Romanos 9
9
Mëti'ipë ja Israel ja'ayëty tyuktso'okantëpën
1Tëy jaantyës n'ëna'any, ka'apës n'antä'äky. Ja njot nwinma'anyës Kënu'kxymyëkajtën tu'uwinwoowëp mëti'ipës xytyuknija'apën ko ya'atë tyiyëty. 2Nmëët'ajtypës ja ma'ayën tajën, xëmës nmay ntajy, 3ja ënaanpës ets jeexyë kajpxpoky n'ityës, nmëjëkäm'atyës ja Kristë ets tuk'oy'atëty ja nmëku'uktëjkës, nmëjutiis ja'ayës. 4Yë'ë u'unk'ajt ok'ajtëtëp ja Israel, ets ja Dios të kyupëkëtë tä y'u'unkën. Yë Dios ojts yajpaaty ma yë'ëjëtyën mëët ja myëj'ajt y'oyajtën, ets myooyëtë ja ënä'ämën ets ja waantakën, näjyëtu'un wi'ix twinjawëtëty twintsë'ëkëtëty ja Dios. 5Yë'ë y'u'unk y'ok ja y'aptëjkëty; yë'ë tsyikts'ajt y'aats'ajtëp, ma txëëwatën naaxwiinyëtë ja'ay, ma niTios'ajta'ayën winë, mëj'äämpy wintsë'ëkë y'itëty xëmëkyëjxm. Oy jyëtu'un'atëty.
6Ka'apës n'ëna'any ko ja Dios ka'ap tkuuytyuny ja y'aaw y'ayuk; paatyës jëtu'un n'ëna'any jä'ä ko mëti'ipë nätyijëtëpën Israel ja'ay ka'ap ni'ëmukë y'israel ja'ay'atë. 7Ka'ap ni'ëmukë t'u'unkëty ja Abraham ja y'u'unk, jä'ä ojts yë Dios y'ënë'ëmxëty: Mijts jam yë m'u'unk m'ok tsyoona'any ma Isaac yë y'u'unk y'ëna'kën. 8Jëtu'unts ya'atë yajja'akyukë ko ka'ap yë'ëkyëjxmëty ja'ay Dios y'u'unk'atyë ko ko ja tyeety y'ap pyënja'ayëty; Dios yë'ë y'u'unkniwäämpy yë ja'ay mëti'ipë pyatuumpyën ijxtëm ja Dios të twinwanën, yë'ë tëyëty u'unk o'k jyänty yajtijtë. 9Ya'atë jëtu'un ojts ja Dios tukwinwanë ja Abraham ko y'ënëmaayë: Wimpitaanpës ëjts ya'atë tiempo maajës të n'akäjpxyën, tëë ja Sara ënety ja y'u'unk tyajmëxu'unk'aty.
10E ka'ap yi'iyëty. Ja Rebeca y'u'unk mäjtskpë, tu'ukyë teety'ajtë ja Isaac, ëëts ja n'ap'ajt nteety'ajtëmë. 11-13Naamka'anëm ënety myintë kyä'äxtë, ka'anëm ënety tii tuntë oy ka oy, ko ja Rebeca ja Dios y'ënëmaayë: Ja mëjpë myëtunëp ja mutskpë, näjyëtu'un ijxtëm ja Dios ja y'aaw y'ayuk kyëxja'ayëtyën: Ntsojkës ja Jacob, Esaú ka'ap. Jëtu'un ojts wyi'imy nijawë ko ja Dios myëët'ajtyp ja kuttujkën ets twin'ixëty mëti'ipë yë'ë tsyojkpyën, mëti'ipë yë'ë myëkajpxäämpyën oy ënety tii oy pën të tkatuny.
Ma ja Tios kë'ëm nyäy'ëne'emyën
14¿Wi'ixts na'ëna'anmëty? ¿Wä'än jëtää n'ëna'anmëty ko ka'ap y'oyëty mëti'ipë ja Dios tyuunpyënë? Niwi'ix'äämpy. 15Jëtu'un ja Moisés Dios y'ënëmaayë: Npa'ëyowäämpyës pën ënety npa'ëyowäämpyës, najts'ëyoowëjäämpyës ja ja'ay pën ënety najts'ëyowëjäämpyës. 16Paaty ka'ap ja Dios jä'ä twin'ixy ja ja'ay mëti'ipë oy tii tyuuntëpën, yë'ë wyinwijtsyp mëti'ipë kë'ëm pya'ëyoopyën. 17Jëtu'un ja Dios ja y'aaw y'ayuk y'ënä'äny ko yajnëmaay ja Egiptë yajkutujkpë: Paaty mijts yajkutujkpë të npëjktä'äky ets mijtskyëjxm ja nmëk'ajtënës nyikëxë'ëkëty ets ja ja'ay nijawëtëty oymyaa naaxwiinyëtëty koos nmëjjëty njaantyëty. 18Dios pya'ëyoopy yë ja'ay mëti'ipë pya'ëyoowäämpyën ets yajju'unëp ja ja'ay ja y'aaw jyot mëti'ipë ënety jëtu'un tyuknipëjktakëpën.
