Efesios 4

Ja moj alijeltik jumasa

1Ja ke'n ja ti lutanon yuj ja wax kala ja yab'al ja Kajwaltik Jesusi, wax k'ana wi'ex pabor jach' la ajyiyex ja we'nlex jastal wax ajyiye ja ma' tixa aye sok ja yuntikil ja Dyosi. 2Jun k'ujol a ab'ajik, a ab'ajik lek sok yajtananik, sok syajal a k'ujolex kolta a b'ajik sok wa mojex jumasa. 3Le'awik jastal laman oj ajyanik, b'a jach' mi oj ja ch'ay'ex ja jastal ya'ta a tsom a b'ajex ja Espiritu Santo. 4Moj alijelxa b'ajtik ja janek' k'u'antikta ja Dyosi, kechan june ja Espiritu Santo, jaxa Dyosi, ya sb'i'iluk kechan june ja sniwanil jk'ujoltik b'a oj jta' jkoltajeltiki. 5Kechan june ja Kajwaltiki, june ja ma' wax k'u'antiki, june ja jastal wax ki'ajtik ja'i. 6Kechan jun Dyos ay, ye'nani Tatal b'a spetsanila, ye'n wax ya'telta b'a spetsanil, ye'n wa sk'ela b'a jpetsanil, sok tey b'a spetsanil.

7B'a kada jujunotik ja ke'ntiki ye'n ya'a ki'tik ja kiptik ja janek' wa sk'ana oj ya'ki'tiki. 8Jach' wax yala jastal it ja b'a ts'ijb'anub'al ja yab'al ja Dyosi:

—Yajni k'e' b'a satk'inali,

jel jitsan yi'aj ja ma' mi libre'uk ajyi,

sok ya'yi yipe ja kristyano jumasa—.

9¿Jasun wa sk'ana yal yuj ja wax yala —k'e'i?— Ja jawi, wa sk'ana yale, b'ajtan cha'an lek ko' b'a yib' lu'um. 10Ja ma ko'jani, cho ye'nani ja ma' cho k'e' b'a cha'an lek b'a satk'inali, b'a jach' oj sb'ut' spetsanil ja lu'um k'inali. 11Ye'n ja ma' ya' yi schol b'a oj och jekab'anumili; jaxa tuki ya och aluman Dyosil; ay ma ya' och b'a oj schol ek' ja yab'al ja Dyosi; Ay ma ya och b'a oj stalna ja yuntikil ja Dyosi, sok ay ma ya och b'a oj sje' ja yab'al ja Dyosi. 12Jach' sk'u'lan jastal iti, b'a jpetsaniltik ja janek' moj alijel jb'ajtiki, ke'n ja skwerpo'otik, b'a jach' chapan oj ajyukotik b'a oj ka'teltatik sok b'a oj je'tik yi'e ja moj alijeltik jumasa. 13B'a jach' oj iljuk yujni tsoman aytika, sok ojni k'otuk ja k'ak'u oj jta'tik spetsanil ja jas mey ki'ojtiki; toj oj ajyukotik jastal ja Kajwaltik Jesús yuj ja wanxax na'atik sb'aj ja ye'n ja yunin ja Dyosi, sok yuj ja ye'n wax ka' niwan jk'ujoltiki. 14Mokxa jlajtik jastal ja yal untiki, ja ya'n ay jas wan ek'el sk'ujol, tsa'an pilanxa jas wa'n ek'el k'ujol, mi wokoluk wax lo'lajiye yuj ja tantik ma mi ja'uk wax yalawe ja yab'al ja Dyosi, wa sle'awe jitsan jastal oj slo'laye ja kristyano jumasa. 15B'a'ya yuj ja syajal k'ujolali, t'ilan oj ya k'umanukotik ja smeranili, b'a jachuk sok spetsanil ja jas oj k'u'luktiki, ja t'ilan oj lajtik ja Kajwaltik Jesús ja ma it tixa aytik b'a yib sk'ab'i. 16Ye'n ja Kajwaltik Jesús ja wa'n ya'jel sta' sb'aj b'a kada jujune ja moj alijeltik jumasa, ja'ni chikan jastal ja scholtik b'a jujune'i, cho ye'nani tsoman wax ya a'tijukotika, b'a jach' takal takal oj pojxuk ja jmoj alijeltik jumasa, sok oj ya' kiptik yuj ja syajal k'ujoli.

