Mateo 24

Jesús tnikkäjpxy ku tsajptëjjk jyitwa'any

(Mr 13.1-2; Lc 21.5-6)

1Ku Jesús pyitsëëmy tsajptijkypy jäts tsyoo'në, nits nyimiijnë y'ixpëjkpëttëjjk jäts t'ijxpat'të ntsoj tsajptëjjk y'oyë tsyujjë. 2Nits Jesús nyëë'mxëtë:

—¿M'ijxtë'p miits tukkë'yë ixya'at? Ixyamts ëjts nnikkäjpxy nittu'ukë'n tsaaj pötsy kyatta'nt. Tukkë'yë yë' jyijtkëxt.

Ijxpäjjt ku wyä'në it naxwiin kyëxwa'any

(Mr 13.3-23; Lc 21.7-24; 17.22-24)

3Nits nyëjkxtë Olivos kojpk këjxm. Jämts Jesús tsyëënë'y'ixtaajky, jäts y'ixpëjkpëttëjjk nyimiijnë nits yyëktëëjë:

—Jä' ëëts ntsöjkypy mnikkajpxp junë jä' najj jyatt. ¿Tij ijxpäjjt kä'äjxjë'ëkp ku wyä'në mminwankojmë jäts ku it naxwiin kyukkëxëwya'any?

4Nits Jesús nyëë'mxëtë:

—Na'y'ijxy'ittëtë jäts katij pën mwin'ëënyëtë. 5Jä'ku mi'ntë'p nimay jaa'y jäts nyakyuxëëw'attëtë't naa'xkë'n ëjts. Mnëë'mxëtë'p jä': “Ëjts jä' yëknitsokpë'eepy”, jäts nimay jaa'y twin'ëëntë't. 6Mmato'otë'p miits tsip tyünyë tu'kwiin jatu'kwiin; kä'äts miits mtsë'ëkëtë't, jä'ku naa'm jyatt jawyiin; oyë'mts jä' najj wyä'në jyajäty Kä'änë'mts wyä'në tpaaty ku jä' tukkë'yë kyukkëxëwya'any. 7Natsyiptunëtë'p jaa'y tu'k'it jatu'k'it, nanyiputtë'ëkë'p naajx kajjp tu'kwiin jatu'kwiin, jää'jë'p yuuj xëëw, ujjxë'p it naxwiin jaxij jayaj. 8Tsoo'ntakpnë'mts wyä'në ayoo'n.

9»Nits miits myëkkë'yajkkëxtë't jäts ntsokattunk myëk'ijxtë't myëktu'ntë't: ke'eky ooky jaa'y m'ijxëtë't, jäts ëjts këjxm jaa'y myëk'oo'këxëtë't. 10Jä' it jä' xëëw nimay jaa'y kya'oktëyjyaaw'eenyëtë't, nits nyamyu'ampëkkëtë't nyamyutsip'attëtë't tu'uk janitu'uktë. 11Mi'ntë'p ja'at'të'p ka'oy yëk'ayuujnajxpëttëjj, jäts nimay jaa'y twimpit'të't twin'ëëntë't. 12Jää'jë'p kyoojyë kya'oywyë, nits nippën tsojjkë'n tka'okjakyäjpnëtë't. 13Pënts tpanajxkëjxp yë' tukkë'yë jäts tu'ukyë tyëyjyaa'w'ajjtë'n y'ity, jä'äts nitso'oktë'p. 14Kunë'm ya'at oy'ayuujk oymatya'aky wya'kxta'at tukkë'yë it naxwiin, jäts naajx kajjp t'ijxë't tnijawë't; nitnë'mts it naxwiin kyukkëxë't.

