Marcos 14

Ku tkajpx'oyëtë jäts Jesús tpujxtëjkpë'mtë't

(Mt 26.1-5; Lc 22.1-2; Jn 11.45-53)

1Jamäjtsk xëëw y'ijjty tkappaaty Pascuaxëëw maj jaa'y tkaytyë pejytsyajpkääky. Jäts teety nyiwintsëntëjjk mëët pawaa'n yëk'ixpëjkpëttëjjk jä' y'ijjty wyinmaytyë'p ntsoj y'ijxë tyaypyaat'të't nits Jesús tpujxtëjkpë'mtë't, jäts tyëk'ooktë't. 2Jä'ku jäm pën y'ijjty wantë'p:

—Kä' y'oyë't jäts xëëw'it najj ntuu'në'n, ntsoj ku kajjp kë'm xniputtë'ëjkë'n.

To'oxytyëjjk ttakkuttemy Jesús pa'akxuu'kpë nëëj

(Mt 26.6-13; Jn 12.1-8)

3Jäm y'ijjty Jesús Betania, Simón tyëjkëntum, pën y'ijjty tëj pu'utspa'am nyiwa'atsyë. Jäjpts y'ijjty Jesús kaytyaajk'äjpy tsyëënë, ku tu'uk to'oxytyëjjk tmuja'ajty tu'ktsiiy'uu'nk pa'akxuu'kpë nëëj mati' këjx'amnäxy tsowatp. Nits tpu'ujy tsiiy'uu'nk jäts ttakkutteemy pa'akxuu'kpë nëëj Jesús. 4Nits jaa'y pënjäty jäjp ijt'të mëjk y'ampëjktë, jäts nyawyan'axajjëtë:

—¿Tij ku tëj nikoj pa'akxuu'kpë nëëj yyëk'ijxtemy? 5Ntsoj yë' tëj kyayëktooky, tsowaatp yë' tuwëëkmukkö'pxy xëëw nittüny meeny, jäts jä' meeny ntapputtëjjk'ëë'yë'n jyeexyë ayoopëttëjjk.

Najjts twintso'y'axajjtë jä' to'oxytyëjjk.

6Nits Jesús wyaany:

—Katij najj xtuntë yë' to'oxytyëjjk; ¿tikku xwintso'oytyë? Y'oy'ajjtpë ëjts yë' tëj xtuujnë. 7Jää'jë'y'it'të'p yë' ayoopëttëjjk, nits xputtëkkëtë't pënjunë xtsoktë; jäts ëjts, kä' ëjts yaj ijtp nyaa'jëwya'any. 8Nits ya'at to'oxytyëjjk tëj yë' tüny nii'xyë'n myata'aky: Tëj ëjts yë' pa'akxuu'kpë nëëj nnikkëjjx xtanittääjmë, najjts tëj tyëkni'oyë tyëknippaatë ntsoj ëjts nyëknittajjë't. 9Ixyam ëjts nnikkäjpxy: Pënmaj it pënmaj kajjp tu'k'it naxwiin maj yyëkkajpxwa'kxt ya'at oy'ayuujk oymatya'aky, mëët yyëkmatya'akt mati' ya'at to'oxytyëjjk tëj tüny, najjts jaa'myetsy y'itt.

Judas tniwinmayë ntsoj tkë'yakt Jesús

(Mt 26.14-16; Lc 22.3-6)

10Nits Judas Iscariote, tu'uk mati' y'ijjty nimajkmäjtsk apóstoles'eetyë'p, t'anëjkx'ëëy teety nyiwintsëntëjjk nits tnëëjmjaay jäts jä' tkë'yakp Jesús. 11Kuts najj teety niwintsëntëjjk tmatootë yëkxon jä' t'oyjyaa'w'eetyë, jakëjxts meeny ttawinwaa'n'eetyë Judas, jä' xëëw Judas Iscariote tpatsoo'ntaajky jäts t'ijxy ttunkë junë Jesús tkë'yakt.

Ku Jesús tmëët'a'uxë y'ixpëjkpëttëjjk

(Mt 26.17-29; Lc 22.7-23; Jn 13.21-30; 1~Co 11.23-26)

12Ku xëëw tsyuwë maj jä' tkaytyë pejytsyajpkääky, jäts ku mëët tu'uk worrekë tyëk'ooktë mati' Pascuaxëëw tya'a'ux'eetyë'p, nits Jesús y'ixpëjkpëttëjjk nyëë'mxë:

—¿Ma'it xtsöky ëëts a'ux nyëk'oyë't jäts Pascuaxëëw ntuu'në'n?

13Nits Jesús tpakkejjxy nimäjtsk y'ixpëjkpë, jäts tnëëjmjaay:

—Nnëjkxtë mëjj kajjpjotm, jäm yi'it tu'uk yaa'ytyëjjk xpaat'të't mati' tsiiyjötypy nëëj tpatsëmp; jä'äts mpanëjkxtë'p, 14pënmats jya'aty, nits xnëëjmëtë't jä' kuttëjjk: “Nëm Wintsën yä'äny: ¿Maj jä' tëjjk maj ëjts nmëët'a'uxë't n'ixpëjkpëttëjjk ya'at xëëw'it?” 15Jä'äts mtani'ijx'attëtë'p yi'it tu'uk mëjj tëjjk tëjkejxypy, ni'oyënë nits jäjp jaa'y y'a'uxëtë't. Jäjpts xyëk'oyëtë't a'ux.

16Nits tsyoo'ntë nimäjtsk ixpëjkpë jäts nyëjkxtë mëjjkajjpjotm. Naa'mts jä' tukkë'yë tpat'të naa'xkë'n Jesús y'ijjty tëj nyee'mxyëtë, jäjpts a'ux tyëk'oy'eetyë.

17Kuts it kyoots'ëëy nits Jesús tmëëtja'ajty y'ixpëjkpëttëjjk. 18Jäjpts y'ijjty y'a'uxëtë, nits Jesús y'ixpëjkpëttëjjk tnëëjmjaay:

—Ixyam ëjts nnikkäjpxy, nii'xyë'n ëjts miits yaj nmëëtkay nmëët'uuky, jäj tu'uk pën ëjts xkë'yakwamp.

19Yëk'ayoopë nitukkë'yë ixpëjkpëttëjjk nyajyaa'w'ajjtëtë, nits tnëm'axajjäätyë tu'uk jatu'uk Jesús:

—¿Ëjts jä' najj atë'ëtsp?

20Nits Jesús y'atsooy:

—Tu'uk jä', nii'xyë'n ëjts miits nimajkmäjtsk nwinwaay, jäts jäj jä' ixyam ttöjkxy tsyajpkääky ëjts ntexyjyoojty. 21Tëë'm yë' najj nyikuttukkë ntsoj naxwiinë'tjaa'y y'Uu'nk y'ayo'ot, naa'xkë'n jaypyety myiny Yës Teety y'aaw y'ayuujk; ¡yëk'ayoopë'ts jyatt pën ëjts xkë'yakp! Oy'aajtxë'p jä' jyeexyë kä' y'ijjty kye'ejxy.

22Kuts najj wyaany jäts jyak'a'uxë'y'atëtstë. Nits Jesús tkoony tu'uk tsajpkääky jäts tkunuu'kxtaajky, nits ttujkwä'kxy jäts ttaniwaajt'ëëy y'ixpëjkpëttëjjk nits wyaany:

—Kontsowtë, yë' ëjts nnikkëjjx'eepy.

23Nits tkoony uujk'ëë'ny jäts tkunuu'kxtaajky, nits ttok'uujky tu'uk jatu'uk y'ixpëjkpëttëjjk. 24Nits jatu'kyaajjë wyaany:

—Ëjts ya'at nnë'ëjpy, mati' tsunwamp ta'kxwamp, yë'ëts nam käjpxy tta'attujkp, yë' në'ëjpykyëjxm nimaynyäxy jaa'y nyitso'oktë't. 25Tëy ëjts nwa'any jäts kä' ëjts junë n'ok'uknë't ya'at pa'aknëëj, nitnë'm wyä'në ku namyujjkë'n Yës Teety kyuttujktaajk'am.

