Mateo 23

Ja jas wax ya'na'tik ja Jesusi

(Mr 12:38-40; Lc 11:37-54; 20:45-47)

1Tsa'an ja Jesusi, ti yal yab' ja kristyano sok ja sneb'uman jumasa:

2—Ja fariseo jumasa, sok ja ma'tik wa sje'awe ja smandar, ye'nle ja ma' jel wa sna'awe ja smandar ja Dyos it a'ji yi ja Moisesi. 3Jaxa we'nlexi, k'u'anik spetsanil ja jas oj yal'e'i; jaxa jastal ja jas was k'ulane'i, mok a tsajlayex, yuj ja pilan ja jas wa sje'awe'i, sok pilan ja jas wa sk'u'lane'i. 4Jaxa mandar jumasa b'a wax ya'awe yi' ja kristyano jumasa, ja b'a jel wokol sk'u'lajeli, jaxa ye'nle'i, mini yuj wax b'ob' sk'u'luke ja jas wax yalawe'a. 5Spetsanil ja jastal jawi, jach' wa sk'u'lane, ja ita b'a oj iljuke yuj ja kristyano jumasa sok b'a jach' oj cho ya'we cham sk'ujole'. Ja'yuj wa sts'ijb'ane xe'ntiyaman ja yab'al ja Dyos b'a xe'ntiyaman yal ju'un ti wa snol'e b'a jun yal ye'tal tojb'el sok ts'u'um, jaxa tuki ti wa snok'owe b'a spatane sok b'a snuk' sk'ab'e. B'a kada bwelta mas niwan wa'ne sk'u'lajel ja ye'tal jawi, cho jach'ni ja snich ja sk'u'e'i, jel najtik was k'ulane, b'a jach' oj aljuke yuj ja kristyano jumasa yuj jel wa sk'u'ane ja Dyosi. 6Ja yajni wax wajye b'a snajtsil ja tsomjeli, ma b'a jun k'ini, ja' jel sgusto'e ja jel niwan wax ilji ye'i. 7Jel sgusto'e ja wax jak yamjuk sk'ab'e yuj ja kristyano jumasa yajni ti aye b'a ay jas wax chonxi, sok ja yajni wax kisjiye leki, cho jel sgusto'e ja wax alji sb'aje je'umanili.

8—Jaxa we'nlexi, mok a wi'ex lek ja oj yal a wabyex je'umanil ja kristyano jumasa, ja we'nlexi, lajan sok a moj alijel a b'ajex, sok kechani june wa je'umanexi. 9Mok ma' a walwex yab' tateyil, yuj ja we'nlexi kechan ni ja a tatex ja Dyos it tey b'a satk'inali. 10Mok cho a majlayex oj skisjanik jastal ay ja wa wa'telex yuj ja kristyano jumasa, yuj kechani ke'n ja Mesias ay ka'tel a wujilexi. 11Ja ma' wa sk'ana mas niwan oj ajyuk a wujilexi, t'ilan oj ya'teltayex a petsanilex jastal a wa'tijumex. 12Yuj ja ma' jel niwan wax ya'a sb'aj yuj ja tuk jumasa, jelni ch'in oj iljuka. Jaxa ma' ch'in wax ya'a sb'aj sok ja tuk jumasa, jelni niwan oj iljuk ja ye'na—.

Mi lek oj ek'uk a wujilex

13-14Ja Jesusi, ti yal yab' ja fariseo jumasa sok ja ma'tik wa sje'awe ja mandar it a'ji yi ja Moises yuj ja Dyosi, ti alji yabye jastal ita:

—Jel wokol oj ek' awujilex ja we'nlexi, yuj ja toj chab' pensar ayexi— Ja we'nlexi, waxa makawex mok sk'u'uke ja b'a wa sk'ulan mandar ja Dyos ja tuk jumasa. Mixa wa a b'ajex ja we'nlexi, cho mini ja tuk jumasa mixa k'anawex ja oj ya' sb'aje'i.

15—Jel wokol oj ek'uk a wujilex ja we'nlex yuj ja toj chab' pensar ayexi— Ja we'nlexi, wala wajyex ek' b'a spetsanil ja lugar jumasa, b'a oj k'u'ajuk ja jas waxa walawexi, yajni waxa ta'awexi waxa ch'ikawex b'a yoj wokol ja ye'nle yuj ja we'nlexi.

