Exodo 10
10
Swaxakil wokol: Ja k'ujlub' jumasa
1Ja Dyosi, yala yab' ja Moisesi: —Ka'ax kax je'a a b'aj yi' ja mandaranumi. Ke'n ka'ta ch'u'uy b'uk ja sk'ujole sok ja ya'tijum jumasa, b'a jach' oj b'ob' je'yi'e ja kipi, sok oj yil'e' niwak wokol jumasa. 2B'a jach' oj b'ob' a wal yab' ja wa wuntikil sok wa wij jumasa, spetsanil ja jas a wila jk'u'lan yi'e ja egipsiano jumasa, yuj ja mini t'un wax kisawe'a, b'a jach' oj sna'e, ke'n Dyos yujon ja israelenio jumasa.
3Ja Moises sok ja Aaroni, ti waj ye b'a sti' sat ja mandaranumi, ti yalawe yab'a:
—Ja Dyos yuj ja israelenio jumasa, sjekawon b'a oj job' a wi', jas k'ak'u oj ja wa'kan ja jastal jel niwan waxa wa a b'aji. ¿Jas k'ak'u oj ja wab' sb'ej? Jekawotikon b'a oj waj toytikon. 4Ta yuj k'a mi oj ja k'u'uki, ja Dyosi, jechel b'i was b'ut'u el k'ujlub' ja wa chonab'ili, 5oj ch'ak slech ek' sb'aj ja b'a lu'umi. Ja k'ujlub' jumasa jawi, ja oj yabye ja yal te' jumasa, sok ja niwak te' ya'kan ja tsatsal b'at it ek'ta, 6sok ojni sb'ut'e ja chonab' Egipto'a. —Mini jawa nan a tat wa me'xep a tat awel yila ja jastal it niwan mandaranum.
Yajni el ja Moises b'a niwan na'itsi, 7ja a'tijum jumasa, ti yalawe yab' ja mandaranumi: ¿Jas ma k'ak'u oj ya'wotikan laman ja winik iti? —Kechan wa'n ya'jel ki'tik wokol. Jeka soke ja kristyano jumasa niwan ajwalal, a waj stoy'e ja Dyos yujile'i. ¿Niwan mandaranum, mi maxa wila kanta jach' ja Egipto b'a?
8Jaxa mandaranumi, ti sjeka spay jel ja Moises sok ja Aaroni, ti yala yabye'a:
—Lek ay, kax toyowik ja wa Dyosexi. Kechan alawik kab' b'ajtan mach'tik junuk ja oj wajuki.
9Ti yala ja Moisesi:
—T'ilan oj ch'ak wakotikon petsaniltikon, yuj oj waj k'u'ltikon jun niwan sk'inil ja Dyos kujtikoni. Petsaniltikon oj wajkotikon, sok ja keremtik jumasa, sok ja ma'tik ay xa sk'ujoli, sok ja kuntikiltikon jumasa, oj ch'ak ki'tikon spetsanil ja jchejtikon sok ja jwakaxtikoni.
10Jaxa mandaranumi, sok stajkel yala, ti yala jastal ita:
—A jachuk, lek ay. —A smojtayex ja wa Dyosexi. ¿Yuj a ma waxa neb'awex oj jek a mokex ja wa wuntikilexi? Ja we'nlexi, yuj wa'nex sneb'jel oj ja pak ex ajnel. 11Mi jach' oj k'u'laxuk ja jastal waxa k'anawexi. Ta meran k'a waxa k'ana oj ja toy'ex ja wa Dyosexi, a wajuke kechan ja winik jumasa, —xchi ja mandaranumi.
Jaxa ya'tijum jumasa, ti'xa ya' el sti niwan na'its ja Moises sok ja Aaroni, 12jaxa Dyosi, ti yala yab' ja Moisesi: —Lika cha'an wa k'ab'i, al yab' ja k'ujlub' jumasa a ochuke b'a spetsanil ja yoj chonab'i, a ch'ak sk'ux'e' spetsanil ja tek'ul jumasa ya'kan ja tsatsal b'ati.