Jesús tnikkäjpxy ku Pedro y'ëënwa'any

(Mt 26.30-35; Lc 22.31-34; Jn 13.36-38)

26Kuts salmos t'ëëkëjxtë, nits nyëjkxtë Olivos kojpk këjxm. 27Jäts Jesús tnëëjmjaay y'ixpëjkpëttëjjk:

—Nityu'uk ëjts miits xyëktanwa'any, mkäkkëxtë'p miits. Najj jaypyety myiny: “Nyëk'ookp ëjts worrekë ijxpë, jäts nitukkë'yë worrekë yyo'ywya'kxkëxt.” 28Kuts ëjts njükypyëkt, nits ëjts miits jatu'kyaajjë nwaamukt Galilea.

29Nits Pedro tnëëjmjaay Jesús:

—Oy nitukkë'yë kyäkkëxtë't, nijunë ëjts mijts nkanikkä'äkt.

30Jäts Jesús y'atsoojjë:

—Ixyam ëjts nnikkäjpxy, jäts ya'at tsuuj, kä'änë'm wyä'në mumäjtskyaajjë tsajpna'aaw y'aya'axy, tëj mijts wyä'në m'ëëny tuwëëkyaajjë jäts kä' ëjts x'ijxë.

31Tu'ukyë'ts Pedro wyan'atëëjtsy:

—Oy ëjts jaa'y xyëk'ookt, nijunë'ts ëjts mijts nkamajtstu'utt.

Ninyaj mëët myuku'uk wyantë.

Jesús nyuu'kxta'aky maj it txëëwë Getsemaní

(Mt 26.36-46; Lc 22.39-46)

32Nits Jesús mëët y'ixpëjkpëttëjjk nyëjkxtë maj y'ijjty tu'uk it txëëwë Getsemaní. Jäts tnëëjmjaay y'ixpëjkpëttëjjk:

—Tantë yaayë, wä'n ëjts tnijkxy nuu'kxtakpë.

33Jäts tpawaay Pedro, Santiago mëët Juan, nits Jesús yëk'ayoopë jäts tsätsywyinmaypy nyajyaa'w'ajjtë.

34Jäts tnëëjmjaay pën y'ijjty myëët'eepy:

—Yëk'ayoopënäxy ëjts nnyajyaa'w'ätyë, oo'kp ëjts jyawë. Tantë yaayë, jükyëtë katij mma'atë.

35Nits jawäänë jämtsow xyëjjpy, jämts nyakyujxtänëtyaajkë jäts wyin'aaw naxkëjjxy tyëknaxkitaajky, nits Yës Teety tmunuu'kxtaajky pën yyëkjäjtypy nits kä' jyeexyë najj y'ayoy. 36Najjts nyuu'kxtaajky: «nTeety'ajjt tsajpjotmë't, mijts tukkë'yë mmaajyë'p, ku mijts jyeexyë xtüny nits kä' ëjts ya'at ayoo'n ntanaxt; kä'äts xtu'nt naa'xkë'n ëjts ntsöky, wä'n najj tünyë naa'xkë'n mijts xtsöky.»

37Nits wyimpijjty maj jäm y'ijjty myuku'uk, jäts tummaap tpaajty. Nits tnëëjmjaay Pedro:

—Simón, ¿mmaap mijts? ¿Kä' tëj jaktu'k'oorë tsuuj xmuttänë? 38Katij mma'atë, nuu'kxta'aktë, jäts kä' mëjjku'ujy myëkpökytyunëtë't. Mjattunwämpy miits y'oy'ajjtpë, kä'äts miits nityu'uk mmata'aktë't.

39Nits jatu'kyaajjë nyijkxy, jäts ninyaj nyuu'kxtaajky naa'xkë'n y'ijjty tëj jawyiin nyuu'kxta'aky. 40Kuts wyimpijjty, jäts jatu'kyaajjë y'ixpëjkpëttëjjk tpaajty tummaap, jä'ku mëjk jä' y'ijjty tsuuj oo'ktë. Nits nikya'atsowtë jä' yëkxon. 41Kuts mutuwëëkyaajjë wyimpijjty Jesús, nits tnëëjmjaay y'ixpëjkpëttëjjk:

—¿Nijyäj miits mma'ay mpöö'kxy? Tëj nii'xyë'n mma'atë, tëj tpaaty xëëw maj naxwiinë'tjaa'y y'Uu'nk yyëkkë'yakt pöky tyumpë jaa'y kyë'jë'm. 42Puttë'ëktë jäts tjaa'myë'n; jäänë wyinköny pën ëjts jaa'y xtokmatswamp.

