Matheyo 26
26
Ovaaneleliwa Yeesu
1Amalihaka ohima itthu iye, Yeesu aaweerela oohuseraawe: 2“Moosuwela weera ahanle mahuku meeli ophiya ehuhu ya mPaska*, ni Mwaana a mutthu anaavahereriwe weera athomeiwe.” 3Wa ehuhuweene yeele, ahooleli a asaserdoti* ni asitokweene a muloko yaathukumana empa etotoko ya mutokweenexa a asaserdoti*, nsinanawe iitthaniwa Kayafasi, 4ni ootheene yaavaanela omvara Yeesu ni moota mukina woomvariha weera emwiive. 5Yaaheeratho: “Ehikhale ehuhu ya efesta ya mPaska*, weera ohikhale onyakuleleiya variyari wa muloko.”
Yeesu oottikittheliwa oBetaniya
6Areene Yeesu oBetaniya owannyawe Simeyoni namakokho, 7aamwaattamela muthiyana mmoha ni mukoomba woopakiwa ni alabaster, ereenemo makhura oowunkhelaxa ni oorikaxa. Amphwanyaka Yeesu uurammeene vameesa, owo aarihela makhura ale mmuru mwa Yeesu. 8Oohusera, yoonaka yeeyo, khayaahakalanle ni yaakoha: “Annanariheliwa heeni? 9Makhura ala yaathumihiwe, saano naakhenleene musurukhu mwincipale, ni owo yaamvahiwa atthu oohaawa.” 10Iiwaka yeeyo, Yeesu aaweerela: “Heeni nyuwo munimxupaanyu muthiyana ola? Ola ookipakela etthu yooreera. 11Vano, atthu oohaawa eniikhale ni nyuwo mahuku ootheene, mene Miyo nkinrowa okhala ni nyuwo mahuku ootheene. 12Orihenlaawe makhura oowunkhelaxa mweerutthunimwaka, owo oopaka yeeyo weera akirehererele ovithiwawaka. 13Miyo kinoororomelihani weera mapuro yaawo ootheene a elapo ya vathi masu ooreeraxa ala eneeraaya elaleiweke, yeeyotho owo opankaawe eniithalihiwe, weera ola uupuweleliwe.”
Yudasi onaakhulela omvariha Yeesu
14Vano mmoha a muloko neeli, iitthaniwa Yudasi Iskariyoti, aarowa wa ahooleli a asaserdoti* 15ni aahaakoha: “Mmukivahe hai miyo koovahererani Owo?” Hiiho awo yaamuliva makhoobiri miloko miraru a eparatha*. 16Evinyero vaavaale, Yudasi aapacera waasa ehuhu yootthuneya weera amvaherere.
Yooca yookisera ya Apwiya
17Nihuku noopacera na efesta ya ipaawu soohikhalano eferementu oohusera yaamwaattamela Yeesu ni yaamukoha: “Muntthuna woowi Nyuwo weera hiyo nareherere yooca ya mPaska*?” 18Owo aawaakhula: “Mwavolowe mmuttettheni ni mwamwaase mulopwana mukina ni mwamuleele: ‘Muhusiha eenre: ‘Ehuhuwaaka yookhuveela. Miyo kinrowa omuca mPaska* owannyinyu vamoha ni oohuseraaka.’” 19Oohusera yaapaka ntoko Yeesu aaleenlaawe, ni yaamureherera mPaska*. 20Wiilaka, Yeesu aahuurama vameesa vamoha ni muloko neeli 21ni ecaaka, Owo aaweerela: “Kinooleelani vekhaikhai weera mmoha a nyuwo anaakivarihe.” 22Awo yaathanana vancipale, enapacera omukoha mutthu ti mutthu eeraka: “Vekhaikhai nkihiyono miyo, Apwiya!” 23Yeesu aaheeratho: “Yoowo ociiye vamoha ni Miyo esasaani emoharu yeela, anaakivarihe. 24Mwaana a mutthu anaavarihiwe ntoko elempwalaaya mwaha wa Yoowo, mene Ii! Onoohaawa yoowo aneera amvarihe Mwaana a mutthu! Fataari ahaayariwe!” 25Vano Yudasi, eera amvarihe, aamweerela: “Vekhaikhai nkihiyono miyo, Muhusiha.” Yeesu aamwaakhula: “Aani, ti weyo!” 26Ecaaka, Yeesu aakuxa epaawu, anamutthapela Muluku, anameiyanya, anaavaha oohuseraawe, eeraka: “Mukuxeke ni muceeke: ela ti erutthwaaka.” 27Vahoolowaya aakuxa ekoomixi, anamutthapelatho Muluku, anaavaha oohusera, eeraka: “Ngwureke ootheene. 28Ela ti ephomaaka ya wiiraanyiha, enriheya mwaha wa atthu ancipale weera eleveleliwe soottheka. 29Miyo kinooleelani weera okhuma vaanaano va mpaka ohoolo, nkinrowa owura wa yoowiima ya ematta ya iwuuva* mpaka nihuku nenno kineeraaka kiwure eviinyu enyowani vamoha ni nyuwo moomweneni wa Atithaka.” 30Yiipakaru ecipo, yaavenya erowaka omwaako wa Sooliveira.
Yeesu onghima weera Pedru anaamukhootte
31Vano Yeesu aaweerela: “Ohiyuweene yoola ootheene nyuwo munookihiya, niwoko yoolempwa: ‘Kinoomuvulaliha Mukukhuli, ni ikhondoolo sa muhuwo nsimwaareiye.’ 32Kaavenyererakatho, kinoorowa ohoolowanyu wa oGalileiya.” 33Pedru aamwaakhula: “Hata ootheene yoohiyeeni, miyo nkinoohiyani!” 34Yeesu aamwaakhula: “Kinoororomelihani weera ohiyuweene yoola, ahinaaye wiipa muthupi, munookiruna imaara tthaaru.” 35Pedrutho aaheera: “Hata otthuneyaka weera miyo kikhwe vamoha ni Nyuwo, miyo nkinoorunani.” Ni oohusura akina ootheene yaaheeratho yeeyo.
Yeesu oGesemani
36Yeesu aarowa ni oohuseraawe vanipuroni niitthaniwa Gesemani, anaweerela: “Mukilaathiki va, Miyo kinrowa vale ovekela.” 37Amurowanaka ni yoowo Pedru ni anamwane eeli a Zebedeyo, aapacera othananaxa ni oripiwa murima. 38Vano aaweerela: “Munepaaka ori woothananaxa, mpakatho okhwa. Mukhale va ni mulipeleleke ni Miyo.” 39Arowaka vahoolo vakhaani, aahuuramihela ekhovaawe vathi, anavekela: “Tiithi, wawereya, mususihe wa Miyo ekoomixi ela, wa soothesene, ohikhale ntoko kintthunaaka, mene ntoko muntthunaanyu.” 40Aahokoleela wa oohuseraawe ni aahaaphwanya ekonaka. Vanonto Owo aamukoha Pedru: “Khamuwenre olipelela ni Miyo hata ewoora emoha paahi? 41Mulipelele ni muvekele weera muhivariwe ni yooweereriwa. Munepa ti woolikana, mene erutthu ti yoohilipa.” 42Aavenyatho arowaka ovekela: “Atithaka, waahiwereya osusiha wa Miyo ekoomixi ela kihiwuraka, opakiwe otthunawanyu.” 43Ahokoleelakatho, aahaaphwanya ekonaka, niwoko yaavoliwa ikhove. 44Vano aahaahiya ni aavekela emaara yanaararu, ahimaka masu mamoharu. 45Aahokoleela wa oohuseraawe anaweerela: “Nyuwo nlelo munookona ni munimwiitthuuwa? Yookhuveela ewoora aneeraawe avahereriwe Mwaana a mutthu mmatatani mwa anamattheka. 46Muvenye ni nrowe. Iwe onimoowa namavarihaaka.”
Ovariwa wa Yeesu
47Eeraka olokolola Yeesu, aaphiya Yudasi, mmoha a muloko neeli. Atthu ancipale yaari ni yoowo, ekunxeene mavaka ni ikopo, yaarumihiwe ni ahooleli a asaserdoti* ni asitokweene a muloko wa atthu. 48Namavariha aahiiwanana eneneero ni yaawo, aweerelaka: “Yoowo kineeraaka kamuulumihe ni ebeecu, ti Yoowo. Mwamvareke!” 49Arowaka woowaakuveya wa Yeesu, Yudasi aamweerela: “Salaama Muhusiha,” ni aambeeca. 50Yeesu aamukoha: “Nthamwene, mwaaweenle eheeni?” Atthu akina yaamwaattamela, yaamvara Yeesu enamutthuka. 51Mmoha a yaale yaari ni Yeesu, ookolaka moonowaawe, aakhumiha ekatanaawe ni aakwasa naaru na murumeiyi a mutokweenexa a asaserdoti*. 52Yeesu aamweerela: “Muhokoloxere mwaalo munluwoni! Vano, ootheene ankuxa mwaalo, eniiriheiye ni mwaalo. 53Khamusuwenle weera Miyo kinoowera waavekela Atithaka, ni Awo eniikurumihele khuluwi andyelo oohaalikeleiya? 54Moota heeni yeeraaya ekwaniheriwe Yoolempwa* yeenre ontthuneya weera itthu iya seereiye mooteene yoola?” 55Ehuhuweene yeele Yeesu aaweerela atthu ancipale: “Niwoko heeni mungwaanyu okivara ni nyaalo ni ikopo? Miyo kinaalamula atthu weera ewane ni ebooma? Mahuku ootheene Miyo kannaxuttiha Mpaani mwa Muluku, ni khamwaakitthunke. 56Sootheenetho iya seereiye weera ekwaniheriwe Yoolempwa* ya maprofeeti.” Vano oohusera ootheene yaamuhiya ni yaatthawa.
Yeesu ohoolo wa eSineedriyu*
57Yaawo yaamutthunke Yeesu yaamukuxa emuronghaka wa Kayafasi, mutokweenexa a asaserdoti*, weiwo yaathukumannaaya anamawera a nlamulo* ni asitokweene. 58Pedrutho aamutthara areene ottaiwene mpaka vaate wa empa ya mutokweenexa a asaserdoti*. Vano, aavolowa ni aakilaathi ni anamalipelela weera oone seiyo seera sikhumelele. 59Ahooleli a asaserdoti* ni ootheene a eSineedriyu* yaasaasa nthowa na Yeesu weera emuthorihele okhwa, 60mene khayaaphwannye, naamwi yiixooniheraka anamoona ancipale oowootha. 61Woomaliha, yaahiixoonihera anamoona eeli yeeraka: “Mulopwana Ola aaheera: ‘Miyo kinoowera ophwata Empa ya Muluku ni kinooteka mmahukuni mararu paahi.’” 62Vano aaheemela mutokweenexa a asaserdoti*, anamweerela Yeesu: “Khamunaakhula yeeyo awo angwootheraayani?” 63Yeesutho aamaala. Mutokweenexa a asaserdoti* aamweerela: “Kinoonyesererani weera munlipele Muluku Mukumi: Nyuwo mwaari Kristu, Mwaana a Muluku, munileele!” 64Yeesu aamwaakhula: “Nyuwo moheera muneenaanyu. Miyo kinooleelanitho: nniphiye nihuku muneeraanyu mmoone Mwaana a mutthu akilaantheene moono mulopwana wa Yoowo a ikuru sootheene ni awaaka mmahutteni a wiirimu.” 65Ti vaavaawo mutokweenexa a asaserdoti* aahunlaawe soowarasawe eeraka: “Oomuveiha Muluku! Khaninaatthuna anamoona akina. Nyuwo mohiiwa omuveihawawe Muluku. 66Munuupuwela hai?” Awo yaamwaakhula: “Omphwanela okhwa!” 67Vano akina yaamusenyela owiitho, emmanaka ni icipakhira; akina yaammana ni ilatuma 68yeeraka: “Otthome, Kristu, taani oomanne?”
