aGalata 3

Nroromelo, hoye hoye wiiwelela nlamulo?

1aGalata alolo! Yoolongweni taani? Mwaahooniheriwa Yeesu Kristu ntoko othomeiwalaawe vamuttandani. 2Miyo kaatthuna osuwela etthu emoha paahi: Nyuwo mohaakhela Munepa ni miteko sa malamulo, hoye hoye niwoko mohaakhulela yeeyo mwiiwalaanyu? 3Weeraka muri alolo moota wooweera mwaapacenraanyu ni Munepa Wootteela, vano muntthuna omalihera ni ikurusanyu asineenaanyu? 4Weeraka moohaawa ni itthu sincipale wa siiyo? Waari vekhaikhai wa siiyo! 5Yoowo onoovahani Munepa ni ompaka sootikhiniha variyari wa nyuwo, ompaka iyo niwoko muniiwelela malamulo, hoye hoye niwoko moororomela yeeyo mwiiwalaanyu? 6Mmuupuwelele Abrahaamu: Owo aamuroromela Muluku, ni niwoko na yeeyo aahaakhuleliwa ni Muluku. 7Mwiiwexexe nnene weera yaale anroromela ari anamwane a Abrahaamu. 8Yoolempwa* ya khalayi, yoonaka ehinaaye weera Muluku onoowaakhulela amalapo niwoko na nroromelonaya mwa Kristu, yaalaleiya toko wa Abrahaamu masu ooreeraxa: “Niwoko na nyuwo miloko sootheene nsireelihiwe.” 9Hiiho, yaale anroromela ari ooreelihiwa vamoha ni Abrahaamu, mulopwana a nroromelo. 10Yaawo ootheene anroromela miteko sa malamulo alaphiwa, niwoko yoolempwa: “Oolaphiwa ootheene yaale ahinkwanihera itthu sootheene silempwe mulivuruni ya malamulo.” 11Yoosuwanyeya weera Muluku khaniwaakhulela atthu eroromelaka malamulo, niwoko mutthu oowaakhuleleya onkhala munroromeloni. 12Malamulo khaankhuma wa nroromelo, ohiyanawaya, “Yoowo ompaka itthu iya, onkhala niwoko na seiyo.” 13Kristu oonivuluxa munlaphoni na malamulo, athatuwaka nlapho vanipuroniwahu, niwoko yoolempwa: “Oolaphiwa ti ootheene yaale athomeiwale vamuttandani.” 14Aapakenle yeeyo weera, niwoko na Yoowo, nreeliho na Abrahaamu niphiyetho wa amalapo nitho weera hiyo naakhele munroromeloni yoororomelihiwa ya Munepa.

Nlamulo ni yoororomelihiwa

15Axunnaka, kinooleelani ni niphwanaphwaniho: mutthu areherenreene yoohiyeraawe*, khaawo anaamalihe, naari anaandyeerere. 16Hiihotho ni soororomelihiwa saapakeliwe Abrahaamu ni ekhapiraawe. Yoolempwa* kheeneera: ‘ni wa ikhapirasawe’ ntoko ancipale, mene ‘wa ekhapiraawe,’ weera enoonihere weera enuuluma sa mutthu mmoha paahi, eyo tiiyo Kristu. 17Kinghimaaka ti ela: malamulo awiiye iyaakha 430 vahoolo wa wiiwanana aapankaawe ni Muluku khaammaliha wiiwanana iwe Muluku aakhalinghaawe ahinaaye, moota wooweera malamulo ampakiha soororomeliha sa siiyo. 18Vano, yoohiyeriwa* yaarwiiye niwoko na nlamulo, kheerwiiye niwoko na yoororomelihiwa. Muluku aamuhiyera Abrahaamu ni yoororomelihiwa yoohiyeriwa* mahaleene. 19Vano, malamulo yaarweela heeni? Malamulo yaarweela woonihera seiyo siri soohitthuna sa Muluku mpaka ophiya Yoole yoororomelihiwa yaamuhimaaya. Malamulo ale avahiwe ni andyelo mmatatani a mulopwana aari ntoko namitthenga. 20Wa soothesene, namitthenga khanimukhaliha mmoha paahi. Mene Muluku ori mmoha. 21Malamulo anniittana ni soororomelihiwa sa Muluku? Hoye! Vano, waari weera yaavahiwa malamulo angwera ovaha okumi, vekhaikhai hiyo naamwaakhuleliwa ni Muluku niwoko na malamulo. 22Yoolempwatho enghima weera elapo yootheene eri yootthukeya ni soottheka, weera yoororomelihiwa ya Muluku yaavahiwe aKristu niwoko na nroromelo mwa Yeesu Kristu. 23Nihinaaye ophiya nroromelo, malamulo yaanikhaliha ootthukeya mpaka nroromelo neera nirwe nooniheriwe. 24Hiiho malamulo yaari muhusihaahu weera enironghe wa Kristu, weera hiyo naakhuleliwe ni Muluku niwoko na nroromelo. 25Vanonto, niphiyalaaya nroromelo, khaninlamuliwatho ni malamulo.

Anamwane a Muluku

26Nyuwo ootheene muri anamwane a Muluku niwoko na nroromelo mwa Kristu Yeesu. 27Vano, yaale apatisiwe mwa Kristu, angwanre Kristu. 28Khawowo muYuda, hata muGrego, epottha, hata neethi, mulopwana, hata muthiyana, niwoko ootheene ti mmoha mwa Kristu Yeesu. 29Ni nyuwo mwaari a Kristu, vano ti ekhapira ya Abrahaamu, ni muri anamwaakhela ntoko yoororomelihiwa enghimaaya.

Currently Selected:

aGalata 3: VMK2021

Highlight

Copy