Jesús yyëkmätsy

(Mt 26.47-56; Lc 22.47-53; Jn 18.2-11)

43Kä'änë'm y'ijjty Jesús kyajpxkita'aky, ku tu'uk y'ixpëjkpë mati' txëëw Judas, tmëëtja'ajty nimay jaa'y tsujjxtsëm, kepykyap. Pënjäty pyakkäjxtë teety niwintsëntëjjk, pawaa'n yëk'ixpëjkpëttëjjk, mëët majaa'ytyëjjk. 44Tëj y'ijjty Judas jaa'y tnëëjmë: «Pënpën ëjts ntsüü'kxypy jä'äts mmatstë'p jäts yëkxon witsy tsümy xmunëjkxtë't.» 45Nits Judas twinkunëjkx'ëëy Jesús jäts tnëëjmjaay:

—¡Wintsën!

Jäts ttsüü'kxy. 46Nits jä' jaa'y Jesús tnixajj'eetyë jäts tmajtstë.

47Nits tu'uk Jesús y'ixpëjkpë tjuu'jty tsujjx, jäts ttatskpoo'twaajtsy tu'uk teety niwintsën tyumpë. 48Nits Jesús jaa'y tnëëjmjaay mati' y'ijjty tëj myätsyë:

—¿Tikëjx ëjts miits xnimintë jäts xmatstë tsujjxtsëm, kepykyap, naa'xkë'n ëjts jyawë nmää'tspëjaa'yë? 49Jawom jawom ëjts miits tëj nyëk'ixpeky tsajptijkypy, jäts kä' ëjts miits jäjp xmajtstë. Naa'mts yë' jaypyety myiny, jäts najj tukkë'yë jyatt.

50Nits nitukkë'yë ixpëjkpëttëjjk kyäkkëjxtë jäts janityu'uk Jesús tyaany. 51Nits tu'uk appety'una'ajnk jä'yë nyatyakkujkwojjpë yönywyit jäts tpanijkxy ix'oojk Jesús. Mëëtts jä' yyëkmajjtsy, 52jäts jä' una'ajnk najjyë ttakkäkwaajtsy jä' wit jäts niwa'ats kyeejky.

Ku Jesús yyëkmunijkxy kuttunktëjjk wyinkujkm

(Mt 26.57-68; Lc 22.54-55,63-71; Jn 18.12-14,19-24)

53Najjts Jesús tmunëjkxtë teety niwintsën wyinküjkypy, jäjpts yyo'ymyujktë nitukkë'yë teety niwintsëntëjjk, majaa'ytyëjjk mëët pawaa'n yëk'ixpëjkpëttëjjk. 54Jäts Pedro ix'oojk tu'knajts'ijxë tpanijkxy Jesús, kunë'm jya'ajty teety niwintsën tyajjykyüjkypy, jäts tyaany maj y'ijjty tsajptëjk'ijxy'ijtpë jëën tëj tyëkmëjjëtë jäts xyamtë.

55Jäts teety niwintsëntëjjk mëët nitukkë'yë pënjäty y'ijjty tnimëjj'eetyë'p tpatsoo'ntaktë jäts Jesús tyëkkajpxpitsë'mtë't, najjts tpaatt ayuujk ntsoj y'ijxë tniwampät'të't jäts tyëk'ooktë't. 56Oyë'mts y'ijjty nimay jaa'y Jesús tjaniwampät'të, kä'äts y'ijjty y'ayuujk nyapyaatyëtë, ntsoj tu'uk jatu'uk jyamatya'aky. 57Jämts nitu'ukë'n tyenkyuk'eetyë, nits nikoj Jesús tniwampäjt'të, jäts wyantë:

58—Tëj ëëts yë' nmatoy yä'äny: “Njijtkëxp ëjts tsajptëjjk mati' ya'at naxwiinë'tjaa'y yyëk'oy'eetyë, nits tuwëëk xëëw jatu'uk nyëk'oyë't, mati' naxwiinë'tjaa'y kyayëk'oy'eetyë'p.”

59Ninajjts y'ijjty y'ayuujk kyattëwtë, jä'ku jäm pën y'ijjty wiijnk wantë'p.

