Zakariya 9
9
Othorihiwa wa amwiittana a aYixrayeli
1Wooperera wa Yave ti wa elapo ya Hadraki ni onoomorela oDamasku. Vano maitho a Yave angweha omutthu wootheene ni wa ipuumba sootheene sa oYixrayeli, 2oHamati ohelanne mwiinano ni oDamasku, angwehatho oTiro ni oSidoni arookhalaru aneettottho. 3oTiro wohiitekela nipuro noolipaxa; woothukumanyiha eparatha* ntoko ntthupi, ni eyuuma yoorikaxa ntoko nttoko na mmiseweni. 4Vaheera Yave onoovenxa mihakhusaya, aphwatelaka mphareiyani ni vano onoolalihiwa ni mooro. 5wAxekeloni onimoona yeeyo, wooveke. oGaza onootteenguwaxa ni hiihotho wEkroni, niwoko owehererawaya onoolakaseya. oGaza onoohiiwa woohikhalano mwene ni wAxekeloni onoothaamiwa. 6Anamarwa anookuxa wAxidoti ni Miyo kinoomaliha wiikuxa wa aFilisti. 7Kinimuukuttha ephome owanoniwaya; yooca yoohitthuniheriwa mmainonimwaya. Yaale eneera ehale, anookhala a Mulukwaahu, ethatuwaka asitokweene a oYuda ni wEkroni onoolikana aYebusi. 8Kinimwaakiha Empaaka mwa anamahuhula. Namahasula kharwatho ahasula mulokwaaka, niwoko vano Miyo kinoona yeeyo ni maithwaaka.
Orwa wa mwene a oSiyoni
9Muhakakalaxe mwaana muthiyana a oSiyoni; mukhuwele mwaana muthiyana a oYerusaleemu! Moone, mwenaanyu ongwaattamelani, oororomeleya ni oowineene, a murima woomaaleleya ni angwenleene buuru, aani mwaaxaana a buuru muthiyana. 10Owo onoophwata ikaaro sa ekhotto sa wEfrayimi, ikavalu* sa ekhotto sa oYerusaleemu ni nyuura sa ekhotto sinimwintakiwa. Owo onoolaleera murettele wa miloko, alamulaka okhuma ephareiya ni ephareiya; okhuma mooloko Efratesi mpaka ekotenle elapo. 11Mwaha wa nyuwo – niwoko na ephome ya wiiraanawaka ni nyuwo – kinoowoopola anamatthukiwaanyu muhimeni moohikhala maahi. 12Ii!, anamatthukiwa oosareya oweherera, muhokoleele vanipuroniwanyu noolipihiwaxa. Vaanaanova kinlaleiya weera kinimoorehererelani sootheene moota wa iphura. 13Miyo kaakungaka oYuda ntoko onkungeliwaaya muura, kivarelaka muteko wEfrayimi ntoko muupa, kinoopakiha weera anamwane asilopwana a oSiyoni yaavenyere anamwane asilopwana a oGresiya ni kinoopaka oSiyoni ntoko ekatana ya nakhotto ooweraxa. 14Vano Yave onimwiixoonihera wa yaawo; muupaawe onootutha ntoko overinya. Yave onlamula sootheene onimwiipa nipalapatta; Owo onimweetta mutthekuni ya ohitto; 15ni Yave a ikuru sootheene onoowaakiha. Awosa anoonyikalela ni anoophwata ni ekhwambala. Awosa anoowura ephome ya amwiittana ntoko ereene eviinyu; anookhala oosareyeene ntoko ebasiya yoovuuvihera mmaloothoni mwa altaari*. 16Yave Mulukwaaya onimwaavuluxa vanihukuni nenenenno ntoko Mukukhuli omvuluxaawe ikhondoolosawe. Awosa animwaara mweelaponimwawe ntoko maluku oowaaraxa mucireembani. 17Ii! Anookhala ooreeraxa ni oophwaneliwaxa! Etrigu enimwaavaha ikuru amiravo, ni hiihotho eviinyu enyowani aximwali.
Currently Selected:
Zakariya 9: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
