Filipenses 1

Spatulab'il k'ujolal

1Jmoj aljel jumasa b'a Filipos:

Ja ke'ntikon Pablo sok Timoteo, ya'tijumotikon ja Kajwaltik Jesusi, wax jekatikon jun spatulab'il a k'ujolex a petsanilex ja we'nlex ma'tik tsa'ub'alxa b'a yuntikil ja Dyosi, cho ti tsoman ayex sok ja Kajwaltik Jesusi. Wax cho jekatikon spatulab'il sk'ujole' ja ma'tik ay ya'tel yuj ja jmoj aljeltik jumasa jach'ni ja diacono jumasa.

2Ja jtatik Dyos sok ja Kajwaltik Jesús oj syajtayex lek cho laman oj ya ajyanik.

Ja Pablo sk'uman ja Dyos, yuj ja jmoj aljeltik jumasa

3Yajni wala julyex jk'ujoli, tola bida wax ka'yi ts'akatal ja Dyosi; 4Jaxa yajni wax k'uman ja Dyosi, spetsanil k'ak'u gusto wax k'anayi b'a a petsanilex ja we'nlexi, 5yuj ja a koltayonex yaljel ja yab'al ja Dyosi, masan sb'ajtanil k'ak'u a wabyexi, sok man wego. 6Ye'n ja Dyos ja ma' ya k'e'uk ja tsamal a'tel sok ja we'nlexi, wax cho na'a toj lek oj ya ajyanik man oj k'otuk ja k'ak'u oj kumxuk ja Kajwaltik Jesusi.

7Lek yuj jach' wa'nukon pensar b'a wa petsanilex ja we'nlexi, yuj ja jel wax k'anawexi, sok yuj ja wax cho a koltayonex ya'teltajel ja b'a syajal sk'ujol ja Dyos ya'ojki'i. A'nima lutanukon ma ti' ayon b'a sti' sat ja jwes jumasa, ja we'nlexi, spetsanil k'ak'u a koltayonex yaljel ja smeranil ja yab'al ja Dyosi. 8Ja Dyosi, wa sna'a ke mi wanukon le'uj ab'al ja yajni wax ta'a ti' ja ma' mix na'a sb'aje'i, sok wax k'anawe sok ja syajal sk'ujol ja Kajwaltik Jesús wax ya' ki'i.

9Wax k'ana yi ja Dyosi, yajta lek a b'ajex tola bida, na'awik lek spetsanil ja jas wax ek'i, cho k'elawik toj lek, 10jach' oj b'ob' a na'ex stsa'jel b'ay ja leki. B'a jach' mi jas a mul oj jak sta'ex ja Kajwaltik Jesús ja yajnix kumxi, sok mini ma oj b'ob' sle' lom a mulexa. 11Yuj ja jel wax koltani ja Kajwaltik Jesusi, ja'yuj ja we'nlexi, jel toj ja jas oj ja k'u'lukexi, jaxa kristyano'i, jel oj stoy'e' ja Dyosi, ojni cho sk'u'uke'a.

Ja jas wan pensar ja Pablo

12Jmoj aljel jumasa wax k'ana oj ja na'ex ja jas oj ek' kuji, yuj ja jawi, wa skoltayon yaljel ja tsamal yab'al ja Dyosi. 13Spetsanil ja ma wa stalna ja niwan na'itsi, sok ja t'usan kristyano'i, wa sna'awe ke yuj ja lutanon yuj ja ya'teltajel ja Kajwaltik Jesusi. 14Jaxa yajni yabye lutanon ja jmoj aljeltik jumasa, jitsan ja ye'nle stsatsal k'ujolan sb'aje b'a oj yal'e' ja yab'al ja Dyosi, mini jun xiwye'a masto sniwan k'ujolane ja Kajwaltik Jesusi.

