Eclesiástico 19
19
1Jiñi mu'bä imel che'bä bajche' jiñi
ma'añik bakibä k'iñ mi kaj itaj ichu'bä añ;
jiñi machbä añik mi' iwis käñtañ alä chu'bä añ,
k'uñte', k'uñte' mi' ikaj iyajlel ti p'ump'uñlel.
2Jiñi ya'lel ts'usub yik'ot x-ixikob
mi' sokob jiñi p'ip'obä iña'täbal,
jiñi mu'bä iyajñel baki añ xts'i'lelbä x'ixikob
mach yujilix kisiñ.
3Mi' kaj ti päk'mäl,
jiñi mi' kaj iwe'esañ motso'
ixku jiñi ijoñtolil mi' kaj ti jisäñtel.
Jiñi mulil mu'bä lak taj ti lak t'añ
4Majki se'eñuñbä mi' ñop chuki mi' isu'beñtel,
k'uñjach ip'ätälel ipusik'al;
jiñi mu'bä icha'leñ mulil,
muk'ix ibajñel tik'lañ ibä.
5Jiñi mu'bä itijikñesañ ipusik'al imel joñtolil,
mi' ikaj iyäjk'el ti toj mulil.
6Jiñi mu'bä iña'tañ chuki mi' iyäl,
mi' kaj ti chumtäl ti ñäch'tälel,
yik'ot jiñi mu'bä its'a'leñ wulwult'añ,
ts'itajach mi' ikaj iyilañ wokol.
7Mach ap'ol jiñi u'yaj t'añ
cha'añ ma'añik ma' wu'biñ wokol.
8Mach atsiktesañ ti' itojlel jiñi akäñäbä api'äl
mi' ti' itojlel jiñi ts'a'bä mi' k'elet.
Ixku mi' añ chuki yom atsiktesañ ti isujm,
yom tsajilet che' bakibä k'iñ ma' awäl.
9Mi tsa' iyu'bi juñtikil chuki woli awäl,
ma'añix mi' ikaj ik'elet ti uts'at,
che' jiñi ti wi'il mi' ikaj its'a'leñet.
10Mi' añ chuki tsa' su'beñtiyet,
mach atsiktesañ k'äläl che' ma' chämel,
mach amel apusik'al, kome ma'añik mi' kaj iyäk'eñet wokol.
11Jiñi machbä tsajil cha'añ mi' ilot jiñi t'añ
ñumeñ mi' iyilañ wokol bajche' x'ixik che' mi' ich'ok'añ iyalobil.
12Bajche' ite'el jaläp ts'äpälbä ya' ti' ya',
che'äch jiñi mukulbä t'añ ti' ipusik'al jiñi xwulwult'añ.
Jiñi lotiya t'añ
13Mi tsa' isu'betob t'añ cha'añ akäñäbä api'äl,
ñaxañ yom ak'ajtibeñ jiñi api'äl,
ame ma'añik tsi' imele chuki wolibä iyäjlel ti' itojlel;
mi tsa'äch imele, mele tik'ojel cha'añ ma'añik mi icha' mel.
14Mi añ chuki tsa' su'beñtiyet cha'añ api'äl ti chumtäl, k'ajtibeñ,
ame ma'añik tsi' yälä wolibä ichäñ su'beñob;
ixku mi' tsa'äch iyälä, mele tik'ojel cha'añ ma'añix mi' ichäñ al.
15K'ajtibeñ akäñäbä api'äl;
awilañ añ ka'bäl t'añ loñ jop' mulilbä;
mach yomik ma' alaj ñop chuki mi' iyäjlel.
16Añ bixel mach isujm mu'bä lak käl,
ixku mach cha'añ lak kom;
¿Majki juñtiklel ma'añik tsi' icha'le mulil ti it'añ?
17Che' maxto atik'i jiñi api'äl ti chumtäl, k'ajtibeñ;
yom apijtañ cha'añ jiñi itoj-esaya ambä ti panchañ mi' isujmetisañ.
Jiñi xuk'ulbä ña'täbaläl
[18Ñaxañ yom ak'uxbiñ Lak Yum,
che' jiñi ti' pejtelelob mi' kajel ik'uxbiñetob,
mi' añäch aña'täbal
Lak Yum mi kaj ik'uxbiñet ja'el.
19Mi käñä acha'añ ixik'ojel Lak Yum
yik'ot ma' chäñ ch'ujbibeñ it'añ,
mi' ikajel iyäk'eñet oñbä aja'bilel ti pañämil.]
20Pejtelel ña'täbal ya'äch añ che' mi lak ch'ujutesañ Lak Yum,
yik'ot che' mi lak weñ ch'ujbibeñ ixik'ojel.
[21Mi' juñtikil yaj e'tel mi' ñusañ it'añ iyum
mi' tejchel imich'ajel iyum, mu'bä iyäk'eñ ibäl iñäk',
ixku che' ti wi'il mi' cha' jak'beñ
ma'añix ik'äjñibal.]
22Che' la jkujil ka'bäl joñtol, mach ña'täbalik;
che' mi la jch'ujbiñ ikäñtesa xmulilob mach jiñik xuk'tälel.
23Añ cha'tikil uxtikil mu'bä icha'leñob chuki joñtol
cha'añ mi' ña'tañob año'bäch ich'ejlel,
ixku yaño'bä mi' cha'leñob mulil
cha'añ juñyaj ma'añobik iña'täbal.
24Ñumeñ uts'at che' ma'añik chuki lak kujil yik'ot che' kojach mi lak ch'ujutesañ Lak Yum,
loñjach che' añ chuki lak kujil mi woli lak ñusañ xik'ojel.
25Añ cha'tikil uxtikil mi' ña'tañob cha'añ ch'ejlobäch
cha'añ mi' melob chuki machbä tojik,
ixku yaño'bä mi' k'äñob ich'ejlel
cha'añ mi' itajob chuki yomob.
26Añ chajachbä k'uchuk'ñe ipat yik'ot obol yilal,
ixku ya' ti' pusik'al but'ul ti' ilotiya;
27mi' lik' ju'sañ ijol yik'ot mi' imel ibä ti xkojk',
ixku che' ma'añik mi' yilañob, mi ik'äñ ijoñtolil.
28Mi ma'añik ip'ätälel wäle cha'añ mi' cha'leñ mulil ti' atojlel,
che' mi' k'otel ik'iñilel, mi' kaj imelbeñet joñtol.
29Ti' wut jach mi' mejlel ikäjñel wiñik,
ti' melbal ajpañ tsikil jiñi ambä iña'täbal.
30Che'äch bajche' mi' läp ipislel jiñi wiñik,
itse'ñal ti' yej yik'ot ixämbal,
mi' tsiktesañ chuki añ ti' ipusik'al.
Currently Selected:
Eclesiástico 19: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM