Oseas 4
4
Ja smul ja israelenio jumasa
1-2—Maklayik israelenio jumasa, ja jas oj yal ja Dyosi— Ja ye'ni wax yala wabyex:
Ja ke'ni ay jun jtiro sok
ja we'nlex israelenio.
Ja we'nlexi mi tojukex,
sok mixa yajtan ja wa mojexi.
B'a sutanal ja lu'umi wala milwaniyex sok wala elk'aniyex,
waxa le'awex ab'al sok mi meranuk ja jas waxa walawexi,
sok mi tojuk ayukex sok ja wa che'umexi.
Chikan b'a'yexa waxa k'u'lanex ja jas waxa k'ana oj ja k'ulukexi.
—Mi ma wa sna'a ta Dyos yuj jone'—
3Ja'yuj b'a spetsanil ja chonab'i
wax ok'ye sok jel cham sk'ujole,
sok wan chayel
ja chante jumasa b'a lu'umi,
b'a satk'inal sok b'a niwan paman ja'.
4—Ja ma wax le'a yi smuli
kechan ja pagre jumasa,
—mi ma' tuk oj ka smuluk—
5K'ak'u a'kwal was le'a ja smule'i,
wax cho ya'we sle smul ja aluman Dyos jumasa;
—Ja'yuj oj ch'ak sna'jel ja yintile jumasa—
6Ja kuntikil jumasa mi sk'ana
oj sna'e jb'aj jastal Dyos yuj jone',
Ja'yujil wane chamel.
—Mini ja pagre jumasa wa sna'awe jb'aj—
ja'yuj mix jk'ana oj
ya'tel tayone ja b'aj naji.
Ja jastal sch'ayaweta sk'ujole ja jmandar jumasa,
jachuk ja ke'n oj ch'ay jk'ujol ja yuntikile'i.
7—Yuj ka jel jitsan ajyi ja pagre jumasa,
mas jel jitsan ja kristyano was le'a smule moki;
Ja'yuj, sb'a oj ni ke ka'yi'e smajtane,
jel chin oj kil e'.
8Sok ja jmajtan wax ya' ki ja kuntikil
b'a oj ch'ayi ja smule'i,
ja we'nlexi waxa chonowex.
Ja'yuj waxa le'awex lek jastal
b'a oj sle ja smule ja kristyano jumasa.
9—Ja'yuj ja smeranili oj ka stup'
ja kristyano sok ja pagre jumasa,
10yuj ja lajan sta'a sb'aje ja sjipawoneta kani.
Ja'yujil a'nima jel xwa'ye,
minix b'ut'ye'a;
a'nima wa sle'awe lek jastal oj ajyuk yuntikile,
mini oj ajyuka.
Ja israelenio stoyowe ja k'u'lub'al dyos jumasa
11—Yuj ja lom wax ajyiye sok tuktukil ixuk wax yi'a sb'aje soki
yuj ja lom wax cho yakb'iye sok ya'al ts'usub'i,
jomel olom xa aye—
12Jel tsatse b'a wax yi'a sb'aje sok ja ixuke'i
ja sgusto'e ja tuktukil ixuki;
ja'yuj spilata sb'aje jmok ja ke'ni.
—Mix b'ob' sk'u'ajel—
ja kuntikil ja oj sk'an'e yi rason
xe'n ak'in te';
—yuj ma wax yalawe oj aljuk yabye yu jun lom te'
oj koltajuke b'a oj sna'e ja jas ojto ek'uki—
13K'e'anik ja b'a cha'an b'ujan jumasa,
jaxa b'a yaxub'il ja te' jumasa
awik yi tiw jas majtan ja wa dyosex jumasa;
—ja ixuk a wuntikilex sok wa walib'ex jumasa
jach wax ajyiye jastal jun ixuk tuktukil xta ay eke'—
14ja'xa ke'ni mi oj ka stup'e'
yuj ja wa sta'a sb'aje sok tuktukil winiki,
jachuk ja we'nlexi wax cho a wia' ab'ajex sok
ixuke jumasa wa stoyowe pilan dyos.
—Jun nole kristyano wax chay ja s'olome'i,
ja stik'anili oj ni ch'ay sna'jele'a—
15Jaxa we'nlex, israelenio jumasa
mixa wa'wex kan stoyjel ja pilan dyos jumasa,
—jayuj ja Juda mok waj snoch
jawa kistal modo'exi—
—Mok xa a toy'ex ja dyos jumasa jaw
b'a Guilgal sok b'a Bet-aveni—
—Mok xa a ta'ex ti lom ja jb'i'ili—
16Ja we'nlexi mi jas xa k'u'anex;
—mas jel chu'uyex ja we'nlex yuja mula—
Mixa k'ana oj yajtayex
jastal jun yal chej b'a k'ajyel yamjel.
17—Ja we'nlex israelenio jumasa,
yuj ka mixa k'ana oj ja wa'wex kan stoyjel ja k'u'lub'al dyos jumasa,
—mok awa'wex kan sk'ulajel—
18—Yajni wala yakb'iyexi,
wax waja le'ex ja ixuke it tuktukil xta ayi—
ja waxa k'anawex ja wa sak'anilex b'a mey sb'eji
b'a oj ajyanik ja jastal ja kristyano b'a jel toji.
19Yuj ja mixa wa'wex kan stoyjel ja k'u'lub'al dyos jumasa jawi,
jel oj k'ixwanik
yuj ja oj ch'ay a' na'jelexi.
Currently Selected:
Oseas 4: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