Pedru onimruna Yeesu
69Pedru akilaantheene vaate, ni namuteko muthiyana amwaattamelaka yoowo, aamweerela: “Nyuwotho mwaari ni Yeesu Yoole muGalileiya.” 70Vano owo aaruna vamaithoni wa ootheene eeraka: “Nkisuwenle yeeyo munuulumaanyu.” 71Vano aavenya mpatta waari mulako mutokotoko, weiwo namuteko muthiyana mukina aamoonnaawe, ni aaweerela yaale yaari vaavaale: “Mulopwana ola aari ni Yeesu muNasarete.” 72Ni owo, alipelaka, aarunatho eeraka: “Nkimusuwenle Mulopwana Owo.” 73Eviraka ehuhu vakhaani, yaawo yaari weiwe yaaphiya wa Pedru ni yaamweerela: “Vekhaikhai, nyuwo ti mmoha a yaale. Muulumelowaanyu onoothoonyani.” 74Vano aapacera onyohola ni olipela eeraka: “Nkimusuwenle Mulopwana Owo.” Woowaakuveya muthupi aahiipa. 75Pedru aahuupuwelela masu Yeesu aamuleenlaawe eeraka: “Ahinaaye wiipa muthupi, munookiruna imaara tthaaru.” Avenyaka vaavaale, aahiinlaxa omvoreiyaka murima.
Currently Selected:
Matheyo 26: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
Matheyo 26
26
Ovaaneleliwa Yeesu
1Amalihaka ohima itthu iye, Yeesu aaweerela oohuseraawe: 2“Moosuwela weera ahanle mahuku meeli ophiya ehuhu ya mPaska*, ni Mwaana a mutthu anaavahereriwe weera athomeiwe.” 3Wa ehuhuweene yeele, ahooleli a asaserdoti* ni asitokweene a muloko yaathukumana empa etotoko ya mutokweenexa a asaserdoti*, nsinanawe iitthaniwa Kayafasi, 4ni ootheene yaavaanela omvara Yeesu ni moota mukina woomvariha weera emwiive. 5Yaaheeratho: “Ehikhale ehuhu ya efesta ya mPaska*, weera ohikhale onyakuleleiya variyari wa muloko.”
Yeesu oottikittheliwa oBetaniya
6Areene Yeesu oBetaniya owannyawe Simeyoni namakokho, 7aamwaattamela muthiyana mmoha ni mukoomba woopakiwa ni alabaster, ereenemo makhura oowunkhelaxa ni oorikaxa. Amphwanyaka Yeesu uurammeene vameesa, owo aarihela makhura ale mmuru mwa Yeesu. 8Oohusera, yoonaka yeeyo, khayaahakalanle ni yaakoha: “Annanariheliwa heeni? 9Makhura ala yaathumihiwe, saano naakhenleene musurukhu mwincipale, ni owo yaamvahiwa atthu oohaawa.” 10Iiwaka yeeyo, Yeesu aaweerela: “Heeni nyuwo munimxupaanyu muthiyana ola? Ola ookipakela etthu yooreera. 11Vano, atthu oohaawa eniikhale ni nyuwo mahuku ootheene, mene Miyo nkinrowa okhala ni nyuwo mahuku ootheene. 12Orihenlaawe makhura oowunkhelaxa mweerutthunimwaka, owo oopaka yeeyo weera akirehererele ovithiwawaka. 13Miyo kinoororomelihani weera mapuro yaawo ootheene a elapo ya vathi masu ooreeraxa ala eneeraaya elaleiweke, yeeyotho owo opankaawe eniithalihiwe, weera ola uupuweleliwe.”
