aRooma 9

Muluku onaathanla yaawo onaatthunaawe.

1Kinghima ekhaikhai mwa Kristu, nkinootha. Soosuwelasaka sinkikhalela onamoona mwa Munepa Wootteela: 2Koothananaxa, ni kookhalano murima woolemela woohihiyerera. 3Vano miyo koolikana, mpaka kaahaawela weera kilaphiwe ni kimwalanyihiwe ni Kristu niwoko na osivela wa axunnaka, yaawo a mulokwaaka, 4muloko wa oYixrayeli. Waakhuleliwa ntoko anamwane ti wawaya; ovuwa wa wiirimu ti wawaya. Soowiiraanyiha, waakhuleliwa wa nlamulo, olapa Mpaani mwa Muluku, ni soororomelihiwa – sootheene siri sawaya. 5Anamwane a asitokweene oopacera a oYixrayeli ti awaya, ni mweerutthuni Kristu aari a ekhapiraaya. Muluku oopwaha itthu sootheene ooreelihiwa mahuku ootheene. Ame*. 6Nihuupuwele weera masu a Muluku yaakusanyiheya. Khaahiyono anamwane ootheene a oYixrayeli weera ti vekhaikhai muloko wa oYixrayeli. 7Hata khoohiyono weera ekhapira yootheene ya Abrahaamu eri anamwanaaya a ekhaikhai. Ohiyanawaya: “Ti niwoko na Isaaki ekhapiraanyu eneeraaya yaalikeliwe.” 8Eyo tiyo: khaahiyono anamwane a erutthu ari anamwane a Muluku, mene ti anamwane a yoororomelihiwa ari oowaalikeliwa ntoko ekhapira ya ekhaikhai ya Abrahaamu. 9Vano ti hiihaawo yoororomelihiwa epakiwaaya: “Ehuhu yootthuneya nkirwe veeli, ni Sara anaakhale ni mwaana.” 10Ni eyo khayeereiye paahi ni Sara, menetho ni Rebeka, aarino maphapo yaakhalano atithaya amoharu, atithihu Isaaki. 0Ni nlelotho, ehinaaye oyariwa maphapo, awo ehinaaye opaka yooreera, hata yoonanara, Muluku aamweerela Rebeka: “Mutokweene anaamurumeele mukhaani,” ntoko elempwalaaya: “Koomusivela Yakobe, mene koomuthanya Esawu.” Hiihaawo, Muluku oniixoonihera weera ethanlelo eri ya Yoowo oniitthana, ehikhanle ya miteko sa omutthu. 14Vano, nneereke hai? Apaale Muluku khankhala ni ekhaikhai? Hata vakhaani! 15Owo aamweerela Moisesi: “Kinoommorela ikharari yoowo kintthunaaka ommorela ikharari, ni nkimoonele ehaaya yoowo kintthunaaka omoonela ehaaya.” 16Tivawo eyo kheehiyono ya ohaawela, naari ya miteko sa omutthu, mene ya ikharari sa Muluku. 17Vano Yoolempwa* eneera sa Farawu*: “Miyo kooweemexa niwoko na nthowa nna paahi: weera kiwoonihere mwa weyo ikurusaka, ni weera Nsinanaka nilaleiwe elapo yootheene.” 18Tivawo Muluku onimmorenlaawe ikharari yoowo onimutthunaawe ni ommuumihera murima yoowo onimutthunaawe. 19Apaale mukina a nyuwo anaakeerele: “Waari hiiho, vano niwoko heeni Muluku nlelo onihimahimmaawe hiyo: Taani ongwera okhootta otthunawawe?” 20Mutthu, weyo taani oomukohakoha Muluku? Apaale yeeyo epakiwe enoowera omweerela yoowo opanke: “Heeni mukipankaanyu hiiha?” 21Namoopa a nyaapu khanono ikuru soopaka wa olokweene yoowo mwaapu mmoha wa soovarela soottittimiheyaxa, ni mwaapu mukina wa soovarela sa khula nihuku? 22Nnihime eheeni hiyo, Muluku atthuna woonihera isarasawe ni asuweliha ikurusawe? Owo oovilela ni oweherera otokotoko nyaapu sa isarasawe sipakeliwe ophwata. 23Nihimeke eheeni Owo aapankaawe yeeyo weera sisuweliwe mihakhu sa ovuwawawe wa nyaapu sa ikhararisawe Owo orehererenlaawe khalayi ovuwa? 24Vano hiyo nri a nyaapu iya, hiyo Muluku oniitthannaawe, ohikhanle paahi wa aYuda, menetho wa amalapo. 25Ntoko mprofeeti Hoxeya eenraawe: “Nkiitthane mulokwaaka yoowo wahaakhanle, ni oosiveleya yoowo ahaakhanle.” 26Ni: “Nipuro naahimmwalaaya: ‘Nyuwo khamuhiyono mulokwaaka,’ vaavaawo nyuwo mmwiitthaniwe ‘anamwane a Muluku mukumi.’” 27Mprofeeti Yesayatho onghima mwaha wa aYixrayeli: “Naamwi aYixrayeli yaantteene ntoko ehaava ya mphareiya, eniivuluxiwe atthu vakhaani paahi, 28niwoko Apwiya eniikwanihere nthorihelo vathi moota woowaakuveya ni wookwanela.” 29Ntoko Yesaya eenraawetho khalayi: “Apwiya a anakhotto yahaanikhalinghe ekhapira, naamuthatuwa ntoko oSodoma, ni naamulikanyihiwa ni oGomora.”

Ohiroromela wa aYixrayeli

30Vano, nneereke hai? Amalapo yahaasaanse waakhuleliwa ni Muluku, yaaphwanya iwo – waakhuleliwa onrweela niwoko na nroromelo. 31aYixrayelitho yaasaasa nlamulo weera yaakhuleliwe ni Muluku, khayaawenre. 32Heeni yahaawenraaya? Niwoko khayaasaasa ni nroromelo, mene ni miteko. Awo yaakwattuliwa ni nluku nookwattula. 33Ntoko elempwalaaya: “Moone, Miyo kohiiyaathi oSiyoni nluku nookwattula ni noowuuwiha, mene yoowo onroromela, nenno kharwa uuliwa muru.”

Currently Selected:

aRooma 9: VMK2021

Highlight

Copy