Levitico 5
5
Tuk majtanal b'a oj ch'ayjuk ja mulali
1-6—Ay k'a ma wax payji b'a oj yal ja jas yila ma ja jas yab'i, yuj k'a wa snak'a mix yala stojol ja jas yila, wani sch'ika sb'aj mulala, sok ojni a'ji stup ja mulal jawa.
—Ay k'a ma syama sb'ak'tel jun cham chante ma jun b'its'il chan kistal, wani sta'a smula, cho jach'ni ja ye'n kistalni wax kana, a'nima mi sna'a sb'ej ja jas wa'n sk'u'lajeli.
—Ay k'a ma syama jun kistal yuj ti elel sb'aj jun ixuk ma winik, jach'ni ja ye'n juni kistala, a'nima mi sna'a ja jas wa'n sk'u'lajeli. Yajnix waj jak sk'ujol ja smuli ojni a'ji stupa.
—Ay k'a ma wax ta'wani ti' sok mi yuj jach' wajeluk sk'ujol. Wajto sna' sb'aj sta'a ta smul, ojni a'ji stupa.
—Ay k'a ma sle'a junuk ja mulal jumasa iti, t'ilan oj sna' jastal mi sb'ejuk, a ya'ki jun yal chej ma jun yal chiva b'a oj majtanuk yuj ja smul wa'n sle'jeli. Jun pagre oj ya'ki b'a stij sat ja majtanal oj ya ja ma sta'a smuli, jaxa ke'n ojni jch'ayi ja smula.
7-8—Yuj k'a mey yi'oj sts'akol b'a oj sman jun yal chiva ja ma sta'a smuli, oj b'ob' ya'ki chab' yal pumus, ma chab' yal tortola b'a jmajtani. A yi' och yi schab'il ja yal chan ja pagre, jaxa ye'n oj smilki june yuj ja oj ch'ay ja mulali, ja juni oj stsik yuj ja wa stoyowoni. Ja b'ajtan yal chani oj sts'otyi ja snuk'i mi oj sk'uts yi ja s'olomi; 9ja schik'eli, oj tsijuk yi t'usan b'a jun sts'e'el ja wax a'xi kajan jas majtan ja Dyosi, jaxa janek' oj kanuki, ti oj spek' b'a yuk'mal ja b'a wax a'xi kajan jas majtan ja Dyosi. Ja iti jun majtanal b'a oj b'ob' jch'ay ja mulali. 10Jaxa schab'il yal chani, oj stsik ja pagre yuj ja jach' wax k'ana, jach' jastal kalunej b'a oj jch'ay ja mulal ja ke'n.
11-12—Ja ma' oj sta' smuli, ta yuj k'a mey yi'oj sts'akol b'a oj sman ja chab' yal pumus ma ja chab' tortola, oj b'ob' ya'ki chab' kilo arina b'a lek b'a jmajtani. A yi'och yi ja pagre, jaxa ye'n oj yi' jun b'eche lek ja arina jawi, ti oj stsik b'a sat ja b'a wax a'xi kajan jas majtan ja Dyosi. Jach'ni ja we'nlexi ti oj jak a k'ujolex yuj ja ke'n wax ka'a spetsanil ja jastik jumasa. Ja iti jun majtanal b'a oj b'ob' jch'ay ja mulali, mok a wa'wex ochyi aceite sok pom.
13—Jach' oj ya'ki jastal it ja majtanal jumasa ja pagre, b'a jach' oj b'ob' jch'ay chikan ja stik'e mulal oj sta' ja kristyano'i.
—Ja janek' oj kanuk ja majtanal jumasa iti, ye'n oj yi' ja pagre, jach' jastal wax k'u'laxi sok ja sat te' jumasa.
14Ja Dyosi, cho yal yab' ja Moisesi:
15-16—Ay k'a ma mi sna'a oj ya'ki ja jas jb'aj ni ke'ni, wani sta'a smul jmoka, t'ilan oj ya'ki b'a jmajtan jun waw chej b'a mi yajb'eluk. Jaxa pagre ke'nani oj ya'ki ja chej jawa, jachuk ja ke'n ja ma' oj sta' smul jmoki ojni jch'ayi ja smula. Ma yuj wa sk'ana oj ya'ki tak'in ja'ni janek' oj sts'akoluk ja waw chej jawi, jaxa jun tajb'e b'a jujune syeni, ja sb'aj ja pagre. Ja sts'akol ja cheji, oj k'e'lxuk janek' oj tupxuk.
17—Ay k'a ma mi sna'a sk'oko ja kab'ali sok wa sle'a smul, t'ilan oj ya'ki jun jmajtan. 18Oj yi' jan yi jun chej ja pagre, ma oj yi' jan tak'in ja'ni jastal sts'akol ja cheji. Jaxa pagre ojni ya'ki ja majtanal jaw yuj ja ma sta'a smuli, jaxa ke'n ojni jch'ayi ja smula. 19Ja majtanal jawi, ja b'a oj b'ob' jch'ay sok ja mulal jawi.
Currently Selected:
Levitico 5: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
