Mateo 10

Ja lajchawe neb'umani

(Mr 3:13-19; Lc 6:12-16)

1Ja Jesusi, stsomo ja lajchawe sneb'umani. B'a jujune ya' yi yip b'a oj snutse' tantik pukuji b'a oj cho ya'we tojb'uk chikan jas tik'e chamel yi'oj ja kristyano jumasa.

2Ja lajchawe sneb'uman stsa'a ja Jesusi, ya'yi schol jekab'anumil. Ja sb'i'ile'i, ja it jumasa: Simon, ja mas wax na'ji sb'aji Pedro, sok ja smoj alijel Andres; Santiago, Juan yunin ja Zebedeo; 3Felipe, Bartolome, Tomas, Mateo it wa sk'ana kontribusyon ajyi, Santiago yunin ja Alfeo, Tadeo, 4ja Simon Cananeo, sok ja Judas iscariote ma' ojto snak'ul satuk ja Jesús ja tsa'ani.

Ja Jesusi, sjeka ja lajchawane'i

(Mr 6:7-13; Lc 9:1-6)

5Ja Jesusi, sjeka ja lajchawe sneb'uman jumasa sok ja ab'al jumasa iti:

—Mok wajanik ja b'a chonab' jumasa b'a mi judio'uki. Cho jach'ni b'a schonab'il ja samaritenio jumasa, mok wajanik. 6Mas lek ti' la wajyex b'a schonab'ile ja israelenio jumasa, ja ye'nle'i jach' aye jastal jun nole ch'ayel chej.

7—Yajni la wajyexi, alawik ja lo'il iti: Jelxa mojan jakum ja smandar ja Dyosi.

8—Cho a'wik tojb'uk ja ma'tik mi lek ayi. A'wik sak'wuk ja ma chamta. A'wik tojb'uk ja k'a'el sb'ak'tele'i, A'wik eluk ja tantik pukuj jumasa tey sok ja kristyano jumasa. —Mok a tajb'ayex ja ma' oj ja k'u'lukex yi ja a'tel jumasa iti, yuj ja yip ja Dyos ya'wi'ex ja we'nlexi, me'xa tupuwex—

9—Mok a wi' a tak'inex 10mini jas oj ja wabyex b'a b'eji. A najb'ante'ex, a xanab'ex, a k'u' a wexex. Spetsanil ja ma' wax a'tiji, sb'ejni oj ajyuk yi jas oj yab'a.

11—Yajni la k'otyex b'a jun chonab' ma b'a jun yal ch'in chonab', job'owik yab'alil ta ay ma' oj yi'ex lek, ti la kanyex b'a snaj ja ma' oj yi'ex leki, man oj elanik. 12Yajni la ochyex b'a na'its jawi, a'wik yi dyos ja swinkil na'itsi, alawik yabye a ajyuke laman ja janek' ti aye tiwi. 13Ta yuj k'a wa sk'ana laman oj ajyuke, ojni sta'e'a. Ta yuj k'a mi sk'anawe cho mini oj sta'e'a.

14—Ta ay k'a jun na'its ma jun chonab' mix yi'ajex lek ma yuj mi sk'ana oj smaklan ja jas waxa walawexi, elanik ja b'a chonab' jawi, tsijunikan lek ja sts'ub' lu'um yi'oj wa wokexi, b'a jach' ti oj sna'e yuj mi waxa kisawex ja we'nlexi. 15Ja smeranili, wax kala wabyex, ja k'ak'u oj sk'el ja Dyos ja b'a lek sok b'a mi lek b'a stik'anali, ja kristyano jumasa jawi, mas jel tsats oj yi'e ja wokol ja ye'nle ke yuj ja jastal yi'aje ja swinkil ja Sodoma sok ja Gomorra.

