Okhuma 6
6
1Yave aamweerela Moisesi: “Nyuwo mmoone yeeyo kineeraaka kimpakele Farawu*. Mwa Ntatanaka nooweraxa owo onootthunihera muloko orowa. Mwa Ntatanaka nooweraxa owo onimoomola muloko elapwaawe.” 2Muluku aamweerelatho Moisesi: “Miyo Yave. 3Kaahiixoonihera wa Abrahaamu, Isaki ni Yakobe ntoko Muluku a ikuru sootheene, mene mwa Nsinanaka, Yave, nkiixoonihenre wa yaawosa. 4Vahoolowaya kookhaliha wiiraanyihawaka ni yaawo weera kaavahe elapo ya oKanaani, mwa weiwe yaamankaaya ntoko anamarwa. 5Vano, kohiiwa wiikhupanyera wa aYixrayeli mwa yaawo awExipitu anaapakaaya ipottha ni kohuupuwelela wiiraanyihawaka. 6Tivawo: Mwaaleele aYixrayeli: ‘Miyo ti Yave. Kinimootapuxani mwa miteko sooviha sa awExipitu. Miyo kinimootapuxani mpotthani ni kinoowoopolani ni moono woolipa ni miteko sitokotoko sa nthoriho. 7Miyo kinimookhalihani mulokwaaka ni kinookhala Mulukwaanyusa. Vano nyuwosa mmwisuwele weera Miyo ti Yave Mulukwaanyu mwa Yoowo onootapuxani mmutekoni mumvarihiwaanyu ni awExipitu. 8Miyo kinimooronghani mulaponi kaalipenlaaka keemexaka ntata weera kaarwa omvaha Abrahaamu, Isaki ni Yakobe. Kinimoovahani ntoko elapwaanyu. Miyo ti Yave!’” 9Moisesi aahaathalihera yeeyo aYixrayeli, mene awosa khayaamwiiwelenle niwoko na othanana ni mitekosaya soovihaxa. 10Vano Yave aamulamulela Moisesi: 11“Murowe mwamuleele Farawu*, mwene a wExipitu, weera aahiye aYixrayeli ekhume mulaponi.” 12Wa soothesene, Moisesitho aamweerela Yave: “aYixrayeli ehikiiwaka miyo – anaakiiwe hai Farawu*? Wootepaxa miyo nkinlokolola nnene.” 13Vaheera Yave aamulamulela Moisesi ni Aharoni weera yaaleele aYixrayeli ni Farawu*, mwene a wExipitu, weera Muluku oolamulela waakhumiha aYixrayeli mwExipitu.
Ikhapira sa Moisesi ni Aharoni
14Asitokweene a emusi ya aYixrayeli yaari ti ala: anamwane a Rubeni, ntthaara na Yixrayeli: Hanokhi, Palu, Hezironi ni Karemi. Ala yaari mahimo a Rubeni. 15Anamwane a Simeyoni yaari Yemuweli, Yamini, Ohadi, Yakini, Zowari ni Xawuli, mwaana a muthiyana muKanaani. Ala yaari mahimo a Simeyoni. 16Ala yaari masina a anamwane a Leevi ottharihiwaka oyariwawaya: Gerxomo, Kohathi ni Merari. Leevi aarino iyaakha ncira ni miloko miraru niithannapiili. 17Anamwane a Gerxomo ettharihiwaka maimwaaya: Libeni ni Ximei. 18Anamwane a Kohathi yaari Amerama, Yizehara, Heberoni ni Uziyeli. Kohathi aarino iyaakha ncira ni miloko miraru ni tthaaru. 19Anamwane a Merari yaari Makheli ni Muxi. Ala yaari mahimo a Leevi ottharihiwaka oyariwawaya. 20Amerama aamuthela napaapaawe iitthaniwa Yokhebedi, ni owo aamuyara Aharoni ni Moisesi. Amerama aarino iyaakha ncira ni miloko miraru niithannapiili. 21Anamwane a Yizehara yaari Kora, Nefege ni Zikeri. 22Anamwane a Uziyeli yaari Mixayeli, Elezafana ni Siteri. 23Aharoni aamuthela Elixeba, mwaana a Aminadabi ni murokoriye Nakhexoni. Owo aamuyarano Nadabi, Abihu, Eleyazara ni Itamara. 24Anamwane a Kora yaari Asiri, Elekana ni Abiyasafa. Awo yaari mahimo a aKora. 25Eleyazara, mwaana a Aharoni, aamuthela mwaana mmoha a Putiyeli, mwa yoowo aamuyarannaawe Pinehasa. Ala yaari asitokweene a emusi ya aLeevi ettharihiwaka mahimwaaya. 26Vano aari Aharoneene yoowo ni Moiseseene yoowo Yave aaweerelansaawe: “Mwaakhumihe aYixrayeli mwExipitu mwaarehereraka muttharihaka okawanyeyawaya.” 27Aari Moisesi ni Aharoni yuulumme ni Farawu*, mwene a wExipitu, eerelaka waakhumiha aYixrayeli mwExipitu.
Aharoni ntoko eyano ya Moisesi
28Vano Yave uulummaawe ni Moisesi wExipitu, 29aamweerela: “Miyo ti Yave. Mwamuleele Farawu*, mwene a wExiptu, sootheene kineeraaka kooleeleni.” 30Moisesitho aamukoha Yave: “Anaakiiwe hai Farawu* kihuulumaka nnene?”
Currently Selected:
Okhuma 6: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