60Nits teety niwintsën tyenkyuk'ëëy, jäts nitukkë'yë jaa'y wyinkujjky tyëktëëy Jesús:

—¿Tëj xmatoy ntsoj jaa'y wya'antë? ¿Tikku mka'atsoy?

61Amöny'aayë'ts Jesús jä'yë tyaany, ninii'xyë'n kya'atsooy. Nits teety niwintsën jatu'kyaajjë tyëktëëy Jesús:

—¿Mijts mYëknitsokpë'eepy, mëjj'ijxy mëjjkexy Yës Teety y'uu'nk?

62Nitnë'mts Jesús y'atsooy:

—Ëjts jä'. M'ijxp miits ku naxwiinë'tjaa'y y'Uu'nk myi'nt yootsjotm tsajpwinm tsyëënë Yës Teety y'akaa'ny pyaa'aajy.

63Kuts najj tmatooy teety niwintsën jäts wyit tkëë'jtsy tpojjty najjts tyëknikkä'äjxjë'ëjky jyot'aa'n, nits wyaany:

—¿Tikku ntsojk'atëëjtsyë'n pën tjaknikkajpxpätp? 64Tëj miits xmatowtë ntsoj tëj Yës Teety tmukkajpxtakkoy. ¿Ok ntsoj mwinmaytyë?

Nits nitukkë'yë wyantë tu'kmukkë jäts jämë'm Jesús pyöky jäts paajt'ajjtë'p tku'ookë't. 65Nits nitu'ukë'n twinkutsujjë'y'axajjtë Jesús, mëët twintsumtë jäts tkojxtë nits y'ijjty tnëëjmëtë:

—¡Nikkajpx pën tëj mköxyë!

Mëët tsajptëjk'ijxy'ijtpëttëjjk twinkojxtë tjëpkojxtë Jesús.

Pedro y'ëëny

(Mt 26.69-75; Lc 22.56-62; Jn 18.15-18,25-29)

66Jäjp y'ijjty Pedro xyämy tajjykyüjkypy. Ku jya'ajty tu'uk to'oxytyëjjk mati' y'ijjty teety niwintsën tmuttump; 67Kuts jä' to'oxytyëjjk Pedro t'ijxpaajty jäjp xyämy, jäts jeky twin'ijxy, nits Pedro yyëknëëjmjaay:

—Mëët mijts tëj y'ity Jesús xmëëtwittity, pën Nazaret tsoo'mp.

68Nits Pedro y'ëë'ntëjjk'ëëy jäts wyaany:

—Kä' ëjts n'ijxë puppën jä', jäts puttij mijts najj mtijjpy.

Nits Pedro pyitsëëmy tëjk'atsunk'äjpy. Jäts tsajpna'aaw y'ayaajxy muttu'kyaajjë. 69Nits jatu'kyaajjë najyä' to'oxytyëjjk y'ijxpaajtë jäts tnëm'axajjaay nitukkë'yë jaa'y:

—Yë' jaa'y yë' pënjäty tëj y'ity Jesús tmëëtwittijt'të'p.

70Nits Pedro kä' jatu'kyaajjë tkupëjjky. Jawäänë it nyajjxy, nits jaa'y pënjäty jäjp ijt'të tnëëjmjäätyë Pedro:

—Galilea'tjaa'y mijts, mëët mijts tëj y'ity xpawittity Jesús.

71Nits Pedro tu'ukyë wyaany:

—¡Y'ijxypy Yës Teety jäts kä' ëjts jä' jaa'y n'ijxë pën miits mtijjpy!

72Kä'änë'mts y'ijjty Pedro kyajpxkita'aky ku tsajpna'aaw mumäjtskyaajjë y'ayaajxy, nits Pedro tjaa'myejjtsy ku Jesús y'ijjty tëj nyee'mxyë: «Kä'änë'm wyä'në tsajpna'aaw y'aya'axy mumäjtskyaajjë, tëts mijts wyä'në mwa'any tuwëëkyaajjë, jäts kä' ëjts x'ijxë.» Nits Pedro yëk'ayoopë nyajyaa'w'ajjtë jäts yyaajxy.

Currently Selected:

Marcos 14: YTYA

Highlight

Copy