San Mateo 28

T'awaanete jäts të Jesús jyuukypëjkne

(Mr 16.1-8; Lc 24.1-12; Jn 20.1-10)

1Ku nya'x jä pookxen xëë, jää tsuu jäts kyujätejk Domingo jëpye mutujk xëë, María Magdalena jäts jä tujk jä María nyëjkxte juma jä ookpa nyaxteke. 2Tunja'ye ojts jä it mëjk y'uxa, paaty ku tujk jä Wintsën y'ángel ojts kitaaky jäm tsapjootm jäts tninïjkx juma jä ookpa nyaxtëjke, jäts tyajkeek jä mëj tsaa juu t'akeepy jäts jää këxm tsyinye ooye. 3Jä ángel mëjk y'aja we'en i'xun jä witsejk, jä wyit wa'ajts poop we'en i'xun tsap'eepk. 4Ku t'ixte jä tujpata mëjk tsyëkete jäts y'ookempijte. 5Jä ángel tnïmye jä te'extëjkta:

—Ka' mtsëjketa. Nijaawep ëts jää Jesús miits m'ixtetep, jää juu yajkcruzpäte. 6Ka' jä ya'pën, të jä tjyuukypëjkne, we'nam ixu'n wyaany. Minta x'ixta jä ijt juma tpëëmte. 7Nëjkxta jatye jäts xwaanetat jä ixpëjkpatëjkta: Të jää jyuukypëjkne, wa jä nyijkx jäm Galilea jäts tyajknamyuket jä tujk ook; jäm x'ixtat, Yë tsawe' juu miits ntuuknijawa waantep.

Jesús tnije'ya jä te'extëjkta

8Jä te'extëjkta jatye jäm tsyoontene jäm juma jä Jesús nyaxtëjke, tsejketep jäts naywe'en mëjk xyoontëjkta, jäts nuump tninëjkxte jä ixpëjkpatëjkta jäts twaanawa'anta jä ayuuk. 9Wanitjye, jä Jesús jya'y jää winkujkta jäts tkotspëëkx, jäts jää te'extëjkta twintemete jä Jesús jäts t'ajootete, jäts tmojkxte jä tyëjk, 10jäts yajknïmyete:

—Ka' mtsëjketa. Nëjkxta xnëmeta jä nmuwu'ukta jäts nyëjkxtat jäm Galilea, jäm ëts jää x'ixtat.

Jä tujpata yajkmo'ota jä meen jäts tyaayetat

11Yo'otyëpnem wyena jä te'extëjkta, jäts winkex jä tujpata juu t'ix ijtep nyëjkxte jäm mej kajpen këxm ojts twaaneta jä teetëjkta nyiwintsënta tukëye tijaty të tyune. 12Yë teetëjkta nyiwintsënta nyëjkxte tmënakyots wa'aneta jä mïjit jayeta, jäts tkotsmujktat mëët jääta. Jäts tmootye jä may meen jä tujpata, 13jäts tnïmyete:

—We'en miits mwa'antat koots wyena jä it, maatep miits mweneta, ku yë ixpëjkpatëjkta jya'tye jäts tmäätste jää Jesús nyijkx kyopk. 14Kuts tnijawat jä yajkutujkpa tsoj të tyune, ëëts jä nijaawep tsoj ëëts mmënawya'net, ka' miits jä mtuketaketat. 15Wa'nit jä tujpata t'axajete jä meen jäts tuunte wintsoj yajknïmyete. We'en jä ayuuk t'awaane wajkxte jä tujpata xämpaat naywa'njunyam tkotsta jä Judíosta.

Jää Jesús tpawaany jä y'ixpëjkpatëjkta

(Mr 16.14-18; Lc 24.36-49; Jn 20.19-23)

16We'ntse nyëjkxte jä nimajktuk ixpëjkpatëjkta jäm Galilea, jäm kopkëxm juma jä Jesús tkets jäts nyawyatetat. 17Ku t'ixte jä Jesús, jäts t'ajootete, jäm winkex juu tka jaantsy'jaawete. 18Jäts jä Jesús tem nyïnëjkxeta jäts yajknïmyete:

—Të ëts jää Kunuukxtee xmëë tukëye jä kutujken jäm tsapjootm jäts naywe'en yaj naxwiin. 19Nëjkxta, x'ayo'oyta xwaneta jä Kunuukxtee kyets y'ayuuk jä jayeta jäts tukëye ja it jä naaxwiin, jäts jä Kunuukxtee kyets y'ayuuk xwaanetat; jäts xajk'nëëpätat jä Kunuukxtee xyë këx, jä y'unejk mëët jä Kunuukx poj. 20Jäts xwaanetat tsoj kyetsmotetat tukëye tso miits ntuuk'ixte. Jäts ëts këx, ijtp ëts n'itet miits mëët joom xëë, koonem wyena yë it naxwiin kyukëxat

Currently Selected:

San Mateo 28: JKAYUUK

Highlight

Copy