Exodo 26

Ja snaj ja Dyosi

1-2—Ja b'a snaj ja Dyosi, wax k'ana oj ja k'u'l lajune sk'u'utsil b'a lajchawe metro sok snalan ja snajtili, b'a chab' metro ja sati, ja b'a k'u'uts jawi, ja tiwi ti oj tojb'uk kan chab' yanjel querubin ja Dyosi, ts'isub'al sok ts'okob' oj tojb'uk kani, ja k'u'uts jawi, t'ilan b'a lek, sok tuktukil yelaw, chak muk muk, k'ik' muk muk, sok chak, ts'isub'al lek oj kanuk.

3Ch'akan ts'isa ja k'u'uts jumasa jawi, a sta' sb'aj jo' poje b'a june'ita oj kanuk, chab'e oj ja k'u'luk jo'tike poje b'a jujune. 4-5A' a lokan ja chab' k'u'uts jumasa, a sta' lek sb'aj ja sti'tiki, ja jun b'ajtani a och chab' tajb'e sok lajune (50) sjokolab'il b'a morado, cho jach'ni ja juni ayi chab' tajb'e sok lajune (50) sjokolab'il. 6Ti xwa sta' sb'aj schab'il ja k'utsi, sok chab' tajb'e lajune (50) sgancho'il b'a toj k'anal tak'in, b'a june ita oj kanuk ja snaj ja Dyosi.

7-8—Wax cho jk'ana oj ja k'u'l juluch (11) poje k'u'uts sok tso'otsil chivo, b'a oj musxuk sok ja snaj ja Dyosi. B'a jujune' poje oj ja wa'yi ox lajune metro sok snalan ja snajtili, jaxa sati a'yi chab' metro. 9-10A sta' sb'aj jo' poje, b'a june ita oj kanuk, a ochyi chab' tajb'e sok lajune (50) sjotol, cho jach' jun xta oj ja k'u'lyi ja wak poje'i, june ita oj kanuk, a cho ochyi ja sjotol jastal ja b'ajtani, jaxa swakil poje'i oj pakxuk kan b'a stojol musanxa ja na'itsi. 11B'a schab'il ja niwak k'u'uts jawi, a sta' sb'aj sok chab' tajb'e lajune sgancho'il b'a bronce, june ita oj kanuk. 12-13Ja jun lib'e'i, najat jun metro yuj ja na'its b'a wax ajyi ja tsomjeli, a'kan lokan nalantik metro b'a jujune' stojol b'a jach' oj kan makan ja spatiki. 14Ja niwan lib'e k'u'uts jawi, oj cha wa ochyi jun niwan lib'e ts'ujmil chej yelaw chak, b'a sat ja ts'ujmil cheji, oj wa och pilan ts'u'um b'a lek yuj ja juni.

15-25—Ja smakb'al yib'el ja na'itsi a ochyi ak'inte' sb'i'il acasia. A och jun tajb'e ak'inte b'a ko'eli, cho jach'ni b'a k'e'eli, wake b'a stojol wax och ja k'ak'u, la kaltik ja b'a spatik yuj ja snajtsil ja tsomjeli, a och chab'e smoj ja b'a jun xta stojol jawi, jujune b'a schikin. Ja chab' ak'inte' b'a stop ja snajtsil ja tsomjeli, ja oj waj slaj ja scha'anil b'ay ja yargoya'il ja k'u'tsi. Spetsanil ja ak'inte' jumasa t'ilan chantike metro sok snalan ja snajtili, b'a ox ch'ile sok snalan ja sati, jujune' ak'inte' oj b'ob' yuk'mal b'a oj sta' sb'aj lek. B'a jujune' yuk'mal oj ochkan xe'n sakal tak'in, b'a jach' oj sta lek yip jujune' ak'inte' yuj ja tak'in jawi.

26-27—Tojb'es jo' lajune te' b'a acasia: Jo'e' oj yipuk ja ak'inte' b'a k'e'eli, jo'e' b'a ko'eli, sok jo'e b'a wax och ja k'ak'u. 28Ja ste'il oj och b'a snalani, t'ilan oj elk'ot man jun sts'e'el, sok t'ilan ti oj ek' b'a snalan ja ak'inte jumasa. 29Spetsanil ja te' jumasa oj ochuki, oj ch'ak a pots sok k'anal tak'in, jach'ni ja ak'inte' jumasa oj ch'ak wa och yargoya'il, b'a oj ek'uk ja ste'ili. 30Jach' oj ja k'u'luk ja na'its, ja jastal je'a wi' b'a witsi.

Ja sk'u'utsil ja na'itsi

31—Cho k'u'lan jun k'u'uts b'a tuktukil yelaw, b'a chak muk muk, k'ik' muk muk, b'a chak, sok jun k'u'uts b'a mi tukuk. Le'a jun ma oj sna' stojb'esjel chab' yanjel querubin ja Dyosi. 32-34A och sgancho'il b'a k'anal takin, le'a chane te' potso sok k'anal tak'in, sok tix wa' k'e' lokan tiw ja k'u'uts jawi. B'a jujune' te' a ochyi jun mak'e sakal tak'in.

—Ja k'u'uts jawi, ja oj makunuk b'a oj spil ja chab' lugar mi tukuki. Ja lugar b'a tsa'ub'ali ti oj ja wa' ja skajonil ja trato sok ja smajkili. 35Jaxa mesa sb'a wa'el it oj ja wa'wex ki'i, ti'xa wa'a b'a lugar it pilub'ali. Jaxa kandelerio ti oj kan b'a sti' sat ja mesa.

36—Ja b'a oj ajyuk ochel och b'a yoj na'itsi, wax k'ana oj ja tojb'es jun sk'u'utsil b'a tuktukil yelaw, b'a chak muk muk, k'ik' muk muk, b'a chak lek, sok pilan k'u'uts b'a jel lek. 37A ochyi sgancho'il b'a k'anal tak'in, le'a jo'e ste'il potso sok k'anal tak'in, tix wa' k'e lokan tiw ja k'u'utsi, jaxa te' jawi, a ochyi jun mak'e sakal tak'in b'a oj ya' lek yip, —xchi ja Dyosi.

Currently Selected:

Exodo 26: YABD

Highlight

Copy