Levitiku 10
10
Nadabi ni Abihu
1Nadabi ni Abihu, anamwane asilopwana a Aharoni, yaakuxa yaahiseriwa erubani*, mwa mwemmo yaapattinghaaya mooro, enahela erubani* ni yaapattiha mooro woohitthuniheriwa vamaithoni wa Yave, ehilamuleliwe. 2Vano Yave aarumiha mooro onaalaliha ni yaahookhwa vamaithoni wa Yave. 3Vanonto Moisesi aamweerela Aharoni: “Uulummaawe Yave ti ela: ‘Kinimwiixoonihera Ootteelaxa variyari wa yaala ankaattamela; Miyo kinoovuwihiwa vamaithoni wa muloko wootheene.’” Aharoni aari mwaasa omaala. 4Moisesi aamwiitthana Mixayeli ni Elezafana, mwaana mulopwana a atatawe Aharoni, anaweerela: “Nkarwani, mwaavenxe axisuluwiinyu mukhwipi wa okonelingwe, vaate wa mpatta wa ohoolo wa Nipuro Nootteela*.” 5Vano yaarowa, enaavarela mikaandyo, enaapurulela mpaka okhwipi wa okonelingwe, ntoko Moisesi aalamulenlaawe. 6Vanonto Moisesi aamweerela Aharoni ni anamwanaawe asilopwana Eleyazari ni Ithamari: “Muhimetthe mayihaanyu hata muhaahule soowarasanyu mwiinanelaka weera muhikhwe ni Yave ahinyoonyeriwe muloko wootheene. Vaheera imusisanyu, ipuumba sootheene sa aYixrayeli ewiinleleke yaale Yave aaphwantaawe ni mooro. 7Muhivenye vamulako wa Eheema ya Muthukumano* weera muhikhwe, niwoko makhura a ottikitthelano a Yave ari mwa nyuwo.” Vano yaapaka yeeyo Moisesi aahimmaawe. 8Vano Yave aamweerela Aharoni: 9“Nyuwo ni anamwaniinyu asilopwana muhiwure eviinyu naari soowura sikina sirino eferementu soohapala muhinaaye ovolowa Muheemani ya Muthukumano weera muhikhwe. Ela ti ekano yoohimala wa ikhapira sootheene. 10Muntthuneya okawanyiha yeeyo eri yootteela ni yeeyo eri yoohitteeliheriwa; yeeyo yootteela ni yoohitteela, 11ni mwaaxuttihe aYixrayeli ikano sootheene Yave aavanghaawe mwa Moisesi.” 12Moisesi aamweerela Aharoni ni anamwane asilopwana yaahanle, Eleyazari ni Ithamari: “Mukuxe yooveleela ya irooro ehanle mwa yoomveleelela Yave erehereriwe vayikho, muceleke yoohikhalano eferementu mukerekhere valtaarini*, niwoko ti yootteelaxa. 13Muceleke vaNipuroni Nootteela*, niwoko ti mpattaanyu ni mpatta wa anamwaniinyu asilopwana wa sooveleeleliwa Yave sirehereriwe vayikho. Vano keenraaka malamuleliwo. 14Mene nyuwo, anamwaniinyu asilopwana ni asithiyana ekhuureke ihoce soowiinainiheriwa ni etakhwi yooveleeleliwa. Mukhuureke vanipuroni noothanliwa ntoko nootteela; iyo moovahiwa nyuwo ni amanwaniinyu ntoko mpattaanyu wa sooveleelela murettele sa aYixrayeli. 15Etakhwi yooveleeliwa ni ehoce yoowiinainiheriwa eruuhiweke vamoha ni mipatta sa makhura a sooveleela soorehereriwa vayikho weera siinainihiweke vamaithoni wa Yave. Ola onookhala mpatta wa khula nihuku wa nyuwo ni anamwaniinyu, ntoko Yave aalamulenlaawe.” 16Moisesi amwaasaasiyeene mipatta sootheene napunci a yooveleelela yoottheka ni asuwelakaru weera oohisiwa, aamunyoonyeriwa Eleyazari ni Ithamari, anamwane asilopwana yaahanle a Aharoni, anaakoha: 17“Muhikhuurenle heeni yooveleelela yoottheka vaNipuroni Nootteela*? Ti yooveleela yootteelaxa mvahiwaanyu weera mvenxe nthowa wa muloko murehererelaka wiiwanana ni Yave wa yoowo vamaithoniwawe. 18Yeenre ephome ya yooveleela eyo ehironghiwaka vaNipuroni Nootteela*, nyuwo mwaahikhuureleke vanipuroni nootteeliheriwa ntoko kilamulenlaaka.” 19Aharoni aamwaakhula Moisesi: “Olelo awosa aapakela sooveleelela soottheka ni soohisasaya vamaithoni wa Yave – hata hiiho etthu yoonanara ntoko ela yookikhumelela. Miyo kaakhuurale yooveleelela yoottheka olelo, vano khaamunsiveliha Yave?” 20Vano Moisesi aahaakhulela masu ale.
Currently Selected:
Levitiku 10: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
