Romanos 11
11
Israel winwitsypë
1Yë'ës tyam nyajtëëpy: ¿Tëë jëtää ja Dios t'ëxmajtsnë ja nyaax kyajpnë? Niwi'ix'äämpy. Ëjts nän Israel ja'ayës ëjts, Abrahamës nteety'äjtyp n'ap'ajtyp, Benjamínkës ja y'u'unk y'ok ëjts. 2Tëëyëp ja Dios tkajpniwa'any ja Israel ja'ay, e tyampaat je'eyëm tkajpniwa'any ¿tii ko t'ëk'ëxwaanpëty? ¿Këtii xynyijawëtë wi'ix ja Dios ja y'aaw y'ayuk y'ënä'änyën ma ja Dios ja kyäjpxynyajxpë Elías yajnimëtyä'äkyën, ko ja Dios ojts tja'amyetsy ets ojts tuk'ëwaanë ja Dios wi'ix ja jutiis ja'ay y'ëtë'ëtstënë? ets y'ënäny: 3Wintsën, tëë ja mkäjpxynyajxpë myaj'o'kxëtë ets tëë ja mwintsë'këntyakn mjijtxëtë, ëjts nätyu'uk të njaakwë'ëmyës ets xyaj'ookantëpës näjyëtu'un. 4Ënet ja Dios y'ëtsoowinpijtë: Tëës ja ja'ay ëpëky npëjktä'äky niwëxtujk mil mëti'ipë ka'ap të twinkoxtänëtën ja Baal ja y'awinax. 5Näyjyëtu'un tyam jyäty, niwäänë të wyë'ëmtë mëti'ipë ja Dios të wyinwitsëtën myëyajtënkyëjxm. 6Ets pën yë'ëkyëjxm ko ja Dios tmëët'aty ja oyjyot oywyinma'any, ka'ap y'ëktsoowpatnë ja mëti'ipë yajtuunp yajkajpxpën; jä'ä ko jeexyë kyajëtu'unëty kajxyëp ja Dios ja y'oyjyot y'oywyinma'any tsyowpaaty.
7¿Wi'ix ënät njaak'ëna'anmëty? Ja Israel ja'ayëty ka'ap të tpaatë mëti'ipë të tja'ixta'atën, yi'iyë mëti'ipë ja Dios të wyin'ixëtën të tpaatë. Ja wiinkëtypë je'eyë ojts kyujuunta'aktë, 8ijxtëm y'ënä'änyën ja jaaypyetypë myinyën: Dios ojts jëtu'un pyëjkta'akëtë ets ka'ap tii tjawëtëty, ets jëtu'un tyampaat je'eyëm jyatë; jya'ijxtëp ets ka'ap t'ijxpaatë, jyamëtoowtëp ets ka'ap tja'akyyukëtë.
9Näyjyëtu'un ja David y'ënäny:
Wä'än ja kyä'äyën y'ukënëty yë'ë tmëpokytyëkëtë,
ets nyäyajtëkoyëtëty ets tkumëtowtëty,
10Wä'än ja wyiin tpi'itstë
ets ka'ap y'ixtëty,
wä'än xëmëkyëjxm t'itë jëku'ux.
Ma ja ja'ayëty ja nitsokën tpaata'antën ka'apë jyutiis'atën
11Nyajtëëpyës jatëkok: Ko ja jutiis ja'ay kya'atë pokyjotm, ¿tim'ëxmajtsëtëp jëtää ja Tiosë? Niwi'ix'äämpy. Ko ja jutiis kyamëtaktë, nikë jää të tpaatë ja nitsokën mëti'ipë ka'ap jyutiis ja'ay'atën, jëtu'unts ja jutiis ja'ay y'äkëtëty. 12Paaty, ko ja jutiis ja'ay pyokytyuuntë ënät ja Dios ojts tkënu'kxy mëti'ipë ka'ap jyutiis ja'ay'atën, jëtu'un ja Dios wäänëni'ik ja naaxwiinyëtë ja'ay tkënu'kxëty ko ja jutiis ja'ay ja Dios tmëpëktëty jatëkok.
13E tap miits njaakmëmëtya'aka'antë, miitsëty mëti'ipë ka'ap jyutiis'atën. Mëët ko ja Dios të xytyuknikexyës ja mëti'ipë ka'ap jyutiis ja'ay'atën, jotkujkës näjyawëty mëët ya'atë tuunk. 14Njatsojkpyës ets jeexyë ja jutiis ja'ayëty wiink tjawëtë ko miits ja Dios të xymyëpëktë, jëtu'un tjëkyäpëty wi'ix tpaatëty ja nitsokën. 15Mëët ko ja jutiis ja'ayëty ka'ap të tsojkën'atë ja Dios ja y'oyajtën, ënät ja wiink ja'ay të tpaatë ja nimä'kxën ma ja Tiosën; ¿tii ënät jyaak tunäämpy? yë'ë myo'ojäämpy ja juukyajtën mëti'ipë të y'ooktën. 16Jëtu'un ijxtëm ja jëtsyën mëti'ipë ja Dios yajtuknipëjktakëpën kënu'kxy ja nyäxy, näjyëtu'un ja tsajpkääky nän kënu'kxy jä'änë. Näyjyëtu'un ënät tu'uk ja kepy tyikts ko tëë Dios tkënu'kxy, ja kepyxye'enty aak wa'ats ja nyajxtaaynyë.
