Mateo 18

¿Machunk'a mas niwan b'a?

(Mr 9:33-37; Lc 9:46-48)

1Ja jun xta k'ak'u jawi, ja sneb'uman jumasa ja Kajwaltik Jesusi, ti sjob'owe yi'a:

—¿Machunk'a ja jel niwan oj iljuk ja b'a wa sk'ulan mandar ja Dyos b'a?

2Jaxa Jesusi, ti spaya jan jun yal kerema, ti ya tek'an b'a snalane, 3ti yal yabye'a:

—Ja smeranili oj kal a wabyex ja b'a oj b'ob' ochanik ja b'a sk'ulan mandar ja Dyosi, jel t'ilan oj ja tojb'es wa modoexi, sok jel t'ilan jach' oj ajyanik jastal ja yal kerem iti. 4Jasyuj ja ma niwan oj iljuk ja b'a wa sk'ulan mandar ja Dyosi, ch'in wax ya'a sb'aje jastal ja yal kerem iti. 5Ta ay k'a ma wax yi'aj lek ja yal kerem jastal iti, ke'nani wax yi'ajon leka.

6—Kechan ta yuj k'a lom oj sjom yi s'olom ja ma' jelto ko'el wa sk'u'anoni, sb'ej mochowik yi jun niwan ton ja b'a snuk'i, jipawik ko b'a yoj cha'anil ja niwan paman ja'i.

7—Ay jitsan kosa ja b'a lu'um it wax timji yuj ja kristyano jumasa b'a mi oj sk'u'uke ja Dyosi, sok mey jastal oj timxuke. Kechanxta yuj —Mini t'un lek oj ek' yuj ja ma oj skom ja smoj mok sk'u'uk ja Dyosi—.

8—Yuj k'a ja wa k'ab'i, ma ja wa wok wax ya'a le' wa muli, sok ti waxa k'oko ja yab'al ja Dyosi, mas lek k'utsu'ele ts'a'a el najat. Mas lek a'nima ti mey jun a jk'ab' ma jun a wok oj ochan ja b'a sak'anil it mini oj ch'akuki, yuj ja lom ts'ikan a wok a k'ab' oj wajan ja b'a yoj k'ak'i. 9Yuj ja sok ja jas waxa wila sok wa sati, wanix ya'a k'ok ja yab'al ja Dyosi, mas lek a eluk ja b'a wa' kwerpo ts'a'a el najat. Mas lek ja kechan sok jun wa sat oj ochan ja b'a sak'anil it mini wax ch'ak yuj ja lom sok schab'il a sat oj jip jan ko ja b'a yoj k'ak'i.

10-11—Na'awik t'unuk: mi lekuk ja mi oj a kis'ex ja cho yal ch'in iti, yuj ja ye'nle'i ja wax talnaji ye yuj ja anjel jumasa b'a satk'inali. Ja'yuj jak ja yunin ja Dyos tak ja jak skolta ja ma' ch'ayelni ayi.

Ja Cheji

(Lc 15:3-7)

12—¿Jas la chiyex? ja Junuk ja we'nlexi, ay yi'oj jo' tajb'e (100) chej, jaxa yajni waj a' wil mey june, ¿Mi'ma ti oj ja wa'kan b'a yoj yax k'ul ja chan tajb'e sok b'alun lajune, (99) oj waj ja le' ja jun ch'ay kan b'a? 13Ta yuj k'a a ta'a, jel gusto oj ajyan sok ja jun ch'ayel ajyi, yuj ja chan tajb'e sok b'alun lajune (99) it mi ch'ayeluki. 14Jachuk ja Dyos wa Tatex we'nlexi, mi sk'ana oj ch'ay junuk ja yal yuntikil b'a ti'xa oj kan ek' pilan spetsanil k'ak'u.

Jel t'ilan oj k'u'l jb'ajtik perdonar

(Lc 17:3)

15—Ta ay k'a junuk ja jneb'uman jumasa, wa sk'u'lana wi b'a mi leki, le'a jastal oj b'ob' lo'lan sok stuch'il b'a jach' oj b'ob' yab' sb'ej ja jas mi lekuk sk'u'luneji. Ta yuj k'a yab' sb'ej ja jas a wal yab'i, yujni lek kanya sok ja k'ak'u jawa. 16Ta yuj k'a mi skisa, ti'xa paya junuk ma chab'uk ja jneb'uman ke'ni, b'a oj makunuk a wuj b'a ti oj yabye'a. Ja b'a ts'ijb'anub'al ja yab'al ja Dyosi, wax yala kab'tik spetsanil mulal t'ilan ti oj alxuk b'a sti' sat chab'e ma oxe ja matik ti yab'uneji. 17Kechan ta mini k'a ja jachuki, mi skisa, ala yab' spetsanil ja matik wa sk'u'an ja Dyosi. Cho mini k'a ja jachuki, mix yi'a niwan ja ma sk'u'an ja Dyosi, ila jastal junuk ja ma' mi sk'u'ani. Ma ila junuk jastal ja ma'tik wa sk'anawe kontribusyon sb'a mandaranum b'a Roma.