15-16Smeranil ja ma' wax yala ja tsamal yab'al ja Dyosi, yujni meran ja wa sk'ana oj koltanuke'a: Wa syajtaye ja Kajwaltik Jesusi, sok wa sna'awe ke Dyos ya'oj ki b'a oj kal ja smeranil ja yab'ali. Ay ma wax cho sk'u'lan kechan b'a oj yil machunk'a yuj oj b'ob' kujtikoni, ma yuj wa sk'u'lane kechan b'a ilk'ujol wax ochye. 17Ja jaw jumasa ma wax ochye jmok ilk'ujoli mi tojuk wax yalawe; jach' wa sk'u'lane yuj ja wa'ne jmok ilk'ujoli, kechan wa sk'ana oj ya'we jta' tuktukil ab'al k'umal ja b'a lutanoni. 18Ja jawi, jas skochel ja ke'n; ta wa'ne yaljel sok spetsanil sk'ujole ma miyuk, kechan a yale ja yab'al ja Kajwaltik Jesusi, ja jawi jelni tsamal wax kab'a. Sok jelni gusto wala ajyiyona 19Yajni oj na' ke wa'nex sk'umajel ja Dyosi yuj ja wa skoltayex ja Yespiritu ja Kajwaltik Jesusi, mixa oj ek' mas k'ak'u oj elkon ja b'a lutanoni. 20Toj lek wax majla b'a mi jas mi lek oj k'u'luk b'a mi kechan oj ya jta' k'ixwel. Miyuk mi jachukuk jastal jawi, Ja'yuj, ta sak'anon ma chamelonxa, wax k'ana tsats lek oj ajyukon, b'a jach' oj sta'e ti' tsamal ja Kajwaltik Jesús ja kristyano jumasa.

21Ta yuj k'a sak'anon wax k'ana oj ka'telta ja Kajwaltik Jesusi, ta yuj k'a wala chamyon yujni ch'akta jk'u'l ganara. 22-23Ja smeranili, mix na'a b'a'ya mas leki, jel wokol wax kab' stsa'jel. Kechan ta yuj k'a ajyito jsak'anil jelni oj makunukon yuj ja Dyos b'a lu'um ita; kechan ta yuj k'a wala chamyon, ja'xa oj waj ta' jb'aj sok ja Kajwaltik Jesusi, ja jastal jawi, ja'ni slekila. 24-25Ja ke'n wax na'a ke oj makunukon a wujilex ja janek' sak'an ayoni. Ja'yuj wax na'a lek oj kankon, b'a oj b'ob' jkoltayex b'a oj ja k'u'ukex ja Dyosi, sok b'a lek oj ek'uk awujilex. 26Ja'yuj ja yajni la ajyiyon a mokex otro bwelta'i, oj ja ta'ex jastal oj ja toy'ex ja Kajwaltik Jesusi.

Ja Kajwaltik Jesusi jas sniwanil k'ujoltik

27Kechan wax k'ana a wi'ex ke ajyanik toj ja jastal wa sje'a ja tsamal yab'al ja Kajwaltik Jesusi, wax waj kil'ex ma miyuk, wax k'ana oj na' lek ke tsoman ajyanik a petsanilex, laja a b'ajik lek b'a spetsanil, a'nima wokoluk laja a b'ajik b'a oj ja wal'ex ja yab'al ja Dyosi.

28Mok xiwanik yuj ja ma mi lek wax yilawexi. Ta tsats k'a la ajyiyex ja we'nlexi, oj ja wil'ex ja ye'nle'i oj ch'ak sna'jele, jaxa we'nlexi ojni koltajananika, ye'nani ja Dyos ja ma oj ya'a k'ulex ganar ja ma' mi lek wax yilawexi. 29Ye'n ya'ata a wi'ex ja Dyos b'a oj ja wa' sniwanil a k'ujolex ja Kajwaltik Jesusi, sok jach'ni b'a oj ja wi'ex wokol yuj ja ye'n. 30Ja'yuj, ja ab'al k'umal jta'a ja ke'n jach' oj cho a ta'ex ja we'nlexi, wax cho a na'awex lek ja wokol jumasa ki'aji, cho ti'toni wa'non yi'jela.

Currently Selected:

Filipenses 1: YABD

Highlight

Copy