Aji sna'e ja wokol jumasa

16—Ja a'tel b'a wax jekawex oj waj ja k'u'lukexi, ay swokolil, sok xiwela sb'aj. Lajan sok jastal oj jekxuk jun nole chej b'a yoj jun nole ok'il. Ja'yuj k'elan jakan ajyanik jastal ja b'its'il chani, cho ch'in a b'ajik jastal ja pumusi.

17—Talna b'ajex, ojni i'janik b'a sk'ab' ja ma' ay ya'teli, b'a yoj na'its b'a wa stsomo sb'aje'i, ti oj yajb'es jananik lek tiwi. 18Yuj ja we'n jneb'umanexi, ja'yuj oj i'janik b'a sti' sat ja niwak mandaranum jumasa, sok b'a sti' sat ja ma'tik ay scholi, jaxa we'nlexi, ojni a ta'onex ti' ja b'a sti' sat ja ye'nle'a, cho jach'ni b'a sti' sat ja wa moj we'nlexi.

19—Yajni ti'xa ayex b'a sk'ab'e'i, mok chamuk a k'ujolex yuj ja jas oj yal'e a wabyexi, cho mini ja jas oj a wal'ex ja we'nlexi, yuj ja k'ak'u jawi ye'n ja Dyos oj ya jak a k'ujolex ja jas oj ja wal'exi. 20Mi we'nlukex ja oj k'umananiki, ja'ni ja Yespiritu ja Dyos oj k'umanuk yuj ja we'nlexi.

21—Oj jakuk ja k'ak'u, b'a jun na'its ye'n ita mi oj yil sb'aje lek, jun winik ye'n ita oj yal b'a oj miljuk ja smoji. Ja tatal jumasa mi oj yil lek ja yuntikili, jaxa untikal jumasa mi oj cho yil'e lek ja snan state'i, man oj smil'e. 22—Spetsanil ja kristyano jumasa mi lek oj yil'ex yuj ja jneb'umanexi— Jaxa we'nlexi, yuj k'a oj a k'u'ukonex man b'a stik'anali, ke'nani oj koltanexa.

23—Jaxa yajni wa sk'ana oj syajb'esex ja kristyano jumasa b'a jun chonab'i, elanik ja tiwi, ka'axik b'a pilan chonab'. Ja smeranili, wax kala ja ke'n ja yuninon ja winiki, ja yajni mitox ch'aka b'ejtesex spetsanil ja schonab'il ja israelenio jumasa, jaxa ke'n oj kumxukon sok spetsanil ja yip ja Dyosi.

24—Ja neb'umani, mi ye'nuk mas niwan yuj ja je'umani, mini ja ma yib' k'ab'al ayi mi ye'n mas niwanuk yuj ja yajwali. 25Ja mas t'ilan sb'a jun neb'umani, ja' oj slaj ja jastal wa sna'a ja sje'umani, cho jach'ni ja ma' yib' k'ab' ayi ja t'ilan oj waj slaj ja jastal wa sna'a ja yajwali. Ta wan k'ax yala ja kristyano jumasa, ja jmoj ja pukuj ja ke'n, ¿Ja'uktoma ja we'nlex yuj ja jneb'umanexi?

Lekil ab'al

(Lc 12:2-7)

26—Mok ma' xiwanik yuj. Spetsanil ja jas nak'an ayi, oj ch'ak chiknajuk, cho jach'ni ja jas nak'ul ab'al ayi, oj k'otuk ja k'ak'u oj ch'ak na'xuki. 27Ay k'a jas oj kala wabyex b'a k'ik'inal, jaxa we'nlexi, alawik b'a sat k'ak'u. Yuj k'a ay jas nak'ul oj kala wabyex, jaxa we'nlexi, alawik yab' spetsanil ja kristyano jumasa b'a lu'umi. 28Mok xiwanik yuj ja ma' wa sk'ana oj sch'ay sna'jel wa kwerpo'exi, ja wa waltsilexi, mi jas oj b'ob' sk'u'luke yi. Mas lek ja' la xiwyex yuj ja Dyosi, ja ye'n ay yip b'a oj sch'ay sna'jel b'a yoj k'ak' wa kwerpo'exi sok wa waltsilexi.