18—Chikan jastik mi lekxa wilawex ja we'nlex b'a lu'um iti, jach'ni ja Dyosi, cho mini lek oj yil ja b'a satk'inala. Jayuj chikan jastik lekxa wila ja we'nlexi, jach'ni ja Dyosi, cho lekni oj yila.

19—Ja smeranili, oj kal a wabyex, ta ay k'a chawanuk ja b'a lu'um it oj slaj sb'aje b'a ay jas oj sk'an'e yi ja Dyos it tey b'a satk'inali, ja ye'n ojni ya'a. 20Ta ay k'a chab'e ma oxe tsomanex yuj ja jb'i'il ja ke'n, ti'ni ayon b'a wa nalanexa.

21Jaxa Pedro ti och mojan sok ja Jesusi, ti sjob'o yi'a:

—Kajwal, ta ay k'a jun jmoj was sk'ulaki b'a mi lekuki, ¿Jay majke mi oj ka stup b'a? ¿Lek ma ja juk majke'i?

22Ti jak'ji yi yuj ja Jesusi:

—Mi malanuk ja kechan juk majke mi oj wa stup ja wa moji. Chikan jay majke oj sk'uluk awi b'a mi sb'ejuki mok wa stup petsanil k'ak'u.

Ja ma' was k'ana oj ya stup mul ja smoji

23—Ja b'a wa sk'ulan mandar ja Dyosi, ja oj slaj ja jastal ek' b'a jun niwan chonab' ja jun majke'ili. Ja mandaranumi, sjeka spayjel ja ya'tijum jumasa, b'a oj yab' jastal wajum ja ya'teli, b'a jach' oj b'ob' cho stup ja sjel ja ya'tijum jumasa.

24—Yajni och ya eluk ja ma'tik ay sjeli ja mandaranumi, ti i'ji jan yi june ja ya'tijumi, ja sjeli ay sesenta millones sat tak'in b'a toj sakal tak'in. 25Ja a'tijum jawi, yuj ja mey yi'oj tak'in b'a oj b'ob' stup ja sjeli, ja'yuj ti yala ja mandaranum a schon b'a a'tijumil ja winik jawi, jach'ni ja sche'um sok ja yuntikil jumasa, cho jach'ni spetsanil ja jastik sb'aji. Sok ja tak'in janek' oj sta'e'i, ti wax ch'ak tup spetsanil tiw ja sjeli.

26—Jaxa a'tijum jawi, ti ko' mek'an b'a sti' sat ja mandaranumi, ti sk'ana yi pavora: Kajwal, wax k'ana wi pavor majlayon t'unuk, oj ch'ak jtup a wi spetsanil ja jeli.

27—Jaxa mandaranumi, stalna sya'ujlal ja ya'tijumi, ti yal yab'a: Lek ay, ka'xa, juna k'ujol; spetsanil ja janek' wa jel jmoki, oj ch'ak jch'ay a wi spetsanil.

28—Yajni el ja b'a sti' niwan na'its ja mandaranum ja a'tijum jawi, ti sta'a june ja smoj a'tel ay sjel yuj jo' tajb'e (100) sat tak'in b'a toj sakal tak'in. Syama sts'oto yi ja snuk'i, ti yal yab'a: —Man ya'n wax k'ana oj ja tupki ja janek' ja wa jel jmoki—

29—Ja winik jawi, ti cho ko' mek'an b'a sti' sat ja smoj a'teli, ti sk'ana yi pavora: Awapavori, majlayon t'unuk oj ch'ak jtup a wi spetsanil ja janek' ja jel a moki.

30—Jaxa a'tijum jawi, mini smajla'a, sjeka yamuman slutu ja smoj a'tijumili, man ch'ak tup ja sjel ja smoj a'teli.

31—Jaxa tuk smoje jumasa, yajni yilawe jas ch'ak ek'uki, jel jom ja s'olome'i, ja'yuj ti waj yal'e yab' ja mandaranumi.

32—Jaxa mandaranumi ti sjeka spayjel ja ya'tijum jawi, ti yal yab'a: —Mi ni t'un lek ja jas waxa k'u'lana— Ja ke'n jch'aya a wi spetsanil wa jel jmoki, yuja a k'anaki pabori. 33¿Jaxa we'n jasyuj ja mi a talna sya'ujlal ja wa moj a'tel jastal jtalna a ya'ujlal ja we'n b'a?

34—Jel jtajki ja mandaranumi, ti ya'a ja smandari, a ixtalajuk lek ja a'tijum jawi, man oj ch'ak stup spetsanil ja sjeli.

35Ja Jesusi, jach' sch'aka jastal it ja slo'ili: —Jachuk oj sk'u'luk ja Dyos ja jTat sok kada jujune ja we'nlex ta yuj k'a mi spetsanil a k'ujolex ja mixa wawex stup mul wa mojex jumasa—.

Currently Selected:

Mateo 18: YABD

Highlight

Copy

Compare