2 Corintios 3

Jun yajk'achil modo jastal oj ta' jb'ajtik sok ja Dyosi

1Spetsanil ja iti, mi yuj wanukotikon yaljel b'a kechan jlekilal ke'ntikon. Cho mini t'ilanuk wax kab'tikon oj je'tikon a wi'ex jun ju'un b'a oj sta'otikon ti lek ja ke'ntikoni, ma oj k'antikon a wi'ex b'a we'n oj a ts'ijb'ayex jun ju'un b'aj oj je'tikon yi ja tuk jumasa ke jel lekotikon. Ay ma' yujni jach' wax makuni yuj ja, jaxa ke'ntikoni miyuk. 2-3A petsanilex toj lek waxa wilawex ja jas sk'u'lan a wi'ex ja Kajwaltik Jesusi. B'a jach' oj sta'otikone ti' lek ja kristyano jumasa, kechani we'n oj k'eljanika. Jasyuj ja we'nlexi, lajanex sok jun ju'un ts'ijb'anub'al b'a oj k'umanuk yuj ja ke'ntikoni. Ye'n ja Kajwaltik Jesús sts'ijb'unej b'a kaltsiltikon b'a oj je'tikon ja ke'ntikoni. Mi ti'uk sts'ijb'a b'a jun ton, mini sok tinta'uk, ja' sts'ijb'a sok ja Yespiritu ja Dyos it sak'an leki. Ja ju'un jawi, tey b'a sti'a sate spetsanil ja ma' wa sk'ana oj sk'umuki.

4Yuj ja Kajwaltik Jesusi, ja'yuj wax yala ja Dyosi spetsanil ja it jumasa nakani smeranila. 5Jaxa ke'ntikoni, mini oj kultikon ganar ja jtuch'iltikona; ye'nani ja jTatik Dyos ja ma wax ya'a kiptikon b'a oj b'ob' jk'uluktikona. 6Jaxa ya'n ja jTatik Dyosi, schapunejotikonxa b'a oj kaltikon a wabyex petsanilex ja yajk'achil trato k'a'ojtikon sok ja ye'n. Ja yajk'achil trato jawi, mi lajanuk sok ja mandar it a'ji yi ja Moisesi, ja'ni yuj ja Yespiritu ja Dyosi. Jasyuj ja ab'al jawi, wanix yala ke ojni chamuk ja ma wa sta'a smuli, jaxa ja Yespiritu ja Dyosi wax ya' yi sak'anil.

7-9Ja yab'al ja Dyosi, ti sts'ijb'a b'a jun laja ton, ti ya' yi ja Moisesi. Ja k'ak'u jawi, jel niwan waji, lijpi ja sat ja Moisesi. Ja jastal wa'n lijpeli, mini xb'ob' sk'el'e yi ja sat ja israelenio jumasa. Jaxa jastal wa'n lijpeli, takal takal ch'ayi.

Ta yuj k'a jel niwan waj ja k'ak'u ajiyi b'a sk'ab ja mandar jawi, jach' jel niwan oj wajuk ja yajnix jak aljuk jastal oj jakuk ja ma' oj jak koltanuki. Jasyuj ja mandar jawi, wax yala ojni chamkotik yuj ja jmultiki, sts'akatal ja Espiritu Santo yuj ja jas sk'u'lanki'tiki, ja Dyosi, wanix yala mey jmultika. 10—Ja jawi, jel niwan yuj ja jas sk'u'lan ja smandari— 11Ta yuj k'a jel gusto ilji ja mandar it oj ch'ay sna'jel ajyi, jel niwan ja smandar ja Dyos it wax yala jastal oj jta' jkoltajeltik b'a mini oj ch'akuki.

12Jna'onejtik lek spetsanil ja iti, ja'yuj mila xiwtik ja oj k'umanukotiki. 13Mi jach' wax k'u'lantik jastal sk'u'lan ja Moises smaka sok jun k'u'uts ja sat b'a mi oj iljuk yuj ja israelenio jumasa jastal wa'n tupel ja yijlab' ja sati. 14-15Ja ye'nle'i, mini t'un yabye sb'ej ja ita. Ja'yuj man ya'n, yajni wa sk'umane ja mandar it a'ji yi ja Moisesi, mix yabye sb'ej. Lajan sok musan sok jun k'u'uts ja jastik was sna'awe. Kechani ja Kajwaltik Jesús oj koltajuke yuj, b'a oj yabye sb'eja.

16Ta ay k'a ma wax yab' sb'ej sok wa sk'ana yi perdon ja Kajwaltik Jesús ja smuli. —Lajan sok ja wa sjolo'el ja k'u'uts it makan sok ja jastal wa sna'awe'i. 17-18Yuj ja Kajwaltik Jesús sok ja Yespiritu june'xtani, ja ma' tey sok ja Yespiritu ja Kajwaltiki, librexa ay. Jaxa ke'ntiki, mini jun k'u'uts wax makatik sok ja jsatika. Lajanotik sok jastal jun espejo wax ka'tik ijlab'anuk ja sniwanil ja Kajwaltik it ma stukb'es ja modotiki. Sts'akatal ja jas sk'u'lan ja Espiritu Santo yuj ja ke'ntiki, ja'yuj kada jujune' k'ak'u wax je'a jb'ajtik ti'ni aytik sok ja ye'na.

Currently Selected:

2 Corintios 3: YABD

Highlight

Copy