16—Jel wokol oj ek'uk a wujilex— Ja sb'eji oj ja je'ex yi ja kristyano jumasa jastal oj sk'u'uke ja Dyosi, jastal oj b'ob' a je'ex yi'e, mini ja we'nlexi mix b'ob' a k'u'ukexta. Waxa walawex ta yuj k'a ja waxa ta'awex ti' ja snajtsil tsomjeli, mi jel t'ilanuk oj k'u'laxuk ja jas wax alxi; kechan ta yuj k'a ja waxa ta'awex ti' ja k'anal tak'in jumasa ochel ja b'a snajtsil ja tsomjeli, jelni t'ilan oj k'u'laxuk ja jas wax alxi'a. 17—Ja we'nlexi, mi jasxa na'awex, mixa na'awex k'inal—. Mini ma t'un wax jak a k'ujolex ja mas niwan wax kilatik ja snajtsil ja tsomjel yuj ja k'anal tak'in b'a, ja'ni ja snajtsil ja tsomjel ja wax ya makunuk ja k'anal tak'in b'a sti' sat ja Dyos tak.

18—Wax cho a walawex ta yuj k'a ay ma wa sta'a ti' ja altar b'a snajtsil ja tsomjeli, mi jel t'ilanuk oj k'u'laxuk ja jas wax alxi, kechan ta yuj k'a ja wax ta'xi ti' ja smajtan ja Dyos ti kajan b'a sat ja altar jawi, t'ilani oj k'u'laxuk ja jas wax alxi'a. 19—Mini jasxa na'awexa— Ja' jel niwan wax ilxi ja yaltar ja Dyos yuj ja smajtan wax k'e' kajan ja tiw tak, cho jach'ni ja majtanal jawi jel niwan wax yila ja Dyosi. 20Ta yuj k'a ay ma wax yala ay jas oj sk'u'luk, sok wax cho sta'a ti' ja snajtsil ja tsomjel ojni sk'u'luka, mi kechanuk wa'n yaljel oj sk'u'l yuj ja altar jawi, cho wani yaljel oj sk'u'l yuj spetsanil ja jas tey b'a sat ja altar jawi. 21Ta yuj k'a ay ma wax yala ay jas oj sk'ul yuj ja snajtsil ja tsomjeli, mini wa'nuk yaljel kechan ja oj sk'u'l yuj ja snajtsil tsomjela, cho wani yaljel oj sk'u'l yuj ja Dyos yuj ja ti wax ajyi tiwa. 22Ta yuj k'a ja wa sta'a ti' ja satk'inali, cho wani sta'a ti' ja Dyosi, jasyuj ti'ni kulan b'a satk'inal ja ye'na.

23—Jel wokol oj ek'uk a wujolex ja we'nlex ja ma'tik wa sje'a ja mandar it a'ji yi ja Moises yuj ja Dyosi, cho jach'ni ja we'nlex fariseo jumasa. Toj chab' pensar ayex— Ja' jex cham a k'ujolex ja oj a wa'ex ja slajunil ja wa menta'ex b'a smajtan ja Dyosi, cho jach'ni ja anis sok ja cominos it waxa wa'wex el b'a wa walajexi. Jaxa mandar b'a mas niwan sb'a Dyosi, minixa k'u'anexa: Yuj k'a toj oj ajyanik sok ja tuk jumasa, jel t'ilan oj cho a yajtayex, oj cho a k'u'ukex ja Dyos b'a spetsanil. Jel t'ilan oj k'u'axuk ja oxe jastik jumasa iti, mini b'a jas mi oj k'u'axuk ja tuk mandar jumasa'a. 24—Ja we'nlex ja ma'tik ay ya'teli, mini jasxa na'awexa— Waxa k'u'anex ja b'a mi jel st'ilaniluk oj ja k'u'lukex b'a wax yala ja b'a smandar jumasa, jaxa b'a jel t'ilan wax yala oj ja k'u'lukexi, waxa wa'wex kan b'a wa ts'e'elex. Ja we'nlexi, ja a mojex ja ma' wax yu'aj pajal ya'al ts'usub' yajni wax yila ti la'an jun yal us ja b'a yoj sb'isi, wax ya eluk, jaxa cameyo ti la'an b'a yoj pajal ya'al ts'usub' wax ch'ak sb'uk' ko'e.

