Marcos 11

Ja Jesusi och b'a Jerusalen

(Mt 21:1-11; Lc 19:28-40; Jn 12:12-19)

1Ja Jesús sok ja sneb'uman jumasa, ti k'otye b'a wits Olivos, b'a mojan sok ja chonab' jumasa b'a Betfage, b'a Betania sok b'a Jerusalen. 2Jaxa Jesusi, ti yal yab' tiw chawane ja sneb'umani:

—Ka'axik ja b'a chonab' it wanxax ilxi ochi. Yajni oj ochanik t'an ochi ti oj ja ta'ex jun yal burro mochante, ja yal burro jawi, mito ma' wax k'e'i. Tukuwik, i'ajik jan ki. 3Yuj k'a ay ma' sjob'o jas lom waxa tukuwexi, ti'xa walawex yab'a: Ja oj makunuk yuj ja Kajwaltiki, mi oj alb'uk wego oj ya kumxuk—.

4Jachuk ti wajye ja sneb'uman jumasa b'a chonab'i. Ja jastal alji yabye'i, ti'ni sta'awe b'a kaye mochante ja yal burro, ti stukuwe'a.

5Jaxa tiwi, ti aye chab' oxe'a, ti job'ji yi'e'a: —¿Jas wa'nex b'a? ¿Jasyuj ja wa'nex stukjel ja yal burro'i?—

6Jaxa sneb'uman jumasa, jach'ni yalawe ja jastal alub'al yabye yuj ja Jesusi. Ta yuj k'a jach' jastal jawi, i'ajik, —x'utji ye 7Tsa'an ti ya'we kajan ja sk'u'e' b'a spatik ja yal burro, ti yi'aje och ja b'ay ja Jesusi, jaxa Jesusi, ti'xa k'e' ja yal burro'a.

8Jel jitsan ja ma' ch'ak slib' ja sk'u'e b'a yoj b'ej b'a oj ek'uk ja Jesusi. Cho ay ma sk'utsu jan yal k'ab' te', ya'we ochuk ja b'a yoj b'eji, b'a jach' k'unxta oj ek'uk ja Jesusi. 9Spetsanil ja kristyano jumasa ma' ti wajum b'ajtani, cho jach'ni ja ma' ti wajume tsa'ani, wa'nexta awanel, ti wax yalawe'a:

—Koltayotikon—

—Ts'akatal, yuj ja we'n jakya b'a sb'i'il ja Dyosi—

10—Ja Dyos ja jel lek oj iljuk yuj ja ma' tsa'an oj och ya'tel

yuj ja David ma' ek' paxta kujtikoni—

Awapabori, —Koltayotikon,

Dyos b'a nalan cha'an—

11Yajni och ja Jesús b'a chonab' Jerusaleni, ti waj b'a snajtsil ja tsomjeli, ti ch'ak sk'el jastal ay spetsanila. Yuj ja ochta ja k'ak'u, ja'yuj ti'xa waj sok ja sneb'uman jumasa b'a chonab' Betania.

Ja Jesús sok ja ste'il igo

(Mt 21:18-19)

12B'a pilan k'ak'u ja Jesús sok ja sneb'uman jumasa, elye b'a Betania. Jaxa b'a b'eji, jak wa'in yab' ja Jesusi. 13Najat yila och jun ste'il igo, jel ja spo'wili, yajni mojanxa ayi, mini jun sat sta'a b'a oj slo'a. Ja te' jawi, kechan jel ja spo'wili, yujni mi yixawiluk oj satinuka. 14Ja'yuj ja Jesusi, ti yal yab' ja te' jawi: —Man ya'n mini jun ma' oj slo' wa sati— Jaxa sneb'uman jumasa, ti'ni yabye'a.

Ja Jesús sok ja b'olmalanum jumasa b'a snajtsil tsomjeli

(Mt 21:12-17; Lc 19:45-48; Jn 2:13-22)

15Yajni k'otye b'a Jerusaleni, jaxa Jesusi, ti och ja b'a snajtsil tsomjeli, ch'ak snuts el ja b'olmalanum jumasa. Jaxa ma'tik wa'ne spojel stak'ine ma'tik jakel b'a tuktukil chonab'i, ch'ak wichpujuk el yi'e ja smesa'e'i, ja ma'tik wa'ne chonoj pumusi, ch'ak jipjuk el yi'e ja skajone'i. 16Jaxa Jesusi, mini ma' ya'kan b'a oj b'ejyuk ek' sok sb'olmal ja b'a yoj snajtsil ja tsomjeli. 17Tsa'an ti och sje' yi ja yab'al ja Dyos ja kristyano jumasa, ti yal yabye'a: —Ja Dyosi, jach' wax yala jastal it ja b'a ts'ijb'anub'al ja yab'ali: Ja jnaji, snajtsil b'a oj sk'umuk Dyos spetsanil ja kristyano jumasa. Jaxa we'nlexi, a wa'wexta pax snaj elk'anum—.

