KIDUNG 29
29
Ida Sang Hyang Widi Wasa masabda sajeroning angin ribut
1Pujija Ida Sang Hyang Widi Wasa, ih sakancan wadua balan suargane. Pujija kaluihan miwah kawisesan Idane.
2Pujija parab Ida Sang Hyang Widi Wasa Sane Luih, tur sumungkemja ring ajeng Ida Sane Maha Suci, rikalaning Ida nyinahang raga.
3Sabdan Ida Sang Hyang Widi Wasa kapiragi ring segarane. Ida Sang Hyang Widi Wasa Sane Luih masabda makuug, tur sabdan Idane matangguran ring samudrane.
4Sabdan Ida Sang Hyang Widi Wasa punika kalintang luih tur mawisesa.
5Sabdan Idane mungkatang wit aras sane wenten ring Libanon.
6Ida ngawinang gunung-gunung Libanone punika makecog sakadi godel, tur ngawinang Gunung Siryon kecas-kecos sakadi panak bantenge.
7Sabdan Ida Sang Hyang Widi Wasa ngawinang kilape makelepan.
8Sabdan Idane ngawinang tegal melakange magejeran. Ida ngejerang tegal melakange sane ring Kades.
9Sabdan Ida Sang Hyang Widi Wasa ngejerang wit aane, tur ngaasang daunnyane rikalaning sakancan anake sane ring Perhyangan Agung Idane pada masuryak asapuniki: “Luihangja Ida Sang Hyang Widi Wasa.”
10Ida Sang Hyang Widi Wasa mrentah toyane sane dalem, tur jumeneng nata buat salami-laminipun.
11Ida Sang Hyang Widi Wasa mapaica kakuatan ring kaulan Idane, tur ngamertanin ipun antuk sutrepti.
Currently Selected:
KIDUNG 29: BAN
Highlight
Copy
Compare
Share
Want to have your highlights saved across all your devices? Sign up or sign in
Today's Bali Bible “Cakepan Suci” © Indonesian Bible Society, 1990.