25-26—Jel ajujla a b'ajex, jel wokol oj ek' a wujilex yuj ja toj chab' pensar ayexi—. Lajan sok jel lekex, ja smeranili, je malo'ex, mi ma' wax b'ob' a koltayexi, jaxa tuk jumasa waxa welk'anex yi ja jas sb'aje'i. —Mixa na'awex k'inal— Ja smeranili, mas lek je'awik ja slekil wa modoexi, ta mixa k'u'lanex ja jachuki, ja a mojex ja vaso ma ja sek' it sakxta ay ja b'a spatiki, jaxa b'a yojoli, kux ay. Ta yuj k'a wax sak'xi lek ja b'a yojol ja vaso ma ja sek'i, ja smeranili, yujni sak oj ajyuk spetsanila.

27-28—Jel wokol oj ek'uk a wujilex— Yuj ja jel lek waxa je'a a b'ajexi sok yuj ja jel toj waxa wa'a a b'ajexi, ja smeranili toj chab' pensar ayex sok mi lek ja wa modoexi. Ja lajanex sok ja snajtsil sk'ejnal ja cham winiki ja toj sak b'onob'al b'a jwera, jaxa b'a yojoli, toj b'ak b'ut'el sok jel kux.

29—Jel wokol oj ek'uk' a wujolex a we'nlexi, toj chab' pensar ayex— waxa tojb'esex cha'anil ts'akab' ton b'a ti' oj ja na'ex ja aluman Dyos jumasa ma' ch'akta chamuke'i, sok waxa tojb'esex lek yi ja sk'ejnal ja ma' chamta jel lek ja smodo. 30Waxa walawex ja lek ti'ukxa ayex ja we'nlex ja k'ak'u mi lek oj a wil'ex ja jastal ch'ak smil'e ja aluman Dyos jumasa. 31Jaxa we'nlex ja smeranili, waxa walawex lajanex sok ja ye'nle'i. 32—Aktayikxakan sk'u'lajel we'nlex, ja jas ye'n ya'oje k'e' jan stojb'esjeli—

33—Ja we'nlexi, jun tantik le'a ab'alex, sok jel malo wa modoexi, jach' jastal ja sbeneno ja tan ajuchani. —Ja'yuj mi oja kolta b'ajex b'a yoj wokoli— 34Ja ke'n oj jek a wi'ex aluman Dyos, je'uman jumasa ma'tik jel wa sna'a, ay jujuntik ja ye'nle'i, we'n oj ja mil'ex ma' oj ja ts'ap'ex sklabo'il b'a jun Cruz, jaxa tuki ti oj a yajb'esex b'a na'its b'a wa stsomo sb'aje'i, jaxa tuki, man b'a tuktukil chonab' ti oj a le'ex ek'a. 35Ja'yuj we'nani a mulex ja cham spetsanil ja kristyano jumasa b'a leke ja b'a lu'um ita; laj k'eltik a wil man b'a chamel winik Abel man b'a chamel winik aluman Dyos Zacarias, ja yunin ja Berequiasi, ja aluman Dyos iti, ti smilawe, b'a snalan ja snajtsil ja tsomjel sok ja altar b'a wax tsikxi ja smajtan jumasa ja Dyosi. 36Ja smeranili, oj kal a wabyex, a petsanil ja we'nlexi ojni a tup'ex ja mulal jumasa ita.

Ja Jesusi, jel yi'aj wokol yuj ja kristyano jumasa b'a Jerusaleni

(Lc 13:34-35)

37—A, Jerusalenio jumasa, a petsanilex kristyano jumasa b'a chonab' Jerusalen— Ja aluman Dyos jumasa sjeka a wi'ex ja Dyosi, ch'ak a mil'ex, cho jach'ni a k'u'lanex yi ja ma'tik jekji ja b'a waj yal a wabyex ja yab'al ja Dyosi. Jitsan majke jle'a jastal oj tsom wa wuntikil jumasa jastal wa stsomo b'a yib' swech' ja yuntikil ja nan gayina, jaxa we'ni mini t'un a k'ana'a. 38Ja'yuj ja snajtsil wa tsomjeli, oj kan jipan. 39Ja smeranili, oj kal a wabyex, man ya'n mixa ojto a wil'onex pilan majke, man oj ja wal'ex: Sts'akatal ja Mesias ti jakum b'a sb'i'il ja Dyosi—

Currently Selected:

Mateo 23: YABD

Highlight

Copy

Compare