Zakariya 5
5
Moonelo wanaathannamosa: nikwakhwala nivavaka
1Kaawehatho, ni naakhalawo vamaithoniwaka nikwakhwala nivavaka. 2Owo aakikoha: “Munoonani?” Miyo kaamwaakhula: “Kinoona nikwakhwala nivavaka, mweerakamelonimwaya imeetru* muloko ni mweekhuveelonimwaya imeetru* ithanu.” 3Vano aakeerela: “Mmo noolempwa nlapho ningyeeheriwa mweelaponi yootheene. Mpatta mmoha wa nikwakhwala yoolempwa weera ootheene aniiya animoomoliwa mweelaponi; mpatta mukina weera ootheene anlipela moota woowootha animoomoliwatho. 4Yave a ikuru sootheene onghima: ‘Miyo kirumihenle nlapho nno weera nivolowe mpaani mwa namwiiya ni mwa yoowo onlipela moota woowootha mwa Nsinanaka. Nno nnookhala mpaanimwaya, ni nnoophwata okhuma itthaabwa mpaka indyerwa.’”
Moonelo wanaathannamiili: muthiyana mumpaparani
5Vano ndyelo uuluma ni miyo aakaattamela, anakeerela: “Ngwehe ni moone yeeyo enkhumelela.” 6Miyo kaamukoha: “Eheeni ela?” Owo aakaakhula: “Ti mpapara wooringelano.” Aaheeratho: “Mmo sirimo sootakhala sa miloko sa elapo yootheene.” 7Vano ekhuneelelo ya eyuuma yaakhuneliwa ni mumpaparani mmo aakhalamo muthiyana akilaathiyeene! 8Ndyelo eenre: “Wu otakhaliwa” ni aamukakhelatho mumpaparani, anakhuneela ni ekhuneelelo ya eyuuma. 9Vano kaaweha, kinawoona asithiyana eeli ohoolowaka yaarino mapupha ntoko a ntiki; epheyo yaavenula mapuphaaya. Vano awosa yaattukhulela mpapara eriyari ya erimu ni vathi. 10Kaamukoha ndyelo uuluma ni miyo: “Omvavela woowi mpapara?” 11Owo aakaakhula: “Wa elapo ya oBabiloniya weera yamutekelewo empa yoowo. Mweehuhuni yootthuneyaxa, mpapara onookhalihiwawo vanipuroniwaya.”
Currently Selected:
Zakariya 5: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
