Malaquias 1
1
Ja Dyosi, was yajta ja yuntikili
1-3Ja ke'n Malaquias ja jb'i'ili. Ja lo'il iti, ye'n yala kab' ja Dyos oj kal a wabyex ja we'nlex israelenio jumasa:
—Israelenio jumasa, ja Dyos wani syajtayexa—.
Jaxa we'nlexi, waxa job'owex:
—¿Jastal was je'a ki'tik ja syajal sk'ujol jaw b'a?—
Jaxa Dyosi ti yala'a:
—Na'awik t'unuk israelenio jumasa, ja ma' kala a wabyexi ja Jacobi mi ja'uk ja Esauji, ja b'ankilali ja Esauji. Cho na'awik t'unuk ke'n ka sutxuk jun takin lu'um k'inal ja slu'um ja Esauji, iday jun niwan yax k'ul ajyi. Ja ya'ni kechan ti wax ajyi tiw ja chante jumasa it jastal splanta ts'i'i. 4Ja yintil jumasa ja Esauji ta wan k'a sle'awe jastal oj sk'u'luke yajk'achil majke ja schonab'ile'i, ke'n wax kala oj cho ch'ak sna'jel ja jas oj sk'u'luk ja ye'nle'i. Jas lu'um ja Esauji wax na'xi sb'aj ajyi jastal Jun chonab' b'a b'ut'el toj kistal, jaxa schonab'ili wax na'xi sb'aj ja yuntikil ja Dyosi, petsanil k'ak'u tajkel sok. Ke'non ja Dyos it jel ja kipi, meran wax kala jach'ni oj ek' jastal jawa. 5Sok a sat we'nlex oj ja wil'ex, ja'yuj ti oj ja wal'exa: —Jas niwanil ja Dyosi, ek'elto yuj ja b'a tik'an wax ilxi.
Ja jas mi lek alji yab' ja pagre jumasa
6-8Pagre jumasa, ja Dyos kujtik it jel ja yipi, wa sjekawon b'a oj kal a wabyex ja we'nlexi:
—Ja untik jumasa a skis ja snan stati, jaxa a'tijum jumasa a skis ja yajwali. —Ja tatal jawi ke'nani'a cho ke'nani ja ajwalaloni, b'a'ya ja we'nlex pagre jumasa mixa kisawonex. Waxa wilawonex ke mi jas la makuniyon.
Ja we'nlex pagre jumasa waxa le'a jastal oj ja kolta ab'ajex, ti waxa job'owexa:
—¿Jas lom wa slokowotik ab'al ja Dyos b'a? ¿Jas k'ak'u mi jkisatik? ¿Jas k'ak'u mi lek jta'atik ti'i?—
Jaxa Dyos it jel ja yipi, ti yala'a:
Waxa wa'wex tajkukon ja kwando mixa kisawex ja kaltari, ja yajni waxa tsikawex ki ja chante b'a jmajtan b'a mi lekuki, mini t'un oj makunuk yuj ja lom mix ilwani, yuj ja lom tsats ja yok sk'ab'i sok yuj ja lom mi lek ayi. ¿Mi' maxa na'awex jachuki, mini sb'ejuka? Ta yuj k'a ja chante jumasa jaw ja oj ja wa'wex yi ja wa mandaranumexi, —Oj ni a wa'wex tajkuka sok mi oj yi'awi'ex lek.
9—¿Tsa'an yaj ni wax ch'ak a tsikex ki ja tik'e majtanal jastal jawi, wantox cho a k'anawex oj maklayex sok oj talna a ya'ulalex? ke'nani ja Dyos it jel ja kipi, kechan wax k'ana oj ja na'ex kan lek ja iti: 10—Ja jel lek wax kab' ja oj ja lut'ex kan ja b'a wax ajyi ochel jumasa ja snajtsil ja tsomjeli— Mok xa a wi'ex jan ki ja tik'e majtanal jumasa jastal jawi, ja jachuki jel xa axwiyonta a wujilex sok mini oj ki'awi'ex leka.
11—B'a spetsanil ja niwak chonab' jumasa b'a lu'um iti, ayni ma wa sna'a ja jastal jel niwanona, ja'yuj wax ya'we ki majtanal b'a lek. 12Jaxa we'nlex pagre jumasa spetsanil toj spakaxil waxa k'u'lanex: mixa kisawonex meran, sok mixa wilawex lek ja kaltar sok ja majtan jumasa wax a'jiki tiwi—.
13Ja we'nlex pagre jumasa ti waxa walawexa:
—Ja ka'teltiki, jel tsats—.
Jaxa ja Dyos it jel ja yipi, wax yala wabyex:
—¿Wan a maxa walawex yuj lek oj ki ja chante jumasa b'a mix b'ejyi sok ja b'a mi lek ay, oj ja wi'ex jan ki b'a jmajtani? Ja jastal jawi, ja yuj ja wa tajkelexi, ja'yuj ja waxa wi'ajex jan ki ja chante jumasa b'a mi lek ayi. 14—Jel kistal oj ek' yuj ja ma wa sk'apaki jun lekil chante, jaxa mero k'ak'u ja wax yi'aj jan ki ja b'a mi lekuki. Ke'non ja niwan mandaranumoni, spetsanil ja swinkil ja niwak chonab' jumasa wa skisawone— ke'non ja Dyos it jel ja kipi, ja jas wax kala yujni jach' oj k'u'l merana.
Currently Selected:
Malaquias 1: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
