Hechos 23

1Ja Pablo ti sk'ela spetsanil ja junta'anum jumasa, ti yal yabye'a:

—Kamigo israelenio jumasa, ja ke'n jel laman ay wax kab' ja jk'ujoli, man ya'n wa'non sk'u'ajel spetsanil ja jas wax yala ja Dyosi.

2Jaxa Ananias ma' niwan ya'tel yuj ja pagre jumasa, ti yal yab' ja ma' ti mojan ay sok ja Pablo a'b'i spok'tsuke yi ja sti'i. 3Jaxa Pablo ti yal yabye'a:

—Ye'n ja Dyos ja ma oj syajb'esa ja we'n, —Chab' k'ujol aya; ja we'n jel sb'ej oj ja k'el ja jmuli, ja'ni jastal wax yala ja niwan mandari, jaxa iti, me'xa k'ela lek jastal ay, ¿Jasyuj ja wa'na sk'okjel ja waxa wala a yajb'esjukon b'a?

4—Jaxa tuk judio jumasa ma' ti aye b'a junta, ti yalawe yab'a:

¿Jasyuj ja waxa k'ak'la ja ma' niwan ya'tel yuj ja pagre jumasa sb'a Dyos b'a?

5Ti yala ja Pablo:

—Kamigo jumasa, ja ke'n mix na'a ta ye'n ay niwan ya'tel yuj ja pagre jumasa. Merani'a, ja b'a ts'ijb'anub'al ja yab'al ja Dyosi, wax yala mi oj ta'tik ti' b'a mi sb'ejuk ja ma' niwan ya'tel kujtiki, —xchi ja Pablo.

6Wajto yil ja Pablo ay chab' oxe judio b'a junta, jun k'ole saduseo, jaxa pilan k'ole'i, fariseo, ti yala tsats leka:

—Jmoj alijel jumasa, ja ke'n fariseo'on cho jach' jitsan ja jmoj alijel jumasa fariseo ja ye'nle'i. ¿Jasunk'a jmul waxa ta'awex ki b'a? ¿Ma ja'yuj ja wax k'u'an oj sak'wuk ja ma chamta?

7Kechan ja ch'ak yal ja jastal jaw ja Pablo, jaxa fariseo jumasa sok ja saduseo, ye'n ita och k'e'uke ab'al k'umal. Ja'yuj ja sjunta'e'i, mixa b'ob' yi' b'ej tsamal, yuj ja tuktukilxa ja jas wa'ne pensari. 8Ja saduseo jumasa wax yalawe mixa oj sak'wuk ja ma' chamelxa, wax yalawe mey anjel jumasa, sok mi jas ik' ason ay ak'e. Jaxa fariseo jumasa, wanix ch'ak sk'u'uke spetsanil ja jastal jawa. 9Ja'yuj och k'e' jun niwan k'umal yujile, spetsanile wa'nxta awaljuke. Ay chab' oxe fariseo ja ma' wa sje'a ja mandar it a'ji yi' ja Moises yuj ja Dyosi, ti yalawe'a: —Mix k'u'antikon ta yuj ay jas mi lek sk'u'lunej ja winik iti. B'ob'ta jun anjel, ma jun ma' ik' ason ay jak aljuk yab' yuj—.

10Ja ab'al k'umal k'e' yujile'i, kada bwelta wa'n niwanb'el. Ja'yuj ja ma' niwan ya'tel yuj ja soldado jumasa sb'a Roma jel och sxiwele lek oj miljuk ja Pablo, ja'yuj ti spaya ja soldado jumasa a yi'e och pilan majke b'a na'its b'a wax ajyi ja soldado jumasa.

11Jaxa b'a schab'il a'kwali, ja Kajwaltik Jesusi ti sje'a sb'aj yi ja Pablo, ti alji yab'a: —Tsatsal k'ujolan a b'aj, ja jastal a ta'awon ti' b'a Jerusaleni, jach' t'ilan oj ja ta'on ti' b'a Roma, x'utji, ja Pablo.

Ja jastal chapan oj smiljuk ja Pablo

12-14Jaxa b'a schab'il k'ak'u, mojan chab' tajb'e (40) judio slajawe oj smil'e' ja Pablo. Ja'yuj ti waj sk'umuke ja pagre jumasa ma'tik niwak ya'tel yuj ja pagre jumasa sok ja ma'tik ay ya'tel b'a chonab'i, ti yalawe yab'a:

—Kalunejtikon mi oj wa'kotikon sok mi oj ku'tikon ja' ta yuj k'a mitox cham kujtikon ja Pablo. Tix yaj tuptikon ja Dyos ta yuj k'a mi jk'u'lantikon ja jas kalunejtikoni, —xyutaje ja ma'tik waj sta'e lo'ili. 15Lek ay, ja jas lajan kujtikoni, ja iti: Ja we'nlex sok ja tuk judio jumasa ma'tik ay a wa'telex b'a niwak junta jumasa, oj ja k'an'ex yi ja ma' niwan ya'tel yuj ja soldado jumasa b'a Roma a yi'jan ja jechel ja Pablo. Alawik yab' yuj waxa k'ana oj ja na'ex jastal ay ja ye'n. Jaxa ke'ntikoni chapanxa kujtikon ojxa jmiltikon b'ajtan ja mitox k'ot a mok ja ma' waj spayi.

16Jasa, ay jun yal ja swats ja Pablo, ch'ak yab' spetsanil ja jas wa'ne slajel b'a oj smil'e ja Pablo, ja'yuj ti waj yal yab' ja Pablo b'a na'its wax ajyi ja soldado jumasa. 17Yajni ch'ak yab' ja Pablo ti spaya jan june ja skapitan ja soldado jumasa sb'a Roma, ti yal ya b'a:

—Ja kerem iti, ay ja st'ilan wa sk'ana oj yal yab' ja ma' niwan ya'tel a wuj ja we'n; i'aj och ja b'ay ja ye'n.