Yudasi onaakhulela omvariha Yeesu
14Vano mmoha a muloko neeli, iitthaniwa Yudasi Iskariyoti, aarowa wa ahooleli a asaserdoti* 15ni aahaakoha: “Mmukivahe hai miyo koovahererani Owo?” Hiiho awo yaamuliva makhoobiri miloko miraru a eparatha*. 16Evinyero vaavaale, Yudasi aapacera waasa ehuhu yootthuneya weera amvaherere.
Yooca yookisera ya Apwiya
17Nihuku noopacera na efesta ya ipaawu soohikhalano eferementu oohusera yaamwaattamela Yeesu ni yaamukoha: “Muntthuna woowi Nyuwo weera hiyo nareherere yooca ya mPaska*?” 18Owo aawaakhula: “Mwavolowe mmuttettheni ni mwamwaase mulopwana mukina ni mwamuleele: ‘Muhusiha eenre: ‘Ehuhuwaaka yookhuveela. Miyo kinrowa omuca mPaska* owannyinyu vamoha ni oohuseraaka.’” 19Oohusera yaapaka ntoko Yeesu aaleenlaawe, ni yaamureherera mPaska*. 20Wiilaka, Yeesu aahuurama vameesa vamoha ni muloko neeli 21ni ecaaka, Owo aaweerela: “Kinooleelani vekhaikhai weera mmoha a nyuwo anaakivarihe.” 22Awo yaathanana vancipale, enapacera omukoha mutthu ti mutthu eeraka: “Vekhaikhai nkihiyono miyo, Apwiya!” 23Yeesu aaheeratho: “Yoowo ociiye vamoha ni Miyo esasaani emoharu yeela, anaakivarihe. 24Mwaana a mutthu anaavarihiwe ntoko elempwalaaya mwaha wa Yoowo, mene Ii! Onoohaawa yoowo aneera amvarihe Mwaana a mutthu! Fataari ahaayariwe!” 25Vano Yudasi, eera amvarihe, aamweerela: “Vekhaikhai nkihiyono miyo, Muhusiha.” Yeesu aamwaakhula: “Aani, ti weyo!” 26Ecaaka, Yeesu aakuxa epaawu, anamutthapela Muluku, anameiyanya, anaavaha oohuseraawe, eeraka: “Mukuxeke ni muceeke: ela ti erutthwaaka.” 27Vahoolowaya aakuxa ekoomixi, anamutthapelatho Muluku, anaavaha oohusera, eeraka: “Ngwureke ootheene. 28Ela ti ephomaaka ya wiiraanyiha, enriheya mwaha wa atthu ancipale weera eleveleliwe soottheka. 29Miyo kinooleelani weera okhuma vaanaano va mpaka ohoolo, nkinrowa owura wa yoowiima ya ematta ya iwuuva* mpaka nihuku nenno kineeraaka kiwure eviinyu enyowani vamoha ni nyuwo moomweneni wa Atithaka.” 30Yiipakaru ecipo, yaavenya erowaka omwaako wa Sooliveira.
Yeesu onghima weera Pedru anaamukhootte
31Vano Yeesu aaweerela: “Ohiyuweene yoola ootheene nyuwo munookihiya, niwoko yoolempwa: ‘Kinoomuvulaliha Mukukhuli, ni ikhondoolo sa muhuwo nsimwaareiye.’ 32Kaavenyererakatho, kinoorowa ohoolowanyu wa oGalileiya.” 33Pedru aamwaakhula: “Hata ootheene yoohiyeeni, miyo nkinoohiyani!” 34Yeesu aamwaakhula: “Kinoororomelihani weera ohiyuweene yoola, ahinaaye wiipa muthupi, munookiruna imaara tthaaru.” 35Pedrutho aaheera: “Hata otthuneyaka weera miyo kikhwe vamoha ni Nyuwo, miyo nkinoorunani.” Ni oohusura akina ootheene yaaheeratho yeeyo.
Yeesu oGesemani
36Yeesu aarowa ni oohuseraawe vanipuroni niitthaniwa Gesemani, anaweerela: “Mukilaathiki va, Miyo kinrowa vale ovekela.” 37Amurowanaka ni yoowo Pedru ni anamwane eeli a Zebedeyo, aapacera othananaxa ni oripiwa murima. 38Vano aaweerela: “Munepaaka ori woothananaxa, mpakatho okhwa. Mukhale va ni mulipeleleke ni Miyo.” 39Arowaka vahoolo vakhaani, aahuuramihela ekhovaawe vathi, anavekela: “Tiithi, wawereya, mususihe wa Miyo ekoomixi ela, wa soothesene, ohikhale ntoko kintthunaaka, mene ntoko muntthunaanyu.” 40Aahokoleela wa oohuseraawe ni aahaaphwanya ekonaka. Vanonto Owo aamukoha Pedru: “Khamuwenre olipelela ni Miyo hata ewoora emoha paahi? 41Mulipelele ni muvekele weera muhivariwe ni yooweereriwa. Munepa ti woolikana, mene erutthu ti yoohilipa.” 42Aavenyatho arowaka ovekela: “Atithaka, waahiwereya osusiha wa Miyo ekoomixi ela kihiwuraka, opakiwe otthunawanyu.” 43Ahokoleelakatho, aahaaphwanya ekonaka, niwoko yaavoliwa ikhove. 44Vano aahaahiya ni aavekela emaara yanaararu, ahimaka masu mamoharu. 45Aahokoleela wa oohuseraawe anaweerela: “Nyuwo nlelo munookona ni munimwiitthuuwa? Yookhuveela ewoora aneeraawe avahereriwe Mwaana a mutthu mmatatani mwa anamattheka. 46Muvenye ni nrowe. Iwe onimoowa namavarihaaka.”
Ovariwa wa Yeesu
47Eeraka olokolola Yeesu, aaphiya Yudasi, mmoha a muloko neeli. Atthu ancipale yaari ni yoowo, ekunxeene mavaka ni ikopo, yaarumihiwe ni ahooleli a asaserdoti* ni asitokweene a muloko wa atthu. 48Namavariha aahiiwanana eneneero ni yaawo, aweerelaka: “Yoowo kineeraaka kamuulumihe ni ebeecu, ti Yoowo. Mwamvareke!” 49Arowaka woowaakuveya wa Yeesu, Yudasi aamweerela: “Salaama Muhusiha,” ni aambeeca. 50Yeesu aamukoha: “Nthamwene, mwaaweenle eheeni?” Atthu akina yaamwaattamela, yaamvara Yeesu enamutthuka. 51Mmoha a yaale yaari ni Yeesu, ookolaka moonowaawe, aakhumiha ekatanaawe ni aakwasa naaru na murumeiyi a mutokweenexa a asaserdoti*. 52Yeesu aamweerela: “Muhokoloxere mwaalo munluwoni! Vano, ootheene ankuxa mwaalo, eniiriheiye ni mwaalo. 53Khamusuwenle weera Miyo kinoowera waavekela Atithaka, ni Awo eniikurumihele khuluwi andyelo oohaalikeleiya? 54Moota heeni yeeraaya ekwaniheriwe Yoolempwa* yeenre ontthuneya weera itthu iya seereiye mooteene yoola?” 55Ehuhuweene yeele Yeesu aaweerela atthu ancipale: “Niwoko heeni mungwaanyu okivara ni nyaalo ni ikopo? Miyo kinaalamula atthu weera ewane ni ebooma? Mahuku ootheene Miyo kannaxuttiha Mpaani mwa Muluku, ni khamwaakitthunke. 56Sootheenetho iya seereiye weera ekwaniheriwe Yoolempwa* ya maprofeeti.” Vano oohusera ootheene yaamuhiya ni yaatthawa.
Yeesu ohoolo wa eSineedriyu*
57Yaawo yaamutthunke Yeesu yaamukuxa emuronghaka wa Kayafasi, mutokweenexa a asaserdoti*, weiwo yaathukumannaaya anamawera a nlamulo* ni asitokweene. 58Pedrutho aamutthara areene ottaiwene mpaka vaate wa empa ya mutokweenexa a asaserdoti*. Vano, aavolowa ni aakilaathi ni anamalipelela weera oone seiyo seera sikhumelele. 59Ahooleli a asaserdoti* ni ootheene a eSineedriyu* yaasaasa nthowa na Yeesu weera emuthorihele okhwa, 60mene khayaaphwannye, naamwi yiixooniheraka anamoona ancipale oowootha. 61Woomaliha, yaahiixoonihera anamoona eeli yeeraka: “Mulopwana Ola aaheera: ‘Miyo kinoowera ophwata Empa ya Muluku ni kinooteka mmahukuni mararu paahi.’” 62Vano aaheemela mutokweenexa a asaserdoti*, anamweerela Yeesu: “Khamunaakhula yeeyo awo angwootheraayani?” 63Yeesutho aamaala. Mutokweenexa a asaserdoti* aamweerela: “Kinoonyesererani weera munlipele Muluku Mukumi: Nyuwo mwaari Kristu, Mwaana a Muluku, munileele!” 64Yeesu aamwaakhula: “Nyuwo moheera muneenaanyu. Miyo kinooleelanitho: nniphiye nihuku muneeraanyu mmoone Mwaana a mutthu akilaantheene moono mulopwana wa Yoowo a ikuru sootheene ni awaaka mmahutteni a wiirimu.” 65Ti vaavaawo mutokweenexa a asaserdoti* aahunlaawe soowarasawe eeraka: “Oomuveiha Muluku! Khaninaatthuna anamoona akina. Nyuwo mohiiwa omuveihawawe Muluku. 66Munuupuwela hai?” Awo yaamwaakhula: “Omphwanela okhwa!” 67Vano akina yaamusenyela owiitho, emmanaka ni icipakhira; akina yaammana ni ilatuma 68yeeraka: “Otthome, Kristu, taani oomanne?”
Pedru onimruna Yeesu
69Pedru akilaantheene vaate, ni namuteko muthiyana amwaattamelaka yoowo, aamweerela: “Nyuwotho mwaari ni Yeesu Yoole muGalileiya.” 70Vano owo aaruna vamaithoni wa ootheene eeraka: “Nkisuwenle yeeyo munuulumaanyu.” 71Vano aavenya mpatta waari mulako mutokotoko, weiwo namuteko muthiyana mukina aamoonnaawe, ni aaweerela yaale yaari vaavaale: “Mulopwana ola aari ni Yeesu muNasarete.” 72Ni owo, alipelaka, aarunatho eeraka: “Nkimusuwenle Mulopwana Owo.” 73Eviraka ehuhu vakhaani, yaawo yaari weiwe yaaphiya wa Pedru ni yaamweerela: “Vekhaikhai, nyuwo ti mmoha a yaale. Muulumelowaanyu onoothoonyani.” 74Vano aapacera onyohola ni olipela eeraka: “Nkimusuwenle Mulopwana Owo.” Woowaakuveya muthupi aahiipa. 75Pedru aahuupuwelela masu Yeesu aamuleenlaawe eeraka: “Ahinaaye wiipa muthupi, munookiruna imaara tthaaru.” Avenyaka vaavaale, aahiinlaxa omvoreiyaka murima.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.