Levitiku 22
22
Miteko sa sooveleela sootteela
1Yave aamweerela Moisesi: 2“Mwamuleele Aharoni ni anamwanaawe asilopwana weera ettittimihe sooveleela sootteela aYixrayeli ankitteeliheraaya esembaka oveiha Nsinanaka Nootteela. Miyo ti Yave. 3Mwawooperere: Wa ikhapira sootheene sa muhoolo, mukina a ekhapiraawe akhala oohitteela aakhuveelaka sooveleela sootteela aYixrayeli animutteeliheraaya Yave, mulopwana owo amalamalihiwe vamaithoniwaka. Miyo ti Yave. 4Ahikhaleru a ekhapira ya Aharoni orino makokho hoye hoye enimukhuma ephome, aneera ace yooveleela yootteela mpaka aneeraawe atteelihiwe. Owo onookhalatho oohitteela atava etthu yookhwa hoye hoye ni yamukhuma elopwana, 5naari atava yakhalaru yoopattuxiwa hata akhalaru mutthu aneera amutatuxe oohitteela ni wakhalaru moota wa ohitteela. 6Yoowo aneera atave itthusene seiyo onookhala oohitteela mpaka oxekuwa. Owo ahice yooveleela yootteela ahirampe. 7Wiilaleene, onookhala ootteela ni vahoolowaya aceeke yooveleela yootteela, niwoko ti yoocaawe. 8Owo ahimukhuuretho mwaamunama oovettuliwa hoye hoye oonyaanyiwa ni axinama a ntuphini athatuwaka hiiho oohitteela mwa seiyo. Miyo ti Yave. 9Asaserdoti* yiiweleleke ikanosaka weera ehikhalane nthowa ekhwaaka niwoko na oramusa seiyo. Miyo ti Yave kinaatteeliha. 10Aceeke paahi musaserdoti* ni emusaawe yooveleela yootteela; muletto a musaserdoti* hoye hoye namutekwaawe ahiceekeru. 11Vaheera musaserdoti* athuma epottha hoye hoye epottha yaayareliwa vaatevawe, epottheene yeeyo eceeke yoocaawe. 12Mwaana muthiyana a musaserdoti* atheliwa ni mulopwana oohikhala musaserdoti*, vano awosa ehice yooveleela yootteela. 13Vaheera mwaana muthiyana a musaserdoti* akhala naamukhweli hoye hoye amwalana ahiyanre, anahokoleela vaate wa atithawe ntoko aakhalaawe mweehuhuni ya emwalaawe, owo aceeke yooca ya atithawe. Ahiceru mutthu mukina. 14Mukina aca woohilakela yooveleela yootteelihiwa, owo aliveleke yooveleela ya musaserdoti* ni aandyeereretho mpatta wanaathanu wa ociiyaawe. 15Asaserdoti* ehiveihe sooveleela sootteela aYixrayeli animuruuhelaaya Yave, 16yaatthuniheraka oca sooveleelasene seiyo, yaaruuhelaka nthowa ninnyesereriwa oreherera. Miyo ti Yave kinaatteeliha.”
Sooveleela soowaakhuleleya
17Yave aamweerelatho Moisesi: 18“Mwamuleele Aharoni, anamwanaawe asilopwana ni aYixrayeli ootheene: ‘Akhala mukina a nyuwosa, akhalaka muYixrayeli hoye hoye namarwa onkhala oYixrayeli, aruuha yoomveleelela Yave ntoko yoohisa, hata ekhalaka yooveleela yookwanihera nlipelo hoye hoye yooveleela ya otthunawawe paahi, 19vano mulopwana owo amuruuheke mwaamunama mulopwana oohirakala a imombe, ikhondoolo hoye hoye ipuri weera aakhuleliwe mwaha wa nyuwo. 20Muhimuruuheru mwaamunama oorakala niwoko khamwaakhuleleliwa mwaha wa nyuwo. 21Mukina aamuruuhaka mwaamunana a emombe, hoye hoye a muhuwo wa ikhondoolo ntoko yooveleelela murettele wa Yave weera akwanihere nlipelo hoye hoye niwoko na otthunawawe, vano eyo ekhale yoohirakala ni yookwanela weera yaakhuleliwe. 22Muhimupakele Yave yooveleela ya mwaamunana oohoona, oovulalihiwa naari oorakala, ookwituwa mwetto, hata oovoreyeya oosareya makhwatta a ithuku hoye hoye ookhuma marohi. Muhimwiikaathiru valtaarini* ntoko yoomveleelela Yave yoorehereriwa vayikho. 23Wa soothesene ontthuniheriwa opaka yooveleela ya otthunawanyu ya emombe elopwana hoye hoye ekhondoolo yoorakala hoye hoye yootuthunya, mene eyo khayaakhuleliwa mwaakwaniheraka nlipelo. 24Muhimupakele Yave yooveleela ya mwaamunama orino ikhete soorakala, soonyaanyeya, soophweeya hoye hoye soothikiliwa. Muhipake yeeyo mweelaponimwanyu, 25hata muhiwaakhele axinama ntoko awo mwa anamarwa weera mwaavahe ntoko yaawo ntoko yooca wa Mulukwaanyu. Awosa khamwaakhuleleliwa niwoko ti oohikwanela ni oorakala. 26Yave aamweerela Moisesi: 27“Aayariwaka mwaamombe, eputtiputthi hoye hoye mwaapuri, owo akhaleke mahuku mathannameeli ni naangolo. Okhuma nihuku nanaathannamararu wookela ohoolo onimwaakhuleliwa ntoko yoomveleelela Yave yoorehereriwa vayikho. 28Muhiive emombe, ekhondoolo, naari epuri ethiyana vamoha ni axaanaaya nihuku nimoha. 29Mwaampakelaka Yave yooveleela ya otthapela, mpake yooveleeleene yeeyo moota wooweera mwaakhuleleliwe. 30Eyo ekhuuriweke nihuku nenenenno; muhihiyeru mpaka waaxiiye. Miyo ti Yave. 31Mwiiwelele malamulowaaka ni mutthare yaawo. Miyo ti Yave. 32Muhiveihe Nsinanaka Nootteela. Miyo kinoosuweliwa ntoko Ootteela ni aYixrayeli. Miyo ti Yave kinootteelihani 33ni kookhumihaleni wExipitu weera kikhale Mulukwaanyu. Miyo ti Yave.”
Currently Selected:
Levitiku 22: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