29—Chab' yal chan kechan ita jun sentabo sts'akol. A'nima ja wa tatex tey b'a satk'inali, mini june ja yal chan jumasa jaw wax ch'ay sk'ujola. 30—Man stso'otsil a olomex ajtab' ay yuj ja Dyosi, ja'uk to ma ja we'nlexa—. 31Ja'yuj mi lom la xiwyex. Mas jel niwan wala iljiyex ja we'nlex yuj ja yal chan jumasa.

Ja ma wax yala jastal ja Jesusi

(Lc 12:8-9)

32—Ja we'nlexi, wan k'axa walawex ke yuj jneb'umanex jach'ni ja ke'n oj kal yab' ja jtat yujni jach' jastal jaw merana. 33Kechanta yuj waxa walawex yab' ja kristyano jumasa mi yuj ke'n jneb'umanex, jach'ni ja ke'n oj kal yab' ja jtat mini jachukuk jastal jawa.

Ja Jesusi ya sna' ja sneb'uman jumasa

(Lc 12:51-53; 14:26-27)

34—Moka wal'ex yuj jakel ka' laman ja kristyano jumasa b'a lu'um iti. Mi jakelukon b'a oj ka' laman, jakel ka k'e' ab'al k'umal sok jakel ka nijkuk ja wokol jumasa. 35Jakelon b'a mi oj ka yil sb'aj lek ja uninal sok ja stati, ja uninal ak'ix sok ja snani, ja ma' ochel k'ot alib'ajeli, mi oj yil sb'aj sok lek ja yalib' ixuki. 36Ja ma' mi lek oj yil sb'aj sok b'a jun na'itsi, ja' itani ja swinkil snaji.

37—Ja we'nlexi, yuj k'a ja jel oj ja yajtayex wa tatex sok wa nanexi, ma wa wuntikilex jumasa yuj ja ke'n, mini oj ochanik jneb'umanila. 38Mi k'axa kuchuwex ja wokoli, mi k'ax cho a nochowonex, mi oj b'ob' ochanik jneb'umanil. 39Kechan ita k'a ja waxa yajta wa kwerpo, jaxa wa waltsili, wanixa jipa yoj k'ak'a, kechanta yuj k'a waxa wa a b'ajex a'nima ti' la chamyex yuj ja ke'n, ja smeranili, ojni a ta' wa sak'anilexa.

Majtanal jumasa

(Mr 9:41)

40—Ay k'a ma' wax yi'ajex lek ja we'nlexi, jach'ni ja ke'n wanix cho yi'ajon leka. Cho jach'ni, ay k'a ma' wax yi'ajon lek ja ke'n, cho jach' sok ja Dyos it ma' sjekawon koni.

41—Ay k'a ma' wax yi'aj b'a snaj jun aluman Dyos ojni a'juk yi jun niwan smajtan yuj ja Dyosi, ja' ita yuj ja wa sna'a ja wa'n yaljel ek' ja yab'al ja Dyos ja aluman Dyos jawi. Ja majtanal jawi, ja lajan sok ja jastal wax a'ji yi'e ja aluman Dyos jumasa.

—Cho jach' oj a'juk yi jun niwan smajtan yuj ja Dyos ja ma oj yi' lek jun ma wa sk'u'an ja Dyosi. Ja majtanal jaw oj ya' ja Dyosi, ja lajan sok jastal oj a'juk yi ja ma' wa sk'u'an ja yab'al ja Dyos sok ja ma' wa sk'u'lan ja b'a leki.

42—Ja smeranil ja Dyosi, mi oj ch'ay sk'ujol oj ya'yi ja smajtan ja ma' oj ya'yi jun vaso che'el ja' ja sneb'uman jumasa, a'nima ja'uk junuk ja ma' jel ch'ini—.

Currently Selected:

Mateo 10: YABD

Highlight

Copy

Compare