Malekiya 2
2
1“Vano, woopereriwa wu ti wawinyu, nyuwo asaserdoti*. 2Nyuwosa mwaahiiwelela, muhipwatthelaka Nsinanaka,” oneera Yave a ikuru sootheene, “kinimoolaphasani, mpakatho kinoolapha mareelihowaanyu. Aani koolapha, niwoko nyuwosa khamukittittiminghe ni murimaanyu. 3Niwoko na nyuwosa, Miyo kinoohiiha ekhapiraanyu; kinoottikitthela owiithowanyu mahiloka a axinama ampakeliwa sooveleela mfestanimwanyu, koovonyerasekeni vaate vamoha ni mahiloka. 4Hiiho, nyuwosa munoosuwela weera ti Miyo kiwooperenreni weera owiiraananawaka aLeevi opwaherere,” oneera Yave a ikuru sootheene. 5“Omwiiraananawaka yoowo waari wa okumi ni murettele, ni vekhaikhai kaamvahenre weera akoove. Owo ookoova, anathukumela ohoolo wa Nsinanaka. 6Soolaka sa ekhaikhai saari mmwaanomwawe, ni mmo khayaaphwanyaneyaru yoowootha. Owo aaheetta ni Miyo mmuretteleni ni wookoleleya, anaahapuxa ancipale mwa soottheka. 7Niwoko iyano sa musaserdoti* sithokororeke esuwelo, ni mmwaanomwawe, ootheene yaaseke oxuttihiwa nlamulo, niwoko owo ti namutthenga a Yave, a ikuru sootheene. 8Vaheera nyuwosa moohapuwa mphironi. Ni oxuttihawanyu mootannyera omora wa atthu ancipale; nyuwosa moonanariha wiiraana wa Leevi,” oneera Yave a ikuru sootheene. 9“Tivawo kipakihalaaka weera munyoosiwe ni muyevihiwe ohoolo wa miloko sootheene, niwoko nyuwosa khamuneettela iphirosaka, mene mumpaka nthalu mwaaxuttihaka nlamulo.”
Ohiroromeleya wa oYuda
10Vano, ootheene hiyo tiithaahu khahiyono mmoharu? Khanipattuxiwe ni Muluku mmoharu? Vanonto heeni ninnanarihaahu wiiraana wa makholowaahu nihiroromelanaka? 11Yuda kharoromeleiye. oYixrayeli ni oYerusaleemu yoopakiwa etthu yoohiira: aYuda yaaveiha Nipuro Nootteela* onsivelaawe Yave, yaathelaka asithiyana anlapa miluku sa anamarwa. 12Yave amvonyere okerekhere wa iheema sa Yakobe akhalaru mutthu ompaka yeeyo, naari akhalaka onimpakela yooveleela Yave a ikuru sootheene. 13Yookhalatho etthu ekina nyuwosa mumpakaanyu: Munaasariha maithori altaari* a Yave; muniinla, mwiipulelaka, niwoko Owo khampwatthela sooveleelasanyu, hata khanaakhela mmatatanimwanyu ntoko soowaakhuleleya. 14Nyuwosa nlelo munkoha: “Heeni?” Niwoko ti Yave onkhalela onamoona eriyari ya nyuwo ni muthiyana a emiravowaanyu, niwoko nyuwo khamuroromeleiye ni yoowo, owo orookhalaru mwaarinyu, muthiyana mwiiraanannaanyu moothelanani. 15Khahiyono Yave oopakanseni okhala mmoha? Awosa ti awawe mweerutthuni mpaka mmunepani. Vano akhalenleni mmoha? Niwoko Owo aahaawela ekhapira ya oMuluku. Vanonto mwiipasoope ni muhiroromeleye wa muthiyana a emiravowaanyu. 16“Miyo kinthanya omwalana,” oneera Yave, Muluku a oYixrayeli, “kinimuthanyatho mutthu oniikuttelela ni nipuhero ntoko oniikuttelelaawe ni soowara,” oneera Yave a ikuru sootheene. Tivawo, mukhaleno muupuwelo wooreera ni muhikhale oohiroromeleya. 17Nyuwosa moomukhulumula Yave ni maswaanyu. “Nimukhulumunle hai?” munkoha. Niwoko muneera: “Ootheene ampaka yoonanara ti ooreera vamaithoni wa Yave, ni Owo onnaahakalalela,” munakohatho: “Ori woowi Muluku a ekhaikhai?”
Currently Selected:
Malekiya 2: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
