Hechos 12

Ja Santiago, sok ja Pedro

1Ja k'ak'u jawi, ye'n mandaranum ja Herodes Agripa yuj ja judio jumasa, ti och yixtala'uk jujuntik ja jmoj alijeltik jumasa. 2Mi kechanuk ja jawi, cho sjeka miluman ja Santiago smoj alijel ja Juani. 3-4Yajni yila jel lek yi'aj ja judio jumasa ja jas sk'u'lani, ja'yuj ti cho sjeka yamuman ja Pedro b'a oj slute, ti b'i oj ya'we eluk ja yajnix ek' ja k'in b'a sya'al k'inali, chan k'ole soldado ya stalnan ja preso b'a jach' mi oj eluk ja Pedro.

Ja Herodesi, wa sk'ana oj sle' yi smul ja Pedro b'a sti sat ja judio jumasa, b'a jach' oj sta' jastal oj sjek miluman, mi sk'ana oj sk'u'luk ja k'ak'u jumasa jaw yuj ja ti aye ja judio jumasa b'a k'in it wa swe'awe ja pan it mey yi'oj levadura.

Ja Kajwaltiki ya eluk ja Pedro

5Jaxa yajni ti'xa lutan ja Pedro, jaxa jmoj alijeltik jumasa mix ya'we kan sk'umajel ja Dyos ja k'ak'u jawi.

6Jun a'kwal, ja Pedro ti wa'n wayel b'a snalan chab' soldado mochob'al sok chab' kadena. Jaxa b'a jwera tey ja tuk soldado jumasa wa'ne stalnajel ja pwerta b'a preso. Jasa, jun k'ak'u b'ajtan yuj ja jastal wa sk'ana ja Herodes oj ya' b'a sk'ab' ja kristyano jumasa.

7Jun ch'ay k'ujol sje'a sb'aj jun yanjel ja Dyosi, lijpi b'a yoj preso. Jaxa anjel jawi syujkes ja Pedro, ti yal yab'a: —Pedro k'e'an, nutsa b'aj, —x'utji.

Ti'xta ch'ak spa' sb'aj ja kadena mochan sok ja sk'ab' ja Pedro, 8ti alji yab' ja Pedro yuj ja anjeli: —Mocho lek wa yujch'ili cho lapa wa xanab'i, x'utji.

Jaxa Pedro sk'u'ani ja jas alji yab'a. Tsa'an ti cho alji yab' yuj ja anjeli: —B'ech'a a b'aj sok wa kotoni, nochowon, xchi ja anjeli.

9Jaxa Pedro snocho ja anjeli, mi sna'a ta yuj smeranil ja jas wa'n ek'el yuji, ma yuj kechan ita jun swayich. 10Ti ek' ye b'a sti sat ja soldado jumasa, jaxa yajni elye k'ot b'a pwerta toj tak'ini stuch'il sjama sb'aj, b'ejyiye'to lajan jun mak'e ti'xta sak ch'ay ja anjeli, ti'xa kan stuch'il ja Pedro'a. 11Ti'xa sna'a k'inal ja Pedro ti yala'a: —Ja jas wa'n ek'el kuji smeranil. Ja Dyosi, sjeka jun yanjel b'a ya elkon b'a spetsanil ja jas mi lek wa sk'ana oj sk'u'luke ja Herodes sok ja judio jumasa, xchi ja Pedro.

12Ti'xta'a ja Pedro ti waj b'a snaj ja Maria snan ja Juan Marcosi, jel jitsan ti tsomane tiw ja sneb'uman jumasa ja Jesusi, wa'ne sk'umajel ja Dyosi. 13Jaxa Pedro yajni k'ot b'a pwerta b'a na'its jawi, ti sk'ojtsina, jun a'tijum ixuk Rode sb'i'il waj yil machunk'a wa'n k'umali. 14Jaxa ak'ix jawi sna'a ke ja sk'umal ja Pedro, jel gusto yab'i, yuj ja stsamalil sk'ujol jawi, mi sjama yi ja pwerta ja Pedro, ja ajnel waj yal yab' ja ma'tik tey b'a yoj na'itsi.

15Jaxa ye'nle'i, spetsanile wax yalawe yuj loka ay, jaxa ak'ix jawi wa'nxta yaljel ye'nani ja Pedro ja ma' tey b'a pwerta, ja'yuj ti ek' sk'ujole'a, b'ob'ta jun anjel ja ma yila.

16Jaxa Pedro ti'ni wa'n sk'ojtsijel ja b'a pwerta. Tsa'an ti'xa sjamawe'a, yajni yilawe ke ye'n ja Pedro spetsanile jel xiwye.

17Jaxa Pedro ti sje'a ja sk'ab' b'a a ch'ab'anuke, ti'xa och yal jastal a'ji el yuj ja Dyos b'a lutan ajyi, cho yala: —Kax alawik yab' ja Jacobo ja iti, sok ja tuk sneb'uman ja Jesusi, —xchi. Yajni ch'ak yal ja jastal iti, ti'xa ela waj b'a pilan chonab'.

18Yajni el ja k'ak'u, mi sna'a jas oj sk'u'luke ja soldado jumasa talnuman preso, yuj ja mi sna'awe b'a waj ja Pedro, ti wa sjob'tala'an sb'aje'a: ¿B'a'y ja Pedro b'a?

19Ti yala ja mandaranum Herodes a sle'e ja Pedro, jaxa soldado jumasa, wajni sle'e'a mi sta'awe, ja'yuj ti a'ji smuluke ye'nle'a, yuj wa sna'awe jastal eli, ja'yuj ti jekji milumane'a.

Jaxa Herodesi, ti'xa el ja b'a Judea ti waj b'a Cesarea.

Ja Dyosi, ya yi' wokol ja Herodes agripa

20Ja Herodesi, jel stakla ja kristyano jumasa swinkil ja Tiro sok ja Sidoni, ja'yuj jun nole ja swinkil ja lugar jumasa jawi waj sta'e' lo'il ja Blasto, ja ye'n jun winik jel niwan ja schol b'a wax a'tiji ja Herodesi, ti yalawe yab'a: —Ja ke'ntikoni mix k'anatikon oj takla jb'ajtikon sok ja Herodesi, yuj ja jwiniktikoni, ti wax a'aji yi' jas oj yabye b'a schonab'ile.

Jaxa Blasto ya k'umb'uk yi sk'ujol ja Herodes b'a oj smajluk. 21Ja'xa k'ak'u oj smajluk ja kristyano jumasa, ti slapa ja sk'u' ja jastalni wa slapa ja mandaranum jumasa, ti och kulan ja b'a wax a'tiji, sok mini jun sxiwel och k'umanuka. 22Jaxa kristyano jumasa ti k'e awaljuke'a: —Ja we'n Herodes Agripa mi wala k'umani jastal jun winik, jach' wa'na k'umal jastal jun dyos, xchiyexta.

23Ja mismo k'ak'u jawi, jun yanjel ja Dyos ya malo'axuk ja Herodes yuj ja lom sk'u'an sb'aj Dyos ja ye'n, tsa'an ti'xa chama, jaxa skwerpo toj yal ja' ch'ak k'uxjuk yuj.

24Jaxa jmoj alijeltik jumasa ma'tik sk'u'ane'ta mi k'otye timan yaljel ek' ja yab'al ja Dyosi. 25Ja ya'tele ja Bernabe sok ja Saulo ti' ch'ak b'a chonab' Jerusalen, jaxa ye'nle'i, ti kumxiye b'a Antioquia. Cho yi'aje ja Juan Marcosi.

Currently Selected:

Hechos 12: YABD

Highlight

Copy