Exodo 34

Cho sts'ijb'a pilan mak'e ja yab'al ja Dyosi

1Ja Dyosi, yala yab' ja Moisesi:

—I'ajan ki chab' laja ton, ja jastal it ka'wi b'ajtani. Oj cho jts'ijb'a a wi ja kab'al jumasa it ch'ak a b'uy'eli. 2Chapa a b'aj ja jecheli, sajto k'e'an b'a wits Sinaiji. Ti wax k'ana oj kil'a b'a scha'anil ja witsi. 3Mok ma wajuk a mok; mix k'ana oj kil kristyano ja tiwi, mini wakax sok mini chej.

4Ja Moisesi, stojb'es chab' laja ton ja jastal ja chab'e b'ajtani, sajto lek k'e' b'a wits ja pilan k'ak'u. 5Jaxa Dyosi, ti jak b'a jun nole ason, ti' sta'a sb'aj sok ja Moisesi, cho yala ja sb'i'ili. 6Yajni ek' ja b'a sti' sat ja Moisesi, ti yala tsatsa:

—Ke'n Dyos yujilone ja israelenio jumasa. —Ke'nani'a, ja jb'i'il ja it ka a na'exi—. Jun niwan Dyoson, ay syajal k'ujol. Mi la tajkiyon, jaxa syajal jk'ujol sok ja kuntikili, jel niwan. 7Ja syajal jk'ujoli junxta ay, ja ma wa sle'a smuli oj ni jch'ayi'a. Jaxa untikali, ijali, yuntikil ja ijali, sok ja yij ja ijal jumasa, spetsanil ja iti, ta mi k'a xk'okxi ye'i, oj ni ka stup ja smule'a.

8Yaj ni yab' ja Moisesi, ti ko' nujana, man sta'a k'ot ja lu'um ja spatani, ti och stoy ja Dyosi, 9ti yala'a: —Dyos kuj. Ta meran k'a waxa k'anawoni, mojtayotikon b'a. Wanixa wila jel ch'u'uyotikona, mok a wi' niwan ja jmultikoni, ilawotikon jastal a chonab'il.

Ja Dyosi, ya'a jun strato

10Ja Dyosi, ti yala yab' ja Moisesi:

—Maklan lek ja jas oj kal a wab'i, oj ka' jun jtrato sok ja wa moj jumasa. Oj k'u'l niwak senya mini b'a wa ilxi b'a lu'umi. Spetsanil ja chonab' jumasa b'a oj ajyaniki, oj ja wil'ex ja jas oj b'ob' sk'uluk ja Dyos yuj ja israelenio jumasa.

11—Oj k'a a k'u'ukex spetsanil ja jas kalata a wabyexi, ja'yuj spetsanil ja kristyano ma mi sk'u'anoni, oj ch'ak jnuts ele, jaxa schonab'ile'i we'n oj ka'wi'ex.

12—Ja we'nlexi oj ni ochanik ja b'a lu'um k'inal it jk'apunej a wi'exi. Mi ja strato oj b'ob' a k'u'lukex sok ja ma tey tiwi, b'a jach' mi oj ja noch'ex ja jas mi lek wa sk'u'lane'i. 13Jaxa we'nlexi, ch'akan b'uyuwik el ja yaltare sok ja sdyose k'u'lub'ali.

14—Mok a toy'ex tuktukil dyos, ja'yuj ja ke'n jun Dyos wa la tajkiyon.

15—Mok a k'u'ukex ja jas oj yala wabyex ja kristyano jumasa jawi, ja'yuj oj slok ex ja b'a wa stsomo sb'aje b'a wa stoyowe ja dyos yujile'i, ta mik'a ojto waj a na' a b'ajex ja wa'nex stoyjel ja sk'u'lub'al dyos yujile'i, 16ma oj ja wa'wex nupanuk ja wa wuntikilex kerem sok ja ak'ixuk sb'aj ye'nle'i, jaxa yajni xwaj stoy e' ja dyos yujile' k'u'lub'ali, oj ni cho wajuk ja wa wuntikil we'nlexa ja jachuki oj ni sta' smule jmoka.

17—Mok a k'u'lukex jun dyos tsikub'al tak'in b'a oj ja toy'ex.

Ja k'in jumasa b'a jujune' jab'ili

18—K'u'lanik ja sk'inil ja wa'el it mey yi'oj levadura. Juke k'ak'u oj ja wabyex ja wa'el jawi, ja'ni oj ja tsajlayex ja jas kaloj a wabyexi. Ja k'ini, ja'ni oj ja k'u'lukex ja yixawil Abib,#34:18 15 ja Marso sok 15 ja Abrili. yuj ja ixaw it ja elyex b'a Egipto.

19—Ja sb'ajtanil a wuntikilex keremi jb'ajni ke'na'a, cho jach'ni ja sb'ajtanil wakax ma chej b'a swawi. 20Ja sb'ajtanil burro b'a swawi, oj b'ob' a wa'wexki jun yal waw chej ma chivo. Kechan ta mik'a oj ja wa'ex, ch'ob'owik yi ja snuk' ja yal burro jawi. Cho jach' k'u'lanik yuj ja sb'ajtanil a wuntikilexi, t'ilan oj ja wi'ex jan jun jlimosna yuj ja ye'nle'i. Mi ma' oj b'ob' jak stoy'on ta mik'a ay jlimosna a wi'ojex jani.

21—Wake k'ak'u oj b'ob' a'tijananik, jaxa b'a sjukili oj jijlanik, a'nima ja'uk ja sk'ak'u'il sts'unjel wa jastik a b'ajexi, ma ja'uk sk'ak'u'il stuljeli.

22—Cho jach'ni jel t'ilan oj ja k'u'lukex ja sk'inil ja jastik wax el a wujilex b'a takin lu'umi, sok ja sk'inil ja lejchupat b'a sk'ak'u'il ja'i.

23—Spetsanil ja keremtik b'a ay xa sjab'ile yuj ja israelenio jumasa oxe ek'ele' t'ilan oj jak stoyone ja jun jab'ili. Yuj ja ke'n Dyos yuj ja israelenio jumasa. 24Ke'n oj ch'ak jnuts el ja tuk kristyano jumasa, b'a oj ajyuk lek ja wa lu'um we'nlexi. Yajni oj jak a toy'onexi mi ma oj yal sb'aj ye'nle ja wa lu'umexi.

25—Yajni oj ja tsik ex ki jun chante b'a sti jsati, mok a wa'wexki lajan sok ja schik'eli, sok mini ja waj it ay yi'oj levadura. Mok a nol'ex kan sb'a pilan k'ak'u ja sts'ub'il wa'el sb'a k'in sya'al k'inali.

26—Ja sb'ajtanil sat sok b'a lektik lek ja sb'a'al wa walajexi, ja' oj ja wi'ex och b'a snajtsil ja stsomjeli.

—Mok a ts'an'ex ja yal chivo b'a wantox chu'ni.

27Ja Dyosi, ti yal yab' ja Moisesi: Ch'akan ts'ijb'an spetsanil ja iti, yuj ja tey yojol ja trato it wa xk'u'lan amok sok ja israelenio jumasa. 28Ja Moisesi, ti kan sok ja Dyos b'a wits chab' tajb'e k'ak'u sok chab' tajb'e a'kwal. Ti waj ts'ijb'anub'al tiw b'a chab' laja ton ja lajune yab'al ja Dyosi. Spetsanil ja k'ak'u jawi mi wa'i, sok mi yu'aj ja' ja Moisesi.

Ja Moisesi, ko'jan b'a wits Sinaiji

29Yajni ko'jan b'a wits Sinai ja Moisesi, ti yi'oj jan ja chab' laja ton b'a ts'ijb'anub'al ja yab'al ja Dyosi. Ja sati wa xlijpi, b'a' miyuka ja' smoj ajyi ja Dyosi, jaxa Moisesi mi wa sna'a ta yuj wa'n lijpel ja sati. 30Yajni yilawe ja Aaron sok ja israelenio jumasa wa'n lijpel ja sat ja Moisesi, jel xiwye mi ochye mojan sok. 31Jaxa Moisesi, spaya t'ilan b'a oj lo'lanuk soke. Ja ochye b'ajtan ja Aaron sok ja ma'tik niwak ja ya'tel yuj ja israelenio jumasa, 32tsa'an ti och jan spetsanil ja kristyano'i. Jaxa Moisesi, ti ya'a b'a sk'ab'e ja yab'al jumasa ja Dyos it a'ji jan yi b'a wits Sinaiji.

33Yajni ch'ak lo'lanuk sok ja kristyano ja Moisesi, ti smaka ja sat sok jun k'u'utsa. 34-35Ja k'u'uts jawi, ti'ni wax ajyi b'a sat man wax och b'a yoj na'itsi ja Moises b'a oj sk'umuk ja Dyosi, ti'to wax ya eluk ja yajni wax cho eli, wax ch'ak yal yab' ja kristyano ja jas alji yab' yuj ja Dyosi. Jaxa kristyano jumasa wanix yila wa'n lijpel ja sat ja Moisesa, ja'yuj t'ilan wa smusu sok ja k'u'utsi.

Currently Selected:

Exodo 34: YABD

Highlight

Copy

Compare