15»Yëk'ayuujknajxpë Daniel tjaay tnikkäjpxy kya'oywyë axëë'kpë mati' jaa'y tyuntë'p tsajptijkypy. Ku miits najj x'ijxtë't jyatt Kunüü'kxy it —pënpën nöky twin'ijxp winjawëtë yëkxon—, 16jäts pënjäty jäm Judea, wä'n tkä'äktë tnëjkxtë kojpk këjxm; 17pënpënts jäjp tyëjknikkejxypy katii'm tij tniwinaktë tyijkypy; 18pënpën kamjötypy katii'm tij wyit tniwimpit'të. 19¡Yëk'ayoopë jyat'të't to'oxytyëjjk pën wya'në jä' xëëw uu'nk tnikkëjxm'eepy ok pën wyä'në y'uu'nk tyëktsi'tspnë'm! 20Mmunuu'kxta'aktë Yës Teety jäts kä' najj jyatt ku wyä'në tyu'uy ok pyoo'kxë'nxëëw'ittë; 21jä'ku jää'jë'p mëjknäxy ayoo'n, ku it naxwiin yyëkpëëmy yyëkkojjy nijunë najj kyayëk'ijxy tyünyë, jäts kä' najj jatu'uk ayoo'n y'o'ijtnë't oojknë'm. 22Ku Yës Teety tkayëk'akko'nt it xëëw nippën kyanitso'okt, jakëjx Yës Teety tyëk'akko'nt it xëëw jäts nyitso'oktë't pënjäty tëj twin'ijxy twinway.

23»Ku pën mnëë'mxëtë't: “Ijxtë aa'xtuktë ixyaj jä' Yëknitsokpë”, “ok ku mnëë'mxëtë't yë' jä'”, katii'm xtëyjawëtë. 24Jä'ku mi'ntë'p ëë'mpë yëknitsokpë mëët ëë'mpë yëk'ayuujknajxpë jäts ttu'ntë't tyëknikkä'äjxjë'ëktë't mëjj'ijxpäjjt mëjjputtëjjk'ëë'ny, jäts twin'ëënt twimpitt jaa'y, jä' paat yyëkwin'ëëntë't pënjäty tëj Yës Teety tjawin'ijxy tjawinway. 25Tëj ëjts miits tsojjkyë nwaajnë. 26Jäts ku pën mnëë'mxëtë't: “Ijxtë aa'xtuktë, ixyäm jä' tëtsta'aky itjotm”, katii'mts mnëjkxtë; ok ku pën mnëë'mxëtë't: “ixyaj jä' y'ayu'utsy”, katii'm xtëyjawëtë. 27Jä'ku najj naa'xkë'n ku it wyitsüky jäts tukkë'yë xëëw'apitsempy xëëw'akitäkypy tsajpwiiny naxwiiny y'ajtsjajjta'aky, najj'ämpyts naxwiinë'tjaa'y y'Uu'nk jatu'kyaajjë myi'nt. 28Jä'ku pën maj xiijky nyamyükyëtë, oo'kpë'ts jäm.

Naxwiinë't jaa'y y'uu'nk wyimpity

(Mr 13.24-37; Lc 17.26-30,34-35)

29Ku najj ayoo'n nyajxkëxt, nits xëëw y'ookt jäts kä' po' y'ok'annë't, ka'ap may matsa' jäts tsajpwinmë't mëjk'ajjtë'n kuttujjkë'n mëjk yëkxi'ntë't. 30Nitnë'mts naxwiinë'tjaa'y y'Uu'nk yëk'ijxt jyupta'aky tsajpwinm, nits naajx kajjp ajawë atsë'ëkë jyë'ëytyë't yya'axtë't, jäts t'ijxtë't naxwiinë'tjaa'y y'Uu'nk tsajpwinm kyita'aky yoots jotm mëët tukkë'yë myëjj'ajjt kyëjxm'ajjt. 31Jä'äts tpakkäxp tsajpjaa'y Yës Teety tyumpëttëjjk jäts xuujx tyëkya'axtë't, najjts tyaxmuktë't twaamuktë't pënjäty tëj Yës Teety twin'ijxy twinway wä'n majktaxk'atsow it tu'ktsajp'akita'aky tu'knax'akita'aky.

32»Tta'ijxpëktë tsajptsuuky: Ku x'ijxtë tsajptsuuky kepy kyatikkätsy, najjts miits xnijawëtë jäts winkonnë'p pootjoojt. 33Kuts x'ijxtë't tukkë'yë kyuytyunë't, najjts xnijawëtë't jäts winkonnë'p naxwiinë't jaa'y y'uu'nk jatu'kyaajjë myi'nt. 34Ixyamts ëjts nnikkäjpxy jäts kä'änë'm wyä'në jaa'y y'oo'këxtë pënjäty ixyam jüky'eetyë'p ku jä' najj jyatt. 35Naxp kutakko'ypy it naxwiin tsajpwiin, kuts ëjts n'aaw n'ayuujk kä' jä' najjyë nyaxt kyutakko'yty, kuwanë'm jä' pu'uky kä'pxy kyuytyunë't.

36Nippënts jä' tkanijawë tij xëëw, winaak yaxp jä' najj jyatt, kä' jä' tnijawëtë tsajpjaa'ytyë, mëët kë'm y'uu'nk, nityu'uk jä' nitteety tnijawë.

37»Naa'xkë'n jyajjty ku Noé jyüky'ëëy, ninyajjts jyatt ku naxwiinë'tjaa'y y'Uu'nk jatu'kyaajjë myi'nt. 38Ku y'ijjty tsätsytyuuj tsätsypyojj kyayëk'ijxynyë'm kyamakke'exynyë'm, jäts jä' xëëw ku Noé mëjj kanëw jötypy tyëjjk'eenyë mati' yëk'oy'ëëy, uktë'p, xëëw tuntë'p, yaa'ypyëjktë'p, to'oxypyëjktë'p y'ijjty jaa'y. 39Mats y'ijjty tkajup'ijxtë tkakkumaytyë, nits tsätsykyom tuuj myiiny jäts nitukkë'yë jyë'tkëjxtë. Ninyajjts jyatt ku naxwiinë'tjaa'y y'Uu'nk jatu'kyaajjë myi'nt. 40Jä' xëëw, nimäjtsk wyä'në yaa'ytyëjjk kamjötypy, tu'ukts yëkpawa'at jatu'uk tya'nt. 41Nimäjtsk wyä'në to'oxytyëjjk jyëtstë, tu'ukts yëkpawa'at jatu'uk tya'nt.

42»Nakyuwijy'attëtë miits, jä'ku kä' xnijawëtë junë Wintsën jatu'kyaajjë myi'nt. 43Miits mnijaa'w'eepy, ku jyeexyë kuttëjjk tnijawë junë mää'tspë jya'atwa'any, wyintsunaxp jä' myaay pyëjkta'aky jäts kä' mää'tspë tyëkkë't. 44Ninyajjts miits mnakyujüky'attëtë't; jä'ku maj wyä'në xkakkumaytyë jäj naxwiinë'tjaa'y y'Uu'nk myi'nt.

Oy tyumpë mëët ka'oytyumpë

(Lc 12.41-48)

45»¿Pën tumpë jä' yyëktappawamp jäts tëjjk t'ijxy'itt, nits a'ijxë tyëk'itt kääky tojkx pën junë kuttëjjk kyaywya'antë, jä' pën yëkxon tunk t'ijxp ttajottakkoypy? 46Mëjjxontaajk pyaatp tumpë pën paajtë'p kyuttëjjk tkuytyunkexy tukkë'yë mati' yyëktappawamp. 47Ixyam ëjts nnikkäjpxy jäts jä' tumpë kuttëjjk kyë'moykyëxp tukkë'yë jäts y'ijxy'ijjtxë't myaay pyëjkta'aky. 48Kuts tumpë kä' y'oytyüny, nits wyinmay jäts tanëwyamp kyuttëjjk 49nits jä' myëëttumpëttëjjk ntsokattunk tüny, jäts mu'ukpëttëjjk tmëëtyo'ymyüky jä'äts myëëtkaypy myëët'ükypy, 50mats jä' tumpë wyä'në tkajup'ijxy tkakkumay tij xëëw wannak yaxp jya'att, nits jä' kyuttëjjk jya'att 51mëjkts jä' yyëk'ayoo'n mo'ot, jäts ninyajj jyatt naa'xkë'n ëë'mpëttëjjk jyat'të. Nits jä' jyë'ëyty yya'axt tsyätsywyinma'yty.

Currently Selected:

Mateo 24: YTYA

Highlight

Copy