13-14Ja Moisesi sk'u'an ja jas alji yab'i, jaxa Dyosi, juts'in sjeka jun tsatsal ik', ti k'e' stulyi b'a stojol wax jak ja k'ak'u ja ik'i, snajtil ja k'ak'u sok snajtil ja a'kwal ya'a. Ja ik' jawi yi'aj jan jitsan k'ujlub', yajni el ja pilan k'ak'u b'ut'elxa k'ujlub' ja yoj chonab'i, —Ja jastal iti, mini b'a yilawe ja janek' ek'ta ja k'ak'u jumasa jawi. 15—Mini ja lu'umi, mix b'ob' ilxuk. Ja k'ujlub' jumasa ch'ak yujile ja tek'ul jumasa b'a ya'kan ja tsatsal b'ati. 16Ja mandaranumi, juts'in sjeka spayjel ja Moises sok ja Aaroni, ti yala yabye'a: —Jel kistal ja jas wa xk'u'lan yi ja wa Dyosexi cho jach'ni sok ja we'nlexi. 17Oj jk'an a wi'ex ts'akatal, mok a wa'wex jtup ja jmuli, cho k'anawik yi wa Dyosex a ya eluk ja k'ujlub' jumasa, wa'nxa smiljel ja kristyano'i, ma ta miyuk, —A'nima kechan aya' eluk ja b'ayon ja ke'n.
18-19Ja Moisesi ti el b'a niwan na'itsi, ti och sk'an yi ja Dyos yuj ja mandaranumi. Jaxa Dyosi ya jak jun tsatsal ik', ch'ak sju'el ja k'ujlub' jumasa, ti ch'ak sjip ko b'a yoj niwan paman ja', —Jachuk mi jas k'ujlub' kan ja b'a chonab' Egipto. 20Jaxa Dyosi, cho ya ch'u'uy b'uk yi ja sk'ujol ja mandaranumi, mi ya eluk ja israelenio jumasa.
Sb'alunil wokol: Ja k'ik'inali
21Ja Dyosi, ti cho yala yab' ja Moisesi: —Lika cha'an wa k'ab'i, ala b'a spetsanil ja chonab' b'a Egipto a kan k'ik'inal. Yuj ja k'ik'inal jawi, jel tuk oj yil ja egipsiano jumasa.
22Ti slika ja sk'ab' ja Moisesi, oxe k'ak'u lek k'ik' b'i kan ja chonab' Egipto. 23K'ik'inal kan, mix b'ob' yil sb'aje' sok mix b'ob' b'ejyuke ek'e, jaxa b'ay ja israelenio jumasa ay k'ak'u. 24Yajni yila ja mandaranum ja jastal iti, ti spaya ja Moisesi, ti yala yab'a:
—Kax toyowik ja wa Dyosexi. I'ajik wa wuntikilexi, kechan a'wikan il ja wa chejex sok ja wa wakaxexi.
25-26Ti yala ja Moisesi:
—Mini xb'ob' oj ka'tikon kana. Oj ch'ak ki'tikon spetsanil ja jwakaxtikon sok ja jchejtikoni. Mix na'atikon jaye chante oj miltikon, ye'n oj yal kab'tikon ja Dyos ja yaj la k'otikoni. Jach'ni ja we'nlexi, sb'ej jel oj ja wa'wex ki'tikon ja chante b'a oj tsiktikon b'a sti' sat ja Dyos kujtikoni.
27Ja mandaranumi, cho a'ji ch'u'uy b'uk yi ja sk'ujol yuj ja Dyosi, jach' mi ya eluk ja israelenio. 28Ja'yuj ja mandaranumi, ti yala yab' ja Moisesi:
—Elan ja ili. Ja lek mok jak a je'a b'aj ja b'a sti jsati. Ta yuj k'a oj jakan pilan majke ja ili, oj jek milumana.
29Ti yala ja Moisesi:
—Lek ay, mini wax k'ana oj kil wa sata.
Currently Selected:
Exodo 10: YABD
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México 2021