Ja yajk'achil jsak'aniltiki

17Jaxa ya'n wax k'ana a wi'ex sok ja sb'i'il ja Kajwaltik Jesusi, mokxa jach' ajyanik jastal ja ma mi wa sk'u'an ja Dyosi, ja yuj ja ye'nle'i, lajan sok mini chink'inal ayuke'a. 18Ja ye'nle'i, mi jas sna'awe sok jel ch'u'uy ja sk'ujole'i, mi jas wax yabye sb'ej, ja'yuj mix yilawe slekil ja sak'anil wax ya'a ja Dyosi. 19Mixax k'ixwiye, sjipata sb'aje sk'ulajel ja b'a mi lekuki, mix k'ixwiye wa sk'u'lane ja jastik jumasa b'a mey sb'eji.

20—Jasa ja jastal iti, mi ja'uk a neb'awex ja we'nlex ja k'ak'u a k'u'anex ja Kajwaltik Jesusi—. 21Yuj ja a wabyex ja we'nlex ja yab'al ye'n sok waxa na'a jastal oj ajyanik ja jastal wa'n yaljeli, waxa nochowex ja smeranil ja jas sje'a wi'ex ja ye'ni. 22Ja'yuj mokxa jach' ajyanik sok mokxa kumxanik ja jastal ajyiyex b'ajtan ja ye'n wax yi'ajex ajyi ja jas mi lekuki. 23-24Ja we'nlexi sb'ej oj ja tukb'esex juntiro wa pensarexi, je'a b'ajik meran ke toj ayex smeranil, jach' jastal ma' ye'n cho stojb'esta ja Dyos b'a jach' oj ajyuk jastal ja ye'n.

Ja jastal oj ajyukotik ja ya'n

25Ja'yuj mixa sb'ejuk oj ja le' a wab'alil a b'ajex sok ja wa mojexi. Jpetsaniltik lajan sok jun ita kwerpo ayotik, ja'yuj spetsanil k'ak'u k'umananik ja smeranili.

26Yuj k'a wala tajkiyex, mok a le'a mulex yuj ja jawi. Ja tajkeli, mok wa alb'uk snajtil k'ak'u, 27Mok a wa' ab'ajex b'a oj slo'layex ja tan pukuji.

28Ja ma' ja schol ja elk'anel ja b'ajtan jani, jel t'ilan oj ya'kan ja jastal jawi, ja ya'n jel t'ilan tsats oj a'tijuk sok ja sk'ab'i. B'a jach' oj sta ja tak'in b'a oj b'ob' skolta ja ma wokol ayi.

29Mok jas mi sb'ejuk oj ja wal'exi. Mas lek ja k'umananik tsamal b'a spetsanil k'ak'u, koltayik ja tuk jumasa b'a oj k'i'uke tsamal sok ja yab'al ja Dyosi, ja jawi, jelni t'ilana.

30Mok a wa'wex axwuk ja Espiritu Santo sb'a Dyosi, ja jawi, lajan sok jastal jun seyo b'a wax ya'wi'ex ja Dyosi, b'a jach' oj sna' a b'ajex ja yajnix k'ot ja k'ak'u oj elanik b'a mixa oj ja le' wa mulexi.

31Aktayikxa kan ja cham k'ujol sok ja tajkeli. Mok awananik yutjel ja wa mojexi. Aktayik kan ja jas mi sb'ejuki. 32Je'a b'ajik lek, jun k'ujolukex sok ja tuk wa mojex jumasa, mok wa tup a b'ajex ja jas mi lek waxa k'u'lanexi, jach' jastal sk'u'lan a wi'ex ja Dyos ja we'nlex mi ya'a tup wa mulex yuj ja sts'akatal ja Kajwaltik Jesusi.

Currently Selected:

Efesios 4: YABD

Highlight

Copy