17Jëtu'un ja jutiis ja'ayëty ijxtëm ja olivë kepyxye'entyën mëti'ipë të yajkatspuxyën; ets mijts mëti'ipë ka'ap jyutiis ja'ayëty, jëtu'un ijxtëm ja pa'olivos xe'entyën ets të myatukpu'ootsë ja olivë kepy mëti'ipë mëtëyën. Ets të m'awinpity ijxtëm jeexyë mijts mjanty olivë'atën. 18Je'eyëp ko këtii mnätyukmëjawëtëty ko jam të myajpëjktä'äky. Pën mnätyukmëjja'awëyëp, ja'amyäts ko ka'ap myijtsëty xyaj'ity ja kepy aats, ja kepy aats mijts myaj'ijtëp.
19Wä'än jëtää mijts m'ëna'any: Jä'äkyëjxm të yajkatspuxy ja kepyxye'enty etsës ëjts jam nyajkëx'ootsëty. 20Tëy jëtu'un. Ojts jyänty yajkatspuxy je'eyëp ko yë'ë ko ka'ap myëpëjktë, e mijts paaty jam myajpaaty jä'ä ko mmëët'ajtyp ja mëpëjkën. E paaty mijts këtii mnämyëjjawëtëty, këtiipë näjyëtu'un myajkatspuxëty. 21Pën ka'ap ja Dios ojts tnime'kxy ja jutiis ja'ayëty, mëti'ipë jëtu'unëtyën ijxtëm ja oy olivë kepyxye'entyën, nän ka'ap mijts mnimä'kxëtëty ko näjyëtu'un m'ëtë'ëtsëty. 22Ix, wi'ix ja Dios y'oyëtyën ets näjyëtu'un wi'ix tpëjktä'äkyën ja tsaatsytyu'unën; mëk tsaatsytyuny mëti'ipë pokyjotm ka'atëpën, e mijts oy të mmëët'atyë. Je'eyëp ko kopkpëky ko mjuuky'atëty xëmë oy ijxtëm yë'ë t'oy'ixyën; jä'ä ko tsojk näjyëtu'un myajkatspuxëty. 23E ko ja jutiis ja'ay tmëpëktëty ja Dios, jam jä'ä yajpëjkta'aktëty ma të ënety mijts të myajpëjktä'äkyën; jä'ä ko myëët'ajtyp ja Dios ja mëk'ajtën ets pyëjkta'akëtëty jatëkok ma të y'itën. 24Jä'ä ko pën mijts mëti'ipë ka'ap jyutiis ja'ayëty, jëtu'un mnaxy ijxtëm ja pa'olivo kepyën, ojts myajpuxy ets myajkëx'o'tsy ma ja olivë kepyën mëtëypyë; ja jutiis ja'ayëty mëti'ipë jëtu'unëtyën ijxtëm ja olivë kepyën mëtëypyën, ni'ik pyaat'atëtë ets jam jatëkok yajkëx'ootstëty ma ja nyikepyën.
Ko ja jutiis ja'ay nyitso'oktëty
25Mëku'uktëjkëty, yë'ëjës ntsojkpy ets miits xynyijawëtëty mëti'ipë ijty ka'ap yajnijawën, jëtu'unts ka'ap mnämyëjpëjkta'akëtëty. Yë jutiis ja'ay juun yë y'aaw jyot të tpëjkta'aktë, ka'ap yë Dios të tmëmëtowtë, jëtu'un y'ita'antë koonëm tpata'atëty ja oyajtën mëti'ipë ka'ap jyutiis'atën. 26Ko ya'atë tyunëtëty jyatëtëty, ni'ëmukë ja jutiis ja'ay tpaata'antë ja nitsokën. Ijxtëm ja Dios ja y'aaw y'ayuk këxja'ay myinyën:
Jerusalén myina'any tu'uk ja jutiis ja'ay yajnitsokpë
ets tyajnitso'oka'any ja pokyjä'äytyëjk mëti'ipë ja Jacob tyëëmp'ajtyp y'aats'ajtypyën.
27Ya'atë käjpxytyu'unën nëjkx tyuny ko ënety ja pyoky nimä'kxëtës.
28Ja jutiis ja'ayëty mëtsip'ajtëtëp ja Dios, paaty miits ja Dios mkënu'kxëtë; je'eyëp ko Dios tsyojk'ëtëtsyp ja jutiis ja'ay jä'ä ko ojts oy jyuuky'atë ja y'aptëjkëty. 29Ka'ap ja Dios wyinma'any tyëkatsy ko pën tii tmo'oy mëti'ipë të twin'ixyën. 30Tëëyëp ka'ap ja Dios ijty xymyëmëtowtë, e tyam ma ja jutiis ja'ayëty ja Dios ka'ap të tmëmëtowtën, tëë ja Dios miits mpa'ëyowëtë. 31Näy jä'äkyëjxm ko ja Dios mpa'ëyowëtë, paaty ja Dios tpa'ëyoy ja jutiis ja'ayëty. 32Jä'ä ko ja Dios ni'ëmukë ja ja'ay ojts tukwinmëtoy ja pyoky ko të kyäjpxykyumëtoownaxtë ets ënät näjyëtu'un tpa'ëyowa'any ja wiinkëtypë tu'knax.
33Ni'ik ja Dios ja myëj'ajt jyääntyajtën kyëjääjëty ets näjyëtu'un ja wyijy'ajt kyejyajtën. Ni pën kyamayë tkajpxtë'kxëty mëti'ipë të tuknipëjktaakën ets ka'ap pën myäyëtëty twinjawëty ja nyë'ë tyu'u. 34E ¿Pën y'ëknija'ap ja Dios ja wyinma'any? ¿Pën y'ëkkajpxwijëp? 35¿Pën winë ja Dios të t'ëkmoopyë ets jatëkok kyëpäjtxëtëty? 36Dios tu'kë'ëyë winë myëët'ajtääpy, ets yë'ë winë yaj'ijtääpy. Jëtu'un xëmëkyëjxm y'itëty ja Dios ja myëj'ajt y'oyajtën.
Currently Selected:
Romanos 11: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
