Romanos 1

Ja Pablo sjeka spatulab'il sk'ujol ja kermanotik jumasa b'a Roma

1Jmoj aljel jumasa b'a Roma:

Ja ke'n ya'tijumon sok sjekab'anumon ja Kajwaltik Jesusi, yujni ye'n stsa'awon ja Dyos b'a oj waj kal ek' ja ab'al it jel tsamal ye'n yi'oj b'a jb'aj ke'ntiki. 2-4Ja Dyosi, yaloj oj sjeki'tik ja yunini. Jach' yalunej jas aluman Dyos jumasa, ja b'a ts'ijb'anub'al ja yab'al ja Dyosi.

Ja b'a ts'ijb'anub'al ja yab'al ja Dyosi, wax yala ja yunin Jesusi, jak b'a yintil ja mandaranum Davidi. Ja Jesusi, chami, jaxa Dyosi ya sak'wuk sok ja yip ja Espiritu Santo, sok ja jawi, ti sje'a ke jel ja yip ja yunin ja Dyosi.

5Ja Jesusi, sje'a ki ja syajal sk'ujoli, sok stsa'awon b'a oj ka'telta jastal sjekab'anumil, wa sk'ana ke b'a spetsanil ja swinkil ja sutanal ja lu'um oj k'u'ajuk yuj ja ye'n.

6Jaxa we'nlex swinkil Roma, a k'u'anexta chab' oxe ja Kajwaltik Jesusi. 7Jel yaj sk'ujolex ja Dyosi, cho spilawexta b'a oj ajyanik sok ja yuntikili. Wax k'ana yi ja Jtatiki, sok ja Kajwaltik Jesusi, jach'ni ja ye'nle'i, a sje'a wi'ex ja syajal k'ujole b'a laman oj ajyaniki.

Ja Pablo jel wax ya' yi ts'akatal ja Dyosi

8B'ajtan, wax ka'yi ts'akatal ja Dyos b'a kada jujune ja we'nlex b'a sb'i'il ja Kajwaltik Jesusi. B'a spetsanil ja chonab' jumasa jel lek wala ta'jiyex ti' ja we'nlexi, cho wanix na'xi ja' niwan a k'ujolex ja Dyosi, sok wanixa k'u'anexa.

9Ja ke'n ja jchol wax kala ek' ja ab'al it jel tsamal wax yala yuj ja yunin ja Dyosi, wax k'u'lan sok spetsanil jk'ujol. Dyosni wa sna'a spetsanil k'ak'u wax k'uman ja Dyos yuj ja we'nlexi, 10cho wa'non sk'an jel yi, b'a jastal oj waj b'ob' kulatayex ta yuj k'a jach' wa sk'ana ja ye'n. 11Jel wax k'ana oj waj kil'ex b'a oj koltayex sok ja jas wa sk'ana ja Espiritu Santo. Sok jach' oj ajyuk niwanil a k'ujolex sok ja Dyosi, 12sok ojni b'ob' jkolta jb'ajtikika, sts'akatal ja yip ja sniwanil jk'ujoltik sok ja Dyosi.

13Jmoj aljel jumasa yuj ja Kajwaltik Jesusi, wax k'ana oj a na'ex, jitsan majke wax le'a jastal oj wajkon b'a Roma b'a oj waj kil'ex, ti'xta wax sje'a sb'aj jas wax smakawona, jachuk mix b'ob' wajkon. Wax k'ana oj wajkon ja tiwi, b'a oj waj kal ja tsamal ab'ali, jach'ni jastal jk'u'lanta b'a tuk chonab' jumasa, b'a jach' jitsan ja ma oj sk'u'uk ja Kajwaltik Jesusi. 14-15Jel t'ilan oj kal ek' ja tsamal ab'al it b'a spetsanil ja chonab' jumasa b'a lu'um iti, mi t'ilanuk ta jel wa sna'a ma mi ja sna'a, ma jel ajula sb'aj, ma jel niwan wax ya'a sb'aj ja ye'n. Ja'yuj mas lek oj wajkon ja b'a Roma.

Ja yab'al ja Dyosi, jel ja yipi

16Mix ya'ki k'ixwel oj kal ja ab'al it jel tsamali. Sts'akatal ja yip ja Dyosi, spetsanil ja ma wa smakla, sok wa sk'u'an ja Jesusi, sta'atani ja skoltajele'a; A'nima judio ma mi judio'uk. 17Ja tsamal ab'ali, wax yala kab'tik lek wax yi'aj ja Dyos ja ma wa sk'u'an ja Jesusi. Jach'ni wax yala ja b'a ts'ijb'anub'al ja yab'al ja Dyosi: —Ja jaw jumasa ja ma' i'ji ye ta lek yuj ja Dyosi, jaxa ye'nle'i, ja' wax ya' niwan sk'ujole ja Dyosi, ojni ajyuk sak'anile spetsanil k'ak'u'a—.

Mini jun ma' mey smula

18Ja kristyano jumasa, mi sk'anawe ja jas meran wax yala ja Dyosi. Jaxa Dyos it jel niwani, jelxa tajkel yuj ja jas mi lek was sk'ulane'i, sok ja jas mi tojuk wa sk'u'lane'i. 19Ja kristyano jumasa jawi, wa sna'awe spetsanil ja jas t'ilan oj na'xuk ja sb'a Dyosi, yuj ja ye'nani je'ub'al yi'e yuj ja Dyosi.

20Yuj ja jas sk'u'lunej ja Dyosi, spetsanil wax b'ob' jna'tik sb'aj, cho jach'ni wax b'ob' kiltik ja yipi. Ja'yuj ja kristyano jumasa jawi, mi oj sta jas oj yal'e', 21wanike sna'awe sb'aj ja Dyosi, mi skisawe sok mix ya'we yi ts'akatal. Kechan ja' wajel sk'ujole ja jas mi sb'ejuki mini t'un lek ja jas wa sk'ulane'a. 22Wax yalawe ke wax ch'ak sna'e' spetsanil, pero ja smeranili mini ja swa sna'awe'a. 23Ja'ni sb'ej oj stoy'e' ja Dyos it jel ja yip sok sak'an ay spetsanil k'ak'u, pero ja iti ja wa stoyowe ja sk'u'lub'al dyose it ye'n sk'uluneje'i: Jas dyose jawi, lajan sok yiljel kristyano jumasa, ay b'a jastal yal chan b'a wax jujpi, ay jastal chante b'a chane yok sk'ab, sok ay b'a jastal b'its'il chan.

24Ja'yuj, a'jiye libre yuj ja Dyos a sk'u'luke ja jas wa sk'anawe'i, yuj ja jastal mini lek ja jastal wa sk'ulane'i, ja'yuj wax yi'aj ja skwerpo'e b'a oj sk'u'luke ja jas jel k'ixwela sb'aji. 25Ja'ni oj stoy'e ja Dyos b'a sak'ani, ja iti, ja wa stoyowe ja jas mi dyosuk merani; wa cho sk'u'ane ja jas sk'u'lunej ja Dyosi, ja'ni oj sk'u'uke ja Dyos ma sk'u'lani, yujni Ye'n sb'ej oj toyxuk spetsanil k'ak'u'a. —Jach'ni'a.

26Yuj ja jach' jastal jawi, ja'yuj a'ji eluke yuj ja Dyos ja ixuk sok ja winik jumasa, a sk'u'luke spetsanil ja jas mi lek wa sk'ana oj sk'u'luke'i. Ay ixuk mixa sk'ana oj yi' sb'aje sok winik, ja' wa sk'ana oj yi' sb'aj sok ja smoj ixukili. 27Jach' wax cho sk'u'lan ja winik jumasa, mixa wa'nto sk'ana oj yi' sb'aje sok ja sche'ume'i, mas lek wax yabye ja oj yij sb'a sok ja smoj winikile'i. Ja jastal ja jawi jel k'ixwela sb'aj, jayuj ja wego ti wane yijel wokol b'a skwerpo'e.

28Mi skisawe ja Dyosi, ja'yuj a'jiye libre b'a oj sk'u'luke spetsanil ja jas was k'ana oj sk'uluke'i. 29Toj kistal ja jas wa sk'ulane'i, mi alb'en ja jas wa sk'u'lane'i, toj ilk'ujol ja wajel sk'ujole. Tajkel xta wax yila sb'aje. Wa smila sb'aje. Toj tiro'anel wajel sk'ujole'. Wa sta'a sb'aje ti' b'a spat sts'e'ele. 30Mi lek wa sta'awe ti ja tuk jumasa, tajkel wax yilawe ja Dyosi, wax yutaj sb'aje, wa stoyo sb'aje. Wa sje'a sb'aje ke jel sna'awe. Wa sle'awe lek jastal oj sk'u'luke b'a mi leki, mi skisa ja snan state'i. 31Mix yabye sb'ej ja jas merani, mix b'ob' niwan k'ujoluktike ja ye'nle'i. Mi ma syajtaye, mi max yila sb'aje sok lek. 32Iday wa sna'awe lek ja jas yalunej ja Dyosi, ja ma jach' wa sk'u'lan jastal jawi, sb'ejni oj chamuka. Mini sok ja jachuki, mix yabye sb'ej, tini wa sk'u'lane ja jas wa sk'anawe'a, ta wan k'a sk'u'lan jun smoje ja jastal wa sk'u'lane'i, jelni lek wax yilawe'a, —xchi ja Pablo.

Currently Selected:

Romanos 1: YABD

Highlight

Copy