ja mulali, yuj ja waxa wa'wex yi ja wa kwerpo'ex b'a waxa wi' ab'ajex sok pilan ixuk, sok spetsanil ja tuktukil mulal jumasa. Jaxa ya'n a'a b'ajik b'a oj ja wa'teltayex ja Dyosi.
20Ja yora moso ajyiyex yuja mulali, ja jas wax yala ja Dyosi mini xa kisawexa. 21¿Jasunk'a lek a ta'awexi? jel k'ixwela sb'aj yuj ja pilan ayex sok ja Dyosi. 22Ja ya'n mixa moso ayukex yuja ja mulali. Ja'xa ya'tijumex ja Dyosi. Ja jastal jawi jelni lek, ta kechan k'a ja wajel jk'ujoltik oj ka'tel tatik ja Dyosi mini ch'ayeluka ojni ya' ki'tik ja jsak'aniltik b'a mi ni oj ch'akuki. 23Ja ma kechan wajel sk'ujol sle'jel ja smuli, ja'ni sts'akol ja oj chamuk ja yaltsili. Ja Dyosi wa sk'eb'a ki'tik ja jsak'aniltik b'a mini oj ch'akuki, yuj ja wax k'u'antik ja Kajwaltik Jesusi.

Currently Selected:

Romanos 6: YABD

Highlight

Share

Copy

None

Want to have your highlights saved across all your devices? Sign up or sign in