19E jam ma miitsëtyën wä'än jëtää jam pën y'ëna'anëty: Pën jëtu'un, ¿tiixë ko ja Dios ja ja'ay tpoky'ixy? ¿Pën jëtää mëpaat t'ëk'ëtuky mëti'ipë ja Dios të tuknipëjktaakën? 20Mijts naaxwiinyëtë ja'ay ¿tiikutujkën mëët'ajtyp ets ja Dios xyajtëwëty tii tyuunpyën oy ka'oy? ¿Wä'än jëtää ja tu'ts nëëmëty ja mëti'ipë yajkojëpën tiijës ko jëtu'un të xyajkojyë? 21Ja tu'ts pojtspë myëët'ajtyp ja kuttujkën ets ja mo'onts tpotsëty wi'ix tuknipëjktaakën, nän yë'ë mo'onts yajtunëp ets tu'uk ja tu'ts tpotsëty mëti'ipë ka'ap oy najëna'a tyunëtyën ets mëti'ipë xëmë tunëpën.
22Dios jyamëët'ajtyp ja kuttujkën ets jeexyë ja naaxwiinyëtë ja'ay tukumëtoy ja pyoky, je'eyëp ko yë'ë mëk tmëmä'kxtuky ja ja'ay mëti'ipë japaat'ajtëtëp ja ëyo'on. 23Näy jä'ä ko ënety tyajnikëxë'ëka'any ja myëj'ajt jyääntyajtën ma ja mëti'ipë pya'ëyoopyën, mëti'ipë tyuknipëjktakëpën ets mëët y'itëty ma ja myëj'ajt y'oyajtënën. 24Jëtu'un, ëëtsajtëm Dios të xywoowtso'owëmë, tam mëti'ipë jutiis ja'ayën ets tam ka'apë jyutiisëty. 25Ijxtëm ja Oseas y'ënänyën:
Mëti'ipë ijty ka'ap nja'ayëtyën,
yë'ëjës nja'ay'atäämpy.
Pën ijty nkatsojkpyës,
ëna'anëpës koos yë'ë ntsoky.
26Ets näjyëtu'un,
ma yajnëmaaytyën:
ka'ap miits nja'ay'atë,
jä'ä nëjkx yajmëkajpxtë
Dios juukpyë m'u'unk'ajtëtëp.
27Mëëtpë ja jutiis ja'ayëty,
jëtu'un ja Isaías y'ënäny:
Oy ja jutiis ja'ay jyamay'atë ja y'u'unk y'okëty,
ijxtëm ja jinën mëti'ipë mejypyë'aayën,
niwäänë nëjkx tpaatë ja nitsokën,
28jä'ä ko tsojk ja Dios tpatuna'any ja y'ayuk yaa naaxwiiny.
29Ijxtëm ja Jeséas ënety të y'ënä'änyën:
Ko jeexyë ja Wintsën mëti'ipë maaytyääyëpën winë të tkayajwë'ëmy ja u'unk ok,
jëtu'un jeexyë tyam nyajpatëmë ijxtëm ja Sodomë kajpn ets Gomorra kajpnën.
Ja Jutiis ets ja oy aaw oy ayuk
30¿Wi'ix na'ëna'anmëty? Mëët ko të myëpëktë ja ja'ayëty mëti'ipë ka'ap jyutiis'atën, tëë ja Dios yajpokywya'atsëtë mëti'ipë ënety ka'ap t'ixta'atën ja oypyë ja nipaye'eyënë. 31E ja jutiis ja'ayëty mëti'ipë yë'ë kyajpxkopk'ajtëpën ja ënä'ämën ko yë'ë nyipaye'ey mëtëy, ka'ap të tpaatë ja nipaye'eyënë. 32¿E tii ko ka'ap? Jä'äkyëjxm ko ka'ap ja mëpëjkën tyajtuuntë, yi'iyë yajmëjnajxtë ma winë tii oy tjatunantën. Paaty ojts kyunäpëtë ma ja tsaajën mëti'ipë yajkunäjpëpën. 33Jëtu'un ijxtëm ja Dios ja y'aaw y'ayuk kyëxja'ayëtyën:
Ja'aykyukëtë, npëjktäkpypës jam Jerusalén tu'uk ja tsaa,
tu'uk ja tsaa mëti'ipë ja'ay yajkëtawëpën ko jam kyunäpëty.
Pën yë'ë tyuk'ijxpejtyp, ka'ap tsyëtyu'unpaata'any.
Currently Selected:
Romanos 9: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
