Josue 2
2
Ja Rahab sok ja k'ela lu'um k'inal jumasa
1Ja Josue, sjeka chab' winik b'a oj waj sk'el jastal ja chonab' jumasa b'a Canaani, cho jach'ni ja chonab' Jerico. Ja chab' winike jawi, ti elye b'a chonab' Sitim, jaxa yajni k'otye b'a Jerico, ti waj jijluke b'a snaj jun ixuk jel sk'ana oj sta sb'aj sok winik, sb'i'il Rahab. Ti kan wayuke tiw ja a'kwal jawi. 2Yajni k'ot schikin ja mandaranum b'a Jerico k'otye chab' oxe israelenio ja a'kwal jaw ja waj sk'e'le' jastal ja chonab'i, 3ti sjeka aluman yab' ja Rahabi:
—Ja b'a wa naji ay chab' winik ja'ita jakel sk'e'le' jastal ja chonab'i. Jeka jan ki'tikon ili—
4Jaxa ye'n nak'an lek yuj, ti yala'a:
—Merani ye'na. Julyeni cha'wane'a, kechan, mix na'a b'a sb'aje'a. 5Ojxa och ja a'kwal ja elye'i, elyeto kan ja mitox lutxi ja b'a wax ajyi ochel ja b'a chonab'i, sok mi na' b'a wajye'a. Ta wan k'a la wajyex oj waj ja wi'ex spatik, ojni a laj'exa.
6Ja smeranili, yuj ti snak'unej b'a jun monton ts'okob' b'a s'olom snaj ja Rahabi. 7Ja swinik jumasa sjeka ja mandaranumi, elye ja b'a chonab'i, ti'xa lutxi ja b'a wax ajyi ocheli. Ja ma wa'ne sle'jeli, sle'awe lek, k'otye man b'a niwan ja' Jordan.
8Yajni ojxa och wayuke ja winik jumasa ma' nak'ub'ale'i, ti'xa k'e'ke ja Rahab ja b'a'ye'i, 9ti yala yabye'a:
—Ja ke'n wax na'a Dyos ya'ta a wi'ex ja lu'um iti, jpetsaniltikon jel wa'ntikon xiwel, jel wa'ne xiwel ja mandaranum jumasa. 10Yuj ja wax na'atikon lek, ja yajni elyex b'a Egipto, ja Dyosi ya takjuk ja niwan paman ja' it jel yakili, ja'ni b'a oj b'ob' ek' a k'utsex ja ja' jawi. Wax cho jna'atikon ja b'a k'ax niwan ja' Jordani, ti a milawex tiw ja Sihon sok ja Og, smandaranum ja amorreo jumasa. 11Yajni kab'tikoni, jel xiwtikon, ch'ak jkom jb'ajtikon. Jna'atikon ja wa Dyos we'nlexi, tey b'a satk'inal sok b'a lu'um. 12Ja'yuj alawik kab'i, b'a sb'i'il ja Dyos jawi, a yil lek ja kuntikil jumasa, jach' jastal kilawex lek ja we'nlexi. Je'awik ki jun senya ta yuj k'a oj ja k'u'lukexi. 13—Alawik kab' ta oj k'a a koltayex spetsanil ja kuntikili. —Koltayotikon ja b'a chamel ch'akeli.
14Ja winike jawi, ti yalawe'a:
—Ta ayk'a jas waj ek'uk a b'ajex ja we'nlexi, a'nima ke'n ti sch'aya jna'jeltikon ja Dyosi. Kechan mok ma a wal yab' ti ajyitikon ili. Yajnix ya'ki'tikon ja Dyos ja lu'um iti, ja k'ak'u jawi, ojni a'tijukon lek sok wa wuntikila.
Spila sb'aje, ja Rahab sok ja winike jumasa jawi
15Ja snaj ja Rahabi, ja' tojb'el sok lajan ja smakb'al ja chonab'i, ja'yuj b'a jun sbentana'il ja snaji, ti ya eluk ja winike jawi, jiman laso ya ko' k'ot man b'a spatik. 16Ti yala yabye'a:
—Nak'a a b'ajik b'a wits b'a jach' mi oj sta'ex ja winike ma sjekunej ja mandaranum b'a oj sle'exi. Ti la ajyiyex oxuk k'ak'u, malan wax kumxiye ja ye'nle'i; tsa'an ti'xa xa nochowex yi ja wa b'ejexa.
17Yajni ojxa eluke ja winike iti, ti yalawe'a:
—Ja jas kalatikon a wab'i ojni jk'u'ltikona. 18Yajni la jultikon ja b'a chonab' iti, ja chakal laso iti, ti'xa mocho b'a sbentana'il wa naj b'a wa elkotikoni. Tix ch'aka tsom spetsanil ja wa wuntikili. 19Kechan ta ayk'a ma oj el yujile, ojni chamuke'a, jaxa ke'ntikoni mini jmuluktikon ja ta ayk'a ma chama; kechan ta ti k'a ay b'a na'its ja yajb'esji, ke'nani jmultikona. 20Ja jas wax kalatiki, mok ma a wal yab'i; kechan ta ayk'a ma a wal yab'i, mi kocheluktikon ta mi k'a jk'u'lantikon ja jas wax kalatikon a wab'i.
21—Lek ay —jach'ni oj b'ob'uka. —xchi ja ixuki.
Kechan ja ch'ak yal'e jachuki, ti'xa wajye'a, jaxa ye'n ti kan syuch' b'a sbentana'il snaj ja chakal laso.
22Ja chab' winike jawi, ti wajye b'a wits, oxe k'ak'u ti snak'a sb'aje tiwi, man kumxi ja swinik jumasa ja mandaranumi. Sle'awe lek ja b'a b'ej jumasa, mini sta'a we'a. 23Ja chab' winike jawi, ti'xa ko'ye jan ja b'a witsi, ek' sk'uts e' ja niwan ja'i, ti wajye ja b'ay ja Josue, yajni ch'ak yal'e spetsanil ja jas yilawe'i, 24ti yalawe'a:
—Spetsanil ja lu'um jawi, wax na'atikon ya'taki'tik ja Dyosi. —Spetsanil ja ma'tik ay ya'tel b'a chonab' jawi, jel wa'ne xiwel.
Currently Selected:
Josue 2: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