18Jaxa pagre jumasa ma'tik niwan ya'tel yuj ja pagre jumasa sok ja ma'tik wa sje'awe ja mandar it a'ji yi ja Moisesi, yajni yabye jas yala ja Jesusi, ti och sle'e jastal oj smil'e'a. Yujni wa xiwye yuj ja, b'a' miyuka spetsanil ja kristyano jumasa jel cham k'ujol aye yuj ja jastal wa sje'a ja yab'al ja Dyosi.

19Yajni och ja a'kwali, ja Jesús sok ja sneb'uman jumasa, elye ja b'a chonab' jawi.

Ja jas ek' sb'a ja ste'il ja igo

(Mt 21:20-22)

20Jaxa b'a pilan sakb'eli, ti ek' ye mojan ja Jesús sok ja sneb'uman jumasa ja b'ay ja ste'il ja igo, wajto yil'e takinxa man yech.

21Jaxa Pedro ti ya jul sk'ujol ja Jesús ja jas ek yujile ja eke'i, ti yal yab'a:

—Je'uman, —K'elawile— Kechan yuj ja jas a wal yab' ja te' jawi, juts'in takji.

22Ti alji yab' yuj ja Jesusi:

—K'u'anik ja Dyosi. 23-24Ja smeranili, oj kala wabyex ta yuj k'a waxa k'u'anex merani, sok mi jas oj ek'uk a k'ujolex yuj ja yip ja Dyosi, spetsanil ja jas oj ja k'an'ex yi'i, ojni ya' wi'exa. Oj ja wal'ex yab' ja wits iti: —Elan ja ili, jipa a b'aj b'a yoj niwan paman ja'— Jach'ni oj b'ob'uka. Kechan oj ja k'u'ukex yujni b'ob'ta ja jas a k'anawexi.

25-26—Ja yajni oj ja k'umukex ja Dyosi, mok a wa'wex stup ja smul spetsanil ja ma' mi sb'ejuk ja jas sk'u'lunej a wi'exi. Jach'ni ja Dyos wa Tatex tey b'a satk'inali, oj sch'ay a wi'ex spetsanil wa mul we'nlexi.

Ja yip ja Jesusi

(Mt 21:23-27; Lc 20:1-8)

27Tsa'an cho wajye pilan majke b'a Jerusaleni. Jaxa yajni ti wa'n ek' b'ejyel ja Jesús b'a snajtsil ja tsomjeli, ti waj ta'juk yuj ja ma'tik jel niwak ja ya'tel yuj ja pagre jumasa sok ja ma'tik wa sje'awe ja mandar it a'ji yi ja Moises yuj ja Dyosi, sok ja ma'tik ay ya'tel b'a chonab'i, 28ti sjob'owe yi'a:

—¿Machun ya'wi wa wip b'a oj ja k'u'l spetsanil ja jastal it b'a?

29-30Ti alji yabye yuj ja Jesusi:

—Jach'ni ja ke'n ay jas wax k'ana oj job' a wi'ex: ¿Machun a'ji yi yuj ja ya'tel ja Juan ma' ya'a yi'jel ja' b'a? ¿Ja' ma' a'ji yi yuj ja Dyosi, ma' ay ma tuk a'ji yi yuj? Ta yuj k'a a walawex kab' ja we'nlex machunk'a, jach'ni ja ke'n oj kala wabyex ma ya'ki ja a'tel it a wilawex jk'u'lanta, —xchi ja Jesusi.

31Jaxa ye'nle'i, ti och yal sb'aje'a: —Yuj k'a wax kalatik Dyos a'ji yi yuj ja ya'tel ja Juani, ti oj sjob' ki'tik ja Jesús jasyuj ja mix k'u'antiki. 32Cho mini oj b'ob' kaltik jun winik ja ma' a'ji yuj ja ya'teli—.

Mi sna'a jas oj yal'e yuj ja wax xiwye yuj ja kristyano jumasa; yuj ja spetsanile wa sk'u'ane ja Juani, yuj jun aluman Dyos jekub'al yuj ja Dyosi. 33Ja'yuj ti yalawe yab' ja Jesusi:

—Mix na'atikon.

Ja'yuj ti alji yabye yuj ja Jesusi:

Cho mini a ke'n mi oj kala wabyex ma' wax ya'ki spetsanil ja a'tel it wax k'u'lani, —xchi ja Jesusi.

Currently Selected:

Marcos 11: YABD

Highlight

Copy