Matheyo 25

Yoolikanyiha ya aximwali oowiikosoopa muloko

1Omwene wa wiirimu onuulikane ntoko aximwali oowiikosoopa muloko yaakuxale onyaaraaya ni yaarongwe weera yakumane ni namatthomera. 2Athanu a yaawo yaari oohikhalano miruku, ni akinaawo yaari a miruku. 3Yaawo oohikhalano miruku yaakuxa onyaaraaya, mene khayaakuxaletho makhura. 4Wa soothesene, amiruku ti yaakuxale makhura mmapoottoroni vamoha ni onyaaraaya. 5Namatthomera aapisa ophiya, ni ootheene yaavoliwa ikhove ni yaakona. 6Ohiyu eriyari waahiiwiwa okhuwela: ‘Namatthomera ookhuveela! Mukhume weera munkumaneno!’ 7Vano aximwali oowiikosoopa ootheene yaavenya ni yaapattiha onyaaraaya. 8Yaawo oohikhalano miruku yaawerela ale a miruku: ‘Munivahe vakhaani makhuraanyu, niwoko onyaaraahu onoocipha.’ 9Awo a miruku yaawaakhula: ‘Hoye! Onoowereya weera khaankwana wa hiyo ni wa nyuwo. Murowe wa anthumiha makhura ni mwathume.’ 10Erowaka awo othuma makhura, namatthomera aaphiya. Aximwali oowiikosoopa yaari oolikaneene, yaavolowa ni yoowo mufestani ya othelana. Ni nsele naawaliwa. 11Vahoolowaya yaahoowatho aximwali oowiikosoopa akina ni yaaheera: ‘Apwiya, Apwiya, munihulele nsele!’ 12Vano owo aawaakhula: ‘Vekhaikhai miyo nkoosuwenleni.’ 13Tivawo, mwiipasoope, niwoko khamusuwenle nihuku, hata ewoora.

Yoolikanyiha ya italentu*

14Omwene wa wiirimu onuukhaletho ntoko mulopwana, atthunaka weetta mukwaha, aawiitthana arumeiyaawe ni aahaaroromeliha sooreelasawe. 15Mmoha aamvaha italentu* ithanu, mukina italentu* piili, ni mukinatho aamvaha emoha, wa mutthu ti mutthu aamvaha moota ongweraawe. Vahoolowaya aapwaha ni mukwahaawe. 16Yoowo aakhenle italentu* ithanu aavenya woowaakuveya, aavarela muteko ni aawina ithanutho sikina. 17Nitho yoowo aakhenle italentu* piili aawina piili sikina. 18Yoowo aakhenle etalentu* emoha, aavenya, anathipa nlitti, anavitha musurukhu wa Apwiyaawe. 19Yavinraaya ehuhu yincipale, Apwiya a arumeiyi ale yaahokolowa ni yaamaliha mulattu wa musurukhu ni yaawo. 20Yoowo aakhenle italentu* ithanu ahaawiihera ithanu sikina ni aaweerela: ‘Apwiya, mwaakiroromela ni italentu* ithanu; moone, koowina ithanutho.’ 21Apwiya yaamwaakhula: ‘Ti wooreera, murumeiyi ooreera ni oororomeleya! Weyo waari oororomeleya wa vakhaani, miyo nkoororomele wa sincipale. Owe ni ovolowe moohakalalani wa Apwiyaawo.’ 22Aahoowatho yoowo aakhenle italentu* piili ni aaweerela: ‘Apwiya mwaakiroromela ni italentu* piili; moone, koowina piilitho.’ 23Apwiya yaamwaakhula: ‘Ti wooreera, murumeiyi ooreera ni oororomeleya! Weyo waari oororomeleya wa vakhaani, miyo nkoororomele wa sincipale. Owe ni ovolowe moohakalalani wa Apwiyaawo.’ 24Wookisera aahoowa yoowo aakhenle etalentu* emoha anaweerela: ‘Apwiya, miyo kaasuwela weera nyuwo ti mulopwana oowuuma murima munghepha weiwo muhiphatteiyaanyu ni muntakansa weiwo muhaaliyaanyu. 25Tivawo kaahoova, kaavenya ni kaavitha etalentwaanyu* munlittini. Moone, va eri yawinyu.’ 26Apwiya yaamwaakhula: ‘Murumeiyi oonanara ni ooreesi! Weyo waasuwela weera miyo kinghepha weiwo kahaaphatteiyaaka ni kintakansa weiwo kahaaliyaaka? 27Vano, waatthuneya weyo othokorora musurukhwaaka wa anamathokorora musurukhu, weera miyo kaahokolowaka, kaakhele musurukhu woopwaha. 28Mmwaakhe etalentwaawe* ni mumvahe yoowo orino muloko. 29wa yoowo orino, anaavahiwe, ni anaakhalane vancipale, ni yoowo ohikhalannetho, mpaka yeeyo orinaawe, onimwaakhiwa. 30Ni mumvonyere mpiphini murumeiyi oohivareleya muteko, weiwo onuukhale wiinla ni okhuuriha maino.’

