CACAH JIWA 7
7
Aturan parapamimpine
1Ring rahina pamuput Dane Musa ngwangun Kemah Linggih Ida Sang Hyang Widi Wasa, dane raris mlaspas tur ngaturang Kemahe makamiwah prabot-prabotnyane makasami ring ayun Ida Sang Hyang Widi Wasa, majalaran antuk kaketisin minyak, kadi asapunika taler pamorboran aturane makamiwah prabotnyane makasami, taler kaplaspas tur katurang ring ayun Ida Sang Hyang Widi Wasa malantaran antuk kaketisin minyak. 2Sasampune punika parapamimpin sane dados panglingsir sajeroning suku-suku Israele, inggih punika sane sampun kapategenin buat ngwentenang cacah jiwa, 3raris sami pada rauh ngaturang aturannyane ring ayun Ida Sang Hyang Widi Wasa. Ipun makta cikar nemnem miwah banteng roras ukud. Cikare asiki punika pabuat pamimpin sareng kalih miwah bantenge asiki pabuat pamimpin adiri. Sasampune ipun ngaturang punika makasami, 4Ida Sang Hyang Widi Wasa raris masabda ring Dane Musa, kadi asapuniki: 5“Tampija aturannyane ento, buat anggon sajeroning gegaen ane merluang barang-barang ane buka keto, ane perlu kagunayang pabuat Kemah Linggih Ulune. Serahangja barang-barange ento makejang teken wong Lewi manut tetegenannyane suang-suang.” 6Dane Musa tumuli nyerahang cikar miwah banteng-bantenge punika ring wong Lewine. 7Wong Gerson icen dane cikar kekalih miwah banteng patpat. 8Wong Merarine icen dane cikar patpat miwah banteng kutus ukud. Pakaryannyane punika makasami patut kapimpin antuk Dane Itamar okan Dane Harun. 9Nanging wong Kehate nenten polih cikar miwah banteng saking Dane Musa santukan barang-barang miwah prabot-prabot sane suci, sane etangang dane patut kategen.
10Parapamimpine punika taler makta aturan buat ngluihang upacara pamlaspas pamorboran aturane. Rikala ipun sampun pada sedia buat jaga ngaturang aturannyane ring pamorboran aturane punika, 11Ida Sang Hyang Widi Wasa tumuli ngandika ring Dane Musa, kadi asapuniki: “Orahinja ia ajaka makejang, mungguing roras lemeng makelonne, sabilang lemah apang ada anak adiri uli pantaran parapamimpine ento ngaturang aturan pamlaspas pamorboran aturane ento.”
12-83Parapamimpine punika ngaturang aturannyane suang-suang, manut giliran sane kadi asapuniki:
| RAHINA | SUKU | PAMIMPINNYANE |
|---|---|---|
| Kaping 1 | Yehuda | Dane Nahason okan Dane Aminadab |
| Kaping 2 | Isakar | Dane Netaneel okan Dane Suar |
| Kaping 3 | Sebulon | Dane Eliab okan Dane Helon |
| Kaping 4 | Ruben | Dane Elisur okan Dane Sedeur |
| Kaping 5 | Simeon | Dane Selumiel okan Dane Surisadai |
| Kaping 6 | Gad | Dane Eliasap okan Dane Rehuel |
| Kaping 7 | Epraim | Dane Elisama okan Dane Amihud |
| Kaping 8 | Manase | Dane Gamaliel okan Dane Pedasur |
| Kaping 9 | Benyamin | Dane Abidan okan Dane Gideoni |
| Kaping 10 | Dan | Dane Ahieser okan Dane Amisadai |
| Kaping 11 | Aser | Dane Pagiel okan Dane Okran |
| Kaping 12 | Naptali | Dane Ahira okan Dane Enan |
Aturan sane katurang antuk parapamimpine punika sami pateh, inggih punika: pinggan perak asiki sane bobotipun 1,5 kilogram, miwah waskom perak asiki sane bobotipun 800 gram, manut timbangan sane resmi. Wadahe makakalih puniki bek kadagingin tepung madukan minyak, pabuat aturan gandum. Sapangrarisipun pinggan mas sane mabobot 110 gram asiki, sane bek madaging menyan, banteng jagiran aukud, biri-biri muani aukud miwah panak biri-biri sane matuuh ataun aukud, pabuat aturan maborbor, miwah kambing muani aukud pabuat aturan panyupat dosa; miwah banteng kalih ukud, biri-biri muani limang ukud, kambing muani limang ukud, miwah biri-biri sane matuuh ataun limang ukud pabuat aturan karahayuan.
84-88Aturan sane katurang antuk parapamimpine makaroras punika, pabuat aturan pamlaspas pamorboran aturane, makasami geboganipun wenten:
– Pinggan perak roras, miwah waskom perak roras, sane bobotipun makasami wenten 27,6 kilogram.
– Pinggan mas roras sane bobotipun sami wenten 1,32 kilogram sane bek madaging menyan.
– Banteng jagiran roras ukud, biri-biri muani roras ukud, miwah panak biri-biri sane muani sane matuuh ataun roras ukud, kasarengin antuk aturan gandum, makadados aturan pangenep pabuat aturan sane maborbor.
– Kambing roras ukud pabuat aturan panyupat dosa.
– Banteng jagiran patlikur, biri-biri muani nem dasa, kambing muani nem dasa, panak biri-biri sane matuuh ataun nem dasa, pabuat aturan karahayuan.
89Rikala Dane Musa ngranjing ka Kemah Sucine praya matur ring Ida Sang Hyang Widi Wasa, dane mireng Ida Sang Hyang Widi Wasa masabda, saking duur tekep Peti Prajanjiane, ring selagan pepindan sane makampid makakalih punika.
Currently Selected:
CACAH JIWA 7: BAN
Highlight
Copy
Compare
Share
Want to have your highlights saved across all your devices? Sign up or sign in
Today's Bali Bible “Cakepan Suci” © Indonesian Bible Society, 1990.