18Jaxa kapitan jawi, ti yi'aj ocha, cho yal yab' ja yajwal ye'ni:

—Ja Pablo it lutani, sk'ana ki pabor oj ki'jan a wi a kerem iti, ay b'i jas wa sk'ana oj yal a wab'i, —xchi ja kapitani.

19Jaxa ma' niwan ja ya'teli, ti schecha yi ja sk'ab' ja kerem jawi, ti yi'aj och b'a stuch'il oj ajyuke'a. Ti sjob'o yi'a:

¿Jasunk'a waxa k'ana oj ja wal kab' b'a?

20Jaxa keremi, ti yala'a:

Ay chab' oxe judio schapuneje, oj jak sk'an'e' a wi b'a oj ja wi' och ja Pablo ja jechel b'a niwan junta yujile'i. Oj jak yal'e' a wab' yuj wa sk'ana oj k'el'e lek jastal ay. 21Jasa, mi lomxa k'u'an, yuj ay mas ja chab' tajb'e (40) winik ti snak'unej sb'aje b'a b'ej wa'ne smajlajel ja Pablo, yaluneje mi b'i oj wa'uke sok mi oj yu'e ja' yuj k'a mitox cham yujile ja Pablo ta yuj k'a mi b'ob' sk'u'luke ja jas yaluneje'i a'nima b'i tix a'ji stup'e yuj ja Dyosi. Jaxa ya'n kechan wa'ne smajlajel jas oj ja wal ja we'n.

22Jaxa ma' niwan ja ya'teli, ti'xa spila sb'aj sok ja keremi, ti yal yab'a:

—Mok ma a wal yab' ja jas a wala kab'i, —xchi ja ma' niwan ja ya'teli.

Ja Pablo, b'a sti sat ja mandaranum Felixi

23-24Ja ma' niwan ja ya'tel yuj ja ma' wax talnaniye'i, sjeka spayjel chab' kapitan, ti yal yab'a: —Chapawik chab' syen soldado (200) oj waj sok yoke', ox tajb'e sok lajune soldado (70) a wajke sok kawu, chab' syen soldado a wajuke sok machit (200). Chapawik jun kawu b'a oj k'e'uk ja Pablo. Wax k'ana ya'n a'kwal b'a b'alune ora b'a yoj a'kwal ka'axik b'a Cesarea, i'ajik och ja Pablo b'a sti sat ja mandaranum Felix. Talnayik lek ja Pablo b'a mi jas oj ek' sb'aj, —xchi ja ma' niwan ja ya'teli.

25Mi kechanuk ja jawi, ja ma' niwan ja ya'teli cho sjeka jun ju'un b'a wax yala jastal iti:

26—Ja Claudio Lisias, wa sjeka spatulab'il sk'ujol ja niwan mandaranum Felix.

27—Ja ma'tik ay ya'tel yuj ja judio jumasa syamawe ja winik iti, wa sk'ana oj smil'e'. Yajni kab' yab'alil ja ke'n yuj romano ja ye'n wajyon sok ja jsoldado jumasa b'a waj jkolta. 28Ti'xta'a, ki'aj och b'a niwan sjunta'e ja judio jumasa, b'a jach' oj na' jasunk'a smuli. 29Jach' jna'a ja smul yujile'i', ja wa'n sk'okjel ja jas kulan yujile ja ye'nle'i. Ja ke'n mey sb'ej wax k'ab' ja oj chamuki, ma ja oj lutxuki. 30Yuj ja cho jna'ata ay chab' oxe judio wa sk'anawe oj smile'i, ja'yuj we'n wax jeka a wi ja ya'n. Cho jach'ni ja judio jumasa ma wa sle'awe yi smuli, kalata yabye a wajuke a mok we'na, we'nxa oj ja wil jasun oj ja k'u'l soke, —xchi ja ju'un sjeka ja olomali.

31Jaxa soldado jumasa jach'ni sk'u'lane ja jastal alji yabye yuj ja ma' ay ya'tel yujile'i, jaxa a'kwal jawi ti yi'aje ja Pablo b'a na'its b'a wax ajyi ja soldado b'a Antipatris. 32Yajni el ja otro k'ak'u, jaxa soldado jumasa it wajye sok yoke'i, ti kumxiye b'a na'its b'a it wax ajyi ja soldado jumasa b'a Jerusaleni, jaxa ma'tik wajume sok kawu, ti snochowe yi ja b'ejyel sok ja Pablo. 33Yajni k'otye b'a Cesarea, ti wajye b'a sti sat ja mandaranum Felix, ti ya'awe yi b'a sk'ab' ja Pablo sok ja ju'un jekji yi'e'i.

34Jaxa mandaranumi, ti och sk'umuk ja ju'uni, yajni ch'ak sk'umuki, ti sjob'o b'a sb'aj ja Pablo. Yajni yab' ti sb'aj b'a slujmal Cilicia, 35Ti yal yab' ja Pablo: —Ti oj makla ja jas oj ja wal, ja yajnix jul ja ma'tik wa sle'a a muli—.

Tsa'an ja mandaranumi yal yab' chab' oxe soldado jumasa a yi'e och ja Pablo b'a niwan na'its yuj ja mandaranum Herodesi, cho a b'i stalnaye lek. Ja na'its jawi ye'n stojb'esnej ja Mandaranum Herodes niwani.

Currently Selected:

Hechos 23: YABD

Highlight

Copy