Ikhondoolo ni ipuri

31Mwaana a mutthu aawaaka moovuwanimwawe vamoha ni andyelowaawe ootheene, anaakilaathi vahiceniwawe ya ovuwa. 32Miloko sootheene nsithukumanyihiwe vahoolowawe, Owo anaammwaramwaxe mukina ni mukhwaawe ntoko mukukhuli ommwaramwaxaawe ikhondoolo ni ipuri. 33Ni aniikaathi ikhondoolo moonowaawe mulopwana, ni ipuri moonowaawe muthiyana. 34Vano Mwene anaaweerele yaawo a moono mulopwana: ‘Ngwe, ootteelihiwa a Atithaka. Mwaakhele ntoko yoohiyeriwa* omwene mureherereliwaanyu okhuma ompacereroni wa elapo ya vathi. 35Kaavoliwa etala, ni mwaakivaha yooca; kaavoliwatho ntthona, ni mwaakivaha maahi; kaari namarwa, ni mwaakaakhela nnene; 36kaahaawela ikuwo, ni mwaakiwariha; kaavoreiwa, ni mwaakikosoopa; kaari okaliposo ni mwaakixekura.’ 37Vano oororomeleya eniiwaakhule: ‘Apwiya, yaakhani naawoonnaahuni ni etala ni nnoovahani yooca, hoye hoye ni ntthona ni nnoovahani maahi? 38Yaakhani naawoonnaahuni ntoko namarwa ni nnawaakhelani nnene, hoye hoye muhaawelaka ikuwo ni nnoowarihani? 39Yaakhani naawoonnaahuni muvoreiwaka, hoye hoye mureene okaliposo ni nnooxekurani?’ 40Mwene anaakhule: ‘Miyo kinooleelani ekhaikhai: ‘Yeeyo mwaampakenlaanyu mmoha a axunnaka ooyevaxa, mwaakipakenle Miyo. 41Vano Owo anaaweerele yaawo a moono muthiyana: ‘Oolaphiwa! Mususeke wa Miyo mpaka mmooroni woohimala oreherereliwaawe Satana ni andyelowaawe. 42Vano, kaavoliwa etala, ni khamwaakivanghe yooca; kaavoliwa ntthona, ni khamwaakivanghe maahi; 43kaari namarwa, ni khamwaakaakhenle nnene; kaahaawela ikuwo, ni khamwaakiwaringhe; kaavoreiwa ni kaari okaliposo, ni khamwaakixekunre.’ 44Awotho eniiwaakhule: ‘Apwiya, yaakhani naawoonnaahuni ni etala, hoye hoye ntthona, hoye hoye ntoko namarwa, hoye hoye muhaawelaka ikuwo, hoye hoye muvoreiwaka, naari mureene okaliposo, ni nihookhaviherani? 45Awo eniiwaakhule: ‘Miyo kinooleelani ekhaikhai: Yeeyo mwaahiyalaanyu ompakela mukina a asikhaani ala, mwaahiyatho okipakela Miyo.’ 46Ni awo eniirowe moottaruxiwani woohimala, oororomeleyatho mookumini woohimala.”

Currently Selected:

Matheyo 25: VMK2021

Highlight

Copy