Filipenses 3

Oj na'tik sb'aj ja Jesusi

1Mi kechanuka, jmoj alijel jumasa, gusto ajyanik yuj ja ti'xa ayex sok ja Kajwaltik Jesusi. Ja ke'n mi wokoluk wax kab' ja oj chol kana wabyex otro bwelta ja jas jts'ijb'anta a wi'exi, jaxa we'nlexi, jelni lek oj ja wabyex ja oj kal otro bwelta.

2—Talna b'ajik sok ja ma'tik mini jun sb'ej ja jas wa sk'u'lane'i yuja wa sk'anawe oj kupxuk wa k'unilexi—. 3-4Ja ma' meran kupub'al ja sk'unili ke'notik, ja ma je'ubalyi yuja ja Espiritu Santo jas oj k'u'ltiki wax toyotik ja Dyosi, sok gusto aytik yuj ja ti'xa aytik sok ja Kajwaltik Jesusi. Ja ke'ntiki, wanix na'atika mi jas oj b'ob' jk'u'luktik ja b'a oj jta jkoltajeltiki. Ja lek yuj ti oj ta jkoltajeltik yuj ja oj kupxuk ja k'uniltiki, ja ke'n jelni gusto oj kab'a: 5ja ke'n waxake k'ak'u manxelon ja kupji ki ja jk'unili, ti manxiyon b'a schonab'il ja israelenio jumasa, ti b'a k'ole sb'a Benjamin; —Ja ke'n hebreo'on lek, jaxa tuki mi jachukuk jastal jawi— Jaxa yuj ja wax k'u'an ja mandar it a'ji yi ja Moisesi, ti ajyiyon sok ja k'ole fariseo jumasa. 6Jex cham jk'ujol ajyi b'a oj k'u'luk ja jas wax yala ja mandar iti yuja wax kixtala'anej ja jmoj aljeltik jumasa ma'tik sk'u'aneta ja Kajwaltiki. —Mi ma oj b'ob' sle' jmul yuja mi wax k'u'lan ja jas wax yala ja mandar iti— 7Sts'akatal ja Kajwaltik Jesús yuj ja jas k'u'lan ki'i, ja ya'n wax pensaran lomxani ja jas jel wax kila st'ilanil ajyi'a. 8-9Ja'yuj spetsanil ja jawi, ch'akta jip'ele, jach' wax kila jastal ts'i'lel ja' wax k'ana oj jna' lek sb'aj ja Kajwaltik Jesusi, yujni mey b'a mas leka. Sok wax k'ana oj yil'on lek, mi ja'uk yuj ja jk'u'an ja mandar it a'ji yi ja Moisesi, ja'yuj ja jk'u'an ja Kajwaltik Jesusi, yujni jach' wa sk'ana ja Dyos oj k'u'luktik b'a oj yi'otik leka. 10Ja'yuj, kechani ja wax k'ana, ja oj jna' lek sb'aj ja Kajwaltik Jesusi; ma la kaltik wax k'ana oj kab' jastal ja yip ja yajni sak'wi, oj ki' ja wokol jastal yi'aj ja ye'n, ma oj chamkon jastal ch'am ja ye'n, 11—Sok wax majla oj ya sak'wukon ja Dyos ja yajnix ya sak'wuk ja ma'tik chamelxa—

Oj k'otkotik ja b'a k'elan jsatiki

12Sok ja iti, mi yuj wa'nukon yaljel yuj ch'akta jk'u'l spetsanil ja jas ch'ak ta kala wabyexi, ma yuj wax kala yuj jelxa tojon ja ke'n miyuk. Kechan wanix b'ob' kala, mi la axwiyon man wax k'ana oj jta' ja jas k'elan jsati, ja'yuj ja' jaw ti' skoltayon ja Kajwaltik Jesús tak. 13Jmoj aljel jumasa, ja ke'n wanix na'a lek yuj mito wax ta'a ja jas k'elan jsati; kechan kalatani'a, mi ja oj k'el ja jas jk'u'lanta jani, ja ya'n ja' wa'non stsatsal k'ujolajel jb'aj b'a oj k'u'luk ja jas me'x b'ob' jk'u'luki. 14Ja'yuj mi la axwiyon ti'ni wajumona wax k'ana oj jta' ja jas k'elan jsati, b'a jach' oj ya'ki ja jmajtan it yaloj ja Dyos yuj ja Kajwaltik Jesusi.

15Jpetsaniltik ja janek' gustoxa wa'n ek'el kujtik ja b'a jsak'aniltik yuj ja jk'u'antik ja Dyosi, jel t'ilan jach' oj pensara'uktik jastal iti, yuj k'a ay chab' oxe ja we'nlex tuk ja jas waxa pensara'anexi, spetsanil ja jawi, toj lek oj sje'a wi'ex ja Dyosi. 16Ja b'a t'ilan leki, jpetsaniltik ja ke'ntiki, junxta ja b'ej oj nochtiki.

17Jmoj aljel jumasa nochowik ja jas wax k'u'lan ja ke'n. Cho k'elawik ja ma jach' wa sk'u'lan jastal jawi. 18Jel jitsan ma' wax yala yuj ja cham b'a cruz ja Kajwaltik Jesusi, lomxani b'i ela. Ja jawi, jitsan bwelta xa kalata wabyex ja we'nlexi, ja ya'n wa syats'a sb'aj ja kaltsili sok ya'lel jsat oj kala wabyex otro bwelta. 19Ja jaw jumasa, ojni ch'ak sna'jele'a. Kechan ja wajel sk'ujole ja wa'eli, jel gusto wax yabye ja jas wa'ne sk'u'lajeli, ja smeranili sb'ejni ke oj k'ixwuke t'unuk. Kechan ja' wajel sk'ujole ja jastik mi lek b'a lu'um iti. 20Jaxa ke'ntiki, swinkilotikxa ja satk'inali, oj cho jmajlantik oj kumxuk ja jkoltanumtiki, ja'ni ja Kajwaltik Jesusi. 21Ja kwerpotiki mini jun yip ay ojni ch'ak sna'jela, jaxa ye'n oj stukb'es, tsa'ub'al ja kwerpotik oj ya'kitik ja'ni jastal ja sb'aj ye'n. Ja iti, ja' oj sk'u'luk sok ja yip it wa stalna sok spetsanil ja lu'um k'inali.

Currently Selected:

Filipenses 3: YABD

